Naṉ. 35

Pitirnum Jakupan Yus shiir awajma

1Nuya̱ṉka Yus Jakupan chicharuk “Yamaikia yátsum Esauwai̱ya̱ pisamin Wi wantintiukmiajmena nui̱ Pitirnum weme pujuuta. Túram nui̱ pujusam Winia enentáimtursam kaya irumpram Yus shiir awajkur áestutai̱ najanata” tímiayi. 2Tura Jakupka nuna antuk ni shuari̱n tura niji̱a̱i̱ írutra armia nuna chicharainiak “Átum najanamu yus achíakrumna nuka utsaṉtarum túrarum imiatkírtichu ajasrum atumí entsatái̱ri̱ yapaji̱átarum. 3Pitirnum wárik wéartai. Tura nui̱ Yus áestakur shiir awajtai̱n kayan ekenkar najanattajai. Warí Yuska yaunchu wi itiurchat pujái̱ yaintkia asamtai tura tui̱ wekaimiaj nui̱sha tuke winia nemartin asamtai shiir enentáimtusan najanataj tusan wakerajai” tímiayi. 4Tura nuna takui̱ nisha najankamu yus achíakmancha tura kuishnium aki̱i̱tiai̱ncha júsar Jakupan súsarmiayi. Tura Jakup nuna achik Sekim péprunam tíjiu̱ch ensena numi wajamunam taur ú̱kmiayi. 5Tura Jakupka ni shuari̱ji̱a̱i̱ Pitirnum wénakuisha Yuska nú nuṉkanmaya̱ aents pataatukara̱i̱ṉ tusa sapijmiamtikiarmiayi. Túramu ásar ni shuari̱ji̱a̱i̱ Jakup wéakuisha pataatukcharmiayi.

6Nuyá̱ Jakup tura niji̱a̱i̱ wéarmia nusha Pitir péprunam chíkich náari̱ṉkia Rus tutaiya nui̱ jeawarmiayi. Nuka Kanaannumauyayi. 7Ántsaṉ yaunchu Jakup ni yachi̱ya̱ yajá pisaan Yus nui̱ wantintiukmiayi. Túramu asa nui̱ jeawar Jakupka kayá irumar Yus áestakur shiir awajtai̱n najana taṉkun áesamia nui̱ṉkia Erpitír anaikiamiayi. 8Nui̱sha nuwa̱ Riwikian tsakatmarmia nu, Típura náartin, jakamiayi. Jakamtai Pitirnum jeastatuk uunt numi ensena tutai wajamia nui̱ Típuran iwiarsarmiayi. Túramu asamtai Jakupka nú numin uttai̱ numi tú anaikiamiayi.

9Kame Patanarámnumia̱ waketki̱ támatai ataksha Uunt Yus Jakupan wantintiukmiayi tura shiir awajuk

10“Ámeka Jakup náartiniaitme

tura yamaikia Jakup tunashtatme

antsu Israer náartin átatme”

tímiayi. Nui̱ṉkia Yus Israeran anaikiamiayi. 11Nuyá̱ Yus Jakupan ju̱nasha tímiayi

“Witjiai Ashí Tujintkiachu Yus.

Tuma asan pamparta tájame.

Kame ti pamparam aminí̱ya̱ṉ aents ti untsurí mátsatka ajasártatui.

Túrunawar amé shuarumiiya̱ṉ úunt akupin ártatui.

12Aprajámnasha tura Isaknasha nuṉkan susamaj nunak amincha amaajai

tura ame shuarumnia̱sha súsartatjai” tímiayi Uunt Yus.

13Tura Yus Jakupan chichasua umik wématai 14Jakupsha kayan achik Yus niji̱a̱i̱ chichasmia nui̱ apujamiayi. Tura ukunmasha nu kayan aents wainiak ju̱i̱ Jakup Yusja̱i̱ chichasmiayi tunatí tusa asuitincha tura wíniuncha ukatkamiayi. 15Nuna tura Yus niji̱a̱i̱ nui̱ chichasu asamtai Pitir anaikiamiayi.

Rakir jakamu

16Nuyá̱ Pitirnumia̱nka wéarmiayi. Tura Épratanam jeastatuk ajas Rakirka wáitias uchin takusmiayi. 17Tura tí waitias pujakui uchí takumtikin chicharuk “Ashamkaip chikitcha áishmaṉchik takusume” tímiayi. 18Tura Rakirka peṉké jaak uchí náari̱n Piniuni anaik jakamiayi. Antsu ni aparí̱nkia Piṉjiamín#35:18 Ni chichame̱n Piniuni “wi wáitsamu uchi” tawai. Tura Piṉjiamín támaka “uwejur untsuurua nu uchi” tawai. anaikiamiayi. 19Rakirka nuní̱ túruna jakamtai Éprata jintianmaani̱ iwiarsarmiayi. Éprata támaka Piriṉkiaiti. 20Tura Jakupsha Rakir iwiarsamunam ukunmasha nekaamu atí tusa kayan apujamiayi. Nú kayaka Rakir iwiarsamun yamaiya̱ ju̱i̱sha paant awajeawai.

21Kame Israerka pujusmia nuya̱ṉka jiinkimiayi. Túruna Mikturitír kumpinnium náṉkamasaṉ jutai̱ je̱a̱n je̱a̱mmiayi. 22Tura nú nuṉkanam pujuiniai̱ Ruwinkia ni aparí̱ chíkich nua̱ri̱n Píran yajauch awajtúsmiayi. Tura Israersha ni uchirí̱ túramun nekaamiayi.

Jakupa uchirí̱

Kame Jakupa uchirí̱ṉkia tuse ármiayi. 23Ríai̱ṉkia ju̱na yajutmakmiayi, iwia̱i̱ri̱ṉkia Ruwin nuyá̱ Semiun, Riwí, Jutá, Isakár, tura Sapurún. 24Nuyá̱ Rakirai̱ṉkia ju̱na yajutmakmiayi, Jusé tura Piṉjiamín. 25Núnisaṉ Rakira takarniúri̱n Pirai̱ṉkia̱ ju̱na yajutmakmiayi, Tan tura Neptarí. 26Tura Ría takarniúri̱n Sérpai̱sha ju̱na yajutmakmiayi, Kaat tura Aser. Kame Jakupa uchirí̱sha nu ármiayi. Nú uchikia Patanarámnum akiiniawaruyayi.

Isak jakamu

27Nuyá̱ Aprajámsha Isaksha Mámpriniam yaunchu pujú armia nui̱ Jakupsha ni aparí̱ Isakai̱ wémiayi. Mámprikia Arpa péprunmaya̱ṉka tíjiu̱chiyayi. Arpa támaka Eprunaiti. 28Kame Isakka siantu uchaintia uwí takaku jakamiayi. 29Tí uuntach ajas ni tsawantri̱ jeamtai ni uuntri̱ ayamprarmia nui̱ṉ nisha ayamumiayi. Túrunamtai ni uchirí̱ Esaú Jakupja̱i̱ iwiarsarmiayi.

Currently Selected:

Naṉ. 35: jiv

Highlight

Copy