Naṉ. 33

1Jakupsha Esaú kuatrusiántu áishmaṉja̱i̱ irunar wininian wainiak Ríancha ni uchirí̱ji̱a̱i̱ tura Rakirnasha ni uchirí̱ji̱a̱i̱ nuyá̱ jimiará iniatairi̱n nuatkaruya nunasha ni uchirí̱ji̱a̱i̱ṉ akanar awajsarmiayi. 2Tura iniatairi̱n uchirtiuk eem awajsarmiayi tura uku Rían ni uchirí̱ji̱a̱i̱ awajsámiayi nuna úkuri̱nkia Rakiran ni uchirí̱ji̱a̱i̱ Juseja̱i̱ awajsámiayi. 3Tura Jakupka nua̱ri̱n awajás ikiuiniak émkamiayi. Túruna tsuntsumá nuṉkan antiastatuk nui̱ tsuntsumá nui̱ tsuntsumá ajá ajakua siati ejé yachi̱ wajamunam jeastatuk wajasmiayi. 4Tura Esauka yachi̱n wainiak tsékeṉtki̱ miniakak yapiniam mukuná mái̱ metek e̱a̱nairarmiayi. 5Nuya̱sha Esaú nuwa̱n tura uchin wajainian wáinkiar Jakupan chicharuk “¿Ju̱sha ya ainia?” tutai Jakup aya̱k “Ju̱ka ame takartámniun Yus súsana nuiti” tímiayi.

6Tura nuya̱ṉka Jakupa takarniúri̱ ni uchirí̱ji̱a̱i̱ Esaun weantukar tsuntsumpruáwarmiayi. 7Tura Ríasha ni uchirí̱ji̱a̱i̱ núnisaraṉ túrawarmiayi tura umíamunam Jusesha nukurí̱ Rakirja̱i̱ Esaun tsuntsumpruáwarmiayi. 8Tura Esaú ni yachi̱n chicharuk “Ti untsurí taṉkun jintiá winisan wainkiarajna ausha ¿itiur enentáimsamea áitkiam?” tutai Jakup áimiuk “Shiir enentáimtikratjam tusan uuntá, ámin amastinian áitkiajai” tú ái̱kmiayi.

9Tutai “Atsá yatsuru, wikia núkap achíakjai antsu áminiuk ártí” tímiayi Esaú. 10Tutai Jakup aya̱k “Atsá, antsu nekas shiir enentáimturkumka amaajna ju̱ achikta. Warí Yusja̱i̱ nawamnaikiatniua núnismek péṉker nawampruku asakmin wikia shiir wampu nekapeajai. 11Amaajna ju̱ nekas achirtukta tájame. Warí Yus winia kuítrintin awajtúsuiti tuma asan wikia peṉké táamtsujai” tímiayi. Tura Jakupsha nú arant tukí̱ eemam Esausha suumia nuna “ayu” tímiayi. 12Tinia yachi̱n chicharuk “Wetái, wikia eema ajatjai” tímiayi. 13Tutai Jakup aya̱k “Ayu yatsuru, eestá. Uchir kuírach ainia ju̱na tura muriknasha tura waaka petsaku ainia ju̱nasha péṉker iirmasartiniaitjiai. Warí wárik yarummaka muriksha pimpikiar jarutkachartatuak. 14Ámeka eema ajata. Wikia taṉkurun uchirja̱i̱ yaruasan yáitmataik winittiajai tura Sáirnum iṉkiunaiktai” tímiayi.

15Takui̱ Esaú chicharuk “Wi aya̱rainiajna ju̱ya̱n ámin yaintmakartinian ishichik ikiúrkiartajmé” tutai Jakup “Atsá, ánik asati. Uuntru, áyatik waitnentramna núja̱i̱ṉ máakete” tímiayi. 16Tura nú tsawantini̱ṉ Esauka Sáirnum waketkimiayi. 17Nuyá̱ Jakupka íksaṉ Sukutnumaani̱ wémiayi. Tura nui̱ je̱a̱n je̱a̱mmiayi. Tura waaka pujustinniasha áakan najatamiayi. Tuma asamtai nú nuṉka náari̱n Sukut anaikiamiayi.

18Kame Jakup Patanarámnumia̱ jiinkimia nuya̱ṉka Kanaannum péṉker jeamiayi. Tura Sekim pepru naka ámanum ishichik tsawant seturmiayi. 19Nui̱ Jamura uchirí̱ nuṉke̱n jutai̱ je̱a̱n je̱a̱mmia nunak sian kuitji̱a̱i̱ sumakmiayi. Jamurka Sekimia aparí̱nti. 20Nuyá̱ nui̱ kayá irumar Yus shiir awajkur áestutai̱n najanamiayi. Najana Er-Erujé Israer#33:20 Nuka Israer chichamja̱i̱ṉkia “Yus Israera Yusri̱” tawai. tú anaikiamiayi.

Currently Selected:

Naṉ. 33: jiv

Highlight

Copy