Naṉ. 32

Jakup Esauja̱i̱ iṉkiuniamu

1Tura Jakup wéan Yusa suntari̱ iṉkiuṉtai tusar tariarmiayi. 2Tura Jakup Yusa suntari̱ untsurí wininian wainiak chichaak “Yusa suntari̱ matsamkamu asamtai jú̱ nuṉkaka Majanáim náartin atí” tú anaikiamiayi. 3Nuyá̱ Jakup ni jeatniuri̱n yachí̱ Esaun ujatruktarum tusa Sair nuṉkanam aentsun émtikiamiayi. Kame Sairsha Etum nuṉkanmaiti. 4Tura Jakup akupeak jú̱nis tímiayi “Winia yatsur Esaú jú̱nisrum titiarum ‘Ame yátsum Jakup chichaman akuptúrmak jú̱nis túramui “Rapanai̱ṉᵏⁱ núkap uwí pujusuitjiai. 5Waakancha umpuruncha muriknasha tura winia takartin ainia nu nuwa̱sha áishmaṉsha wininiawai. Kame shiir enentáimtursat tusan jú̱ chichaman amincha uuntru Esauwá, akuptajme” túramui’ titiarum” tímiayi Jakup.

6Tutai chichaman júkiarmia nusha Jakupai̱ ataksha waketkiar taar chicharainiak “Ame yátsum ujaktai tusar wémaji. Túrar ujakmaji. Túram yamaikia ámin iṉkiunmaktaj tusa imia niṉki kuatrusiántu áishmaṉja̱i̱ winitrámainiawai” tiármiayi. 7-8Tura Jakupsha ame yátsum untsurí aentsja̱i̱ wininiawai táman antuk ti sapijmiak wake mesekmiayi. Jakupsha enentáimias yatsur Esaú ni shuari̱ji̱a̱i̱ winis chíkich akankámun jateakuisha chíkich akankámusha pisarchartatuak tusa, ni aentsri̱n jímiapetek akankámiayi. Tura waakancha muriknasha kamiyuncha núnisaṉ jímiapetek akankámiayi. 9Tura Jakup Yusan áujuk “Uunt Yusá, winia apachru Aprajáman tura aparu Isaka Yusri̱ya, Ámechuk chichartakum ‘Ame nuṉkemíin tura ame shuarumiin waketkitia. Túrawakminkia Wi péṉker átinian yáiṉtatjame’ turutchamkum. 10Ame péṉkerumji̱a̱i̱ tura ame waitnenkartutairmiji̱a̱i̱ túraitmena nu, wi yajauch ai̱ṉ Amek túrame. Wikia Jurtan entsan warirnaksha júutsuk antsu aya wái̱rnak ushukruman katiṉmiajai tura yamaikia untsurí aentsun jimiará akankámun takakjai. 11Tuma asamtai winia Yusru, wait aneasam winia yatsur Esauya̱ uwemtikrurta. Aneachma winiaksha nua̱rnaksha uchirnaksha yajauch awajtúrsara̱i̱ṉ tusan ashamajai. 12Warí ame, Yusru, ti paant chichartakum ‘Ame shuarumsha ti núkap nayantsa náikmiri̱ya imianú untsurí átatme’ turutchamkum” tu áujsamiayi.

13Tura Jakup nu kashi Majanáimnium pujus ni warirí̱ya̱n yatsurun susataj tusa íwiaruk 14tusiantu chipiu nuwa̱n tura painti chipiu áishmaṉkan tusiantu murik nuwa̱n painti murik áishmaṉkan, 15traintia kamiyu yama petsakarun uchirtiuk tura kuaraintia waakan tura tias waaka uchich áishmaṉkan tura painti umpuru nuwa̱n tura tias umpuruch áishmaṉnasha irumar yachi̱n Esaun susataj tusa ikiankamiayi. 16Nuya̱ṉka ni takarniúri̱n taṉkun aṉkant aṉkant nú weanak nú weanak akantúkar yaruastarum tusa súsarmiayi. Tura chicharainiak “Átumka árantak yaruasrum éestarum” tímiayi. 17Tura emka akupkámia núnaka Jakup chicharuk “Yatsur Esaú íṉkiuakmeka, ni chichartamuk ‘¿Ame úuntrumsha yait tura tui̱ wéam tura ju̱sha yana taṉkuri̱mpia yarumeam?’ túramkuiṉkia 18‘Úuntur Esauwá, jú̱naka ame takartámin Jakup ántar akuptúrmakarai tura niṉkia ukunam winiawai’ tú titiá” tímiayi. 19Tura chikichniasha akatainiak “Atumsha Esaú íṉkiuakrumsha emka tájana núnisrumek titiarum” tímiayi. 20Kame Jakupka “Winia yatsurun wi ántranak súaj ju̱ja̱i̱ ni kajertukua nuna atsaṉkrachaintjiash tura nuja̱i̱ shiir nawamprukchaintiash” tú enentáimias “ame takartámin Jakupka ukunam winiawai titiarum” tusa akatrámiayi. 21Tura ántar súsatniun eem akupar Jakupka ní shuari̱ji̱a̱i̱ nui̱ṉ kanarmiayi.

22-23Nuyá̱ nú kashi nantaki̱ Jakupsha jimiará nua̱ri̱n núnisaṉ jimiará iniatairi̱n tura aunse uchirí̱n nuyá̱ ashí ni warirí̱n takaruya núurtiuk wajá katitiai Japuk entsanam ikiati̱á̱rmiayi.

Jakup Yusa suntari̱ji̱a̱i̱ mániamu

24Tura Jakupka nui̱ niṉki juákmiayi. Nui̱ áishmaṉja̱i̱ maa mániakua tsawai̱miayi. 25Kame nui̱ maanai pujus nú aishmaṉ Jakupan awakkachmin nekapeak mámiṉkiunam awati múunmamtikiamiayi. 26Nuyá̱ Jakupan chicharuk “Tsawa̱a̱wai, iniaitiusta” tímiayi. Tútaisha Jakup nú aishmaṉkan aya̱k “Péṉker pujutnum yumiṉkrachkumni̱ṉkia peṉké akupkashtatjame” tímiayi. 27Tutai nú aishmaṉsha Jakupan chicharuk “¿Amesha yáitiam?” tutai “Wikia Jakupaitjiai” tú ái̱kmiayi. 28Takui̱ áishmaṉ chicharuk “Yamaikia ámeka Jakupka áchattame, antsu Israer náartin átatme. Warí Yusja̱i̱ tura áentsja̱i̱sha mánaikiam awakmakume” tímiayi. 29Tura Jakupsha aya̱k “¿Náarmesha yait?” tutai “¿Urukamtai Winia naarsha nekaatniusha wakeram?” tímiayi. Nuya̱ṉka Jakupan péṉker pujutnum yumiṉkramiayi. 30Kame Jakup enentáimias winia jí̱ruja̱i̱ṉ Yusan wáinkiachjak túmaitkiuncha tuke iwiaaktsujak tú enentáimias nú nuṉkaṉka Piniir#32:30 Kame Israer chichame̱ja̱i̱ṉkia Piniir támaka “Yusa yapi̱” tawai. anaikiamiayi.

31Tura Jakupsha Piniuirnumia̱ jiinkí̱ weai̱ etsa̱sha jíinmiayi. Tura mámiṉkiunam awatir múunmamtikiamu asa shutuá shutuá ajamiayi. 32Kame Jakup kájke̱nam awatmia asamtai yamaiya̱ ju̱i̱sha Israer shuarka mámiṉkiuri̱n ya̱a̱p nétakna núnaka yucha áiniawai.

Currently Selected:

Naṉ. 32: jiv

Highlight

Copy