Naṉ. 31

Jakup Rapanai̱ya̱ pisamu

1Kame Rapana uchirí̱ chichainiak “Jakupka ii aparí̱niun kasamak kuítrintin ajasuíti” tú áujmatman Jakup anturmamkamiayi. 2Tura Rapan yaunchu tí peṉker awajmia nútikiacham Jakupka nuna nekáa, Rapan kajertawai, tú enentáimpramiayi. 3Nui̱ṉkia Uunt Yus Jakupan chicharuk “Ame apáa nuṉke̱ni̱i̱n ame shuarum matsatmanumaṉ waketkitia. Wisha tuke nemarsattajme” tímiayi.

4Nu tutai Jakupsha ni nuwe̱n Rakirnasha tura Ríancha murik matsatna ju̱i̱ winitiárum tusa untsukarmiayi. 5Nui̱ Jakup ni nua̱rí̱ táarmatai chicharainiak “Yamaikia atumí aparí̱ yaunchu winia ti shiir awajtiniuya nútikratsui. Tuma ai̱ṉ winia aparu Yusri̱nkia winí̱ tuke pujuwiti. 6Tura wisha atumí aparí̱n ti péṉker takarsaitiaj nu paant nékarme. 7Túrasha atumí aparí̱ winia anaṉkruaiti túruta akirkatniua nuna yapá yapajtiurkua tias ejenaiti. Túrutaitkiuisha Yuska winia yajauch awajtústinian tsaṉkamprukchaiti. 8Warí atumí aparí̱ ‘Puju apujturma ainia nuja̱i̱ akiktajme’ takui̱ ashí puju apujturma akiiniacharmaka. Áintsaṉ ‘Tsakea nuja̱i̱ akiktajme’ takui̱ tsake akiiniacharmaka. 9Túrasha atumí aparí̱ winia anaṉkrua asamtai Uunt Yus atumí aparí̱niun ataṉkí̱ winiasha suruschamka. 10Nuyá̱ murik achiniáiktin tsawantin áishmaṉ tsake núnisaṉ puju apujturma tura yantsa achiniáinian mesekranam wáinmiajai. 11Tura mesekranmaṉ Yusa suntari̱ winia untsurkui ‘ju̱i̱ pujajai’ timiajai. 12Tutai Yusa suntari̱ chichartak ‘Wats iisiana. Ashí murik achikratainia nuka tsake tura puju apujturma nuyá̱ yantsa áiniawai. Warí Rapan itiurtámkait nuna mash nékajai. 13Pitirnum wantintiukmiajmena nú Yusaitjiai. Nui̱ “Umirkattajme” túrutkum kaya asuitiji̱a̱i̱ ukatkamiame. Wátsek ju̱ya̱ṉka wetá. Túram akiiniamiamna nú nuṉkanam waketkitia’ turutmiayi” tú timiayi Jakup.

14Tura Jakupsha mesekrampramun etserkamtai Rakirsha tura Ríasha chicharainiak “Warí, yamaikia ii aparí̱ íiniun amastinniaka peṉké takurtamkatsji. 15Íksaṉ ii aparí̱nkia chíkich nuwa̱ nuní̱ enentáimturmaji. Tura iin sumarmak takakmasmanumia̱ncha mash amutramkachjik. 16Warí Yus ii aparí̱niun ataṉniua nuka iiniu tura ii uchirí̱niusha ártiniaiti. Kasartamka asakrin Yus túramna nuka tímiatrusmek túrata” tiármiayi Jakupan.

Jakup Patanarámnumia̱ jiinma

17Nuya̱ṉka Jakupsha ni aparí̱ pujumia nui̱ waketkittsa iwiarnarmiayi. Tura ni nua̱ri̱ncha tura uchirí̱ncha kamiyunam ekentrarmiayi. 18Tura ashí ni taṉkurí̱ncha tura Patanarámnum pujus ni takatrí̱ji̱a̱i̱ sumarmia nunasha Kanaannum ni aparí̱ Isak pujuuya nui̱ wénak yaruakmiayi. 19Kame Rapana murikiú ure̱n tsupirtaj tusa wéu ai̱, Rakirka ni aparí̱ je̱e̱n najanamu yus amia nuna kasarak jurukmiayi. 20Nuyá̱ Jakupsha Aram aents Rapanan wéajai tútsuk ikiukin asa anaṉkamiayi. 21Jakupsha ashí warirí̱n takaruya núurtiuk pisarmiayi. Tura Yúpratis entsan katitki̱ Karaat náinniumaani̱ wémiayi.

Rapan Jakupan pataatukma

22Nuyá̱ menaintiú tsawant naṉkaamasu ai̱ Rapanan Jakup pisarmán ujakáram 23ni shuari̱ji̱a̱i̱ Jakupan pataatukmiayi. Tura siati tsawant naṉkaamasai̱ Jakupnaka Karaat nainnium wénan amayá̱ṉmiayi. 24Nu kashi Aramnumia̱ Rapanan mesekranam Yus chicharuk “Anearta, Jakup náṉkamsam chicharkaip” tímiayi.

25Tura Rapanka Jakupan Karaat nainnium jutai̱ je̱a̱n je̱a̱mar pujuinian amayá̱ṉmiayi. Tura Rapanka ni shuari̱ji̱a̱i̱ jutai̱ je̱a̱n nui̱ṉ je̱a̱marmiayi. 26Nuyá̱ nui̱ Rapan Jakupan chicharuk “Warí ¿urukakmea ju̱ni̱sha wekaam tura urukamtai anaṉkruam? Warí winia nawantrusha misatka nutíkkiní̱ ewekátruiniam. 27¿Urukamtai wéajai túruttsuksha u̱mprutkamsha pisarmam? Warí ame wéamun nékaitkiunka wikia namperan najatan tampurja̱i̱sha tura árpaja̱i̱sha waramtiksan akupka̱a̱jme. 28Tura ámeka nawantrusha tura tiraṉkrusha yapiniam mukunam péṉker wetarum títincha tsaṉkatrukchamame. Antsu túruttsuk wáursam wininiaitme. 29Wi atumín yajauch awajsatniun jeatsjak túrasha ju̱ kashi ame apá Yusri̱ chichartak ‘Jakup náṉkamsam chicharkaip’ túrutui. 30Tura ame apáa je̱e̱n tuke waketiatmesha ¿urukamtai winia yúsrusha kasamkam jurutkímiam?” tímiayi.

31Nuya̱ṉka Jakup Rapanan aya̱k “Wikia winia aparuí̱ wéajai tákuiṉkia, nawantrum atantrukiara̱i̱m tusan ashamakun ujakchamjame. 32Tura wiji̱a̱i̱ pujuinia ju̱ ame yúsrumin takakuka mantamnati. Tura ii shuar pujuinia ju̱ iimmiainiamunam paant tájame. Wi áminiun takakkuiṉkia páchitsuk jurumkitia” tímiayi. Túrasha Jakupka ni nuwe̱ Rakir najanamu yus kasamkar júamunka nekaachmiayi. 33Tura Rapancha Jakup pujamunam waya̱miayi. Nuyá̱ Ría pujamunam nuya̱sha chíkich jimiará iniatairi̱ pujuarmia nui̱ waya̱sha peṉké wainkiachmiayi. Tura Ría pujamunmaya̱ jiinkí̱ Rakir pujamunam waya̱miayi. 34Túrasha Rakirka najanamu yusan achik kamiyunam ekemkar pujutai̱niam wakenmaani̱ wéak pujurkauyayi. Túrasha Rapana je̱á̱ e̱a̱ksha peṉké wainkiachmiayi. 35Nuyá̱ Rakir ni aparí̱n chicharuk “Winia uuntru, kajertukaip wajakchattajai. Nuwa̱ti játai̱ya̱ nuja̱i̱ jaajai” tímiayi. Túrasha Rapanka e̱a̱ksha najanamu yusri̱nkia peṉké wainkiachmiayi.

36Nui̱ṉkia Jakup Rapanan kajerak chicharuk “¿Wisha warinia umitmakmaj tura tuit winia tunaarusha, warinma winiasha imiasha pataaturu wekaam? 37Wi takakjana nui̱ṉkia ashí e̱a̱kume. Túramsha ¿warí wainkiam ame je̱e̱min achíakuyamna nusha wainkiamek? Wats ame shuarumsha iimmiainiamunam tura wíniasha wajainiamunam ju̱i̱ matsasiana. Túrawakmin ni chichainiak ‘chij, au jurukmia’ asaṉ taa tiarat. 38Warí wi amiin pujusan painti uwí takakmaschamkaj tura nui̱ murikkisha tura chípiuksha peṉké ashimkicharmai tura uchichinkesha yuruachmajme. 39Tura yajasma yukartin ampirmánkesha itiarchamjame. Antsu nu meṉkakamtaisha wi núnaka akikmiajme. Túramaitiatam káshisha tura tsawai̱sha kasamkarmataisha ámeka akirkata turut wémiame. 40Tura tsawai̱sha séemakun wait wémajai tura káshikia tsetsemaknasha nuyá̱ kí̱arai̱sha wáitmiajai. 41Nuna túran painti uwí ame je̱e̱miinkia pujusuitjiai. Tura ame nawantrumin nuatkartaj tusan katurse uwí pujusmiajai tura ame murikrumin wáinkiuncha sais uwí pujusmiajai tura winia akirkatniusha tuke yapajtiur wémiame. 42Tura Aprajáma Yusri̱, winia aparu Isakan shiir enentáimtusmia nu, wiji̱a̱i̱ pujachkuiṉkia ti nekas aya jú̱nik akuptúka̱a̱me. Túrasha Yuska wi wáitsamurun tura ti kakaram takakmasmiaj nuna nekáa ya̱u̱ kashi ámin kakantramuk ‘Jakup yajauch awajsaip’ turaamai.” Tú timiayi Jakup.

Jakup Rapanja̱i̱ chícham najanamu

43Nuya̱ṉka Rapan Jakupan aya̱k “Nawantur ainia ju̱sha wínia nawantruk áiniawai tura tiraṉkrusha wínia tiraṉkruk áiniawai tura murikiush wínia murikruk áiniawai tura ashí ju̱i̱ ame wáinmena ju̱ka ashí wíniak áiniawai. Nu túmaitkiuisha yamaisha winia nawantruncha tura tiraṉkruncha ¿warí itiurkartajak? 44Tuma asamtai iiji̱a̱i̱ péṉker pujustatji tusar chícham najanatai” tímiayi Rapan.

45Nuna takui̱ ukunmasha nekanami tusa Jakupka kayan achik apujamiayi. 46Tura kayan apuja iniais ni shuari̱n “kaya irutratarum” tutai kayan irutrarmiayi. Tura nú kaya irumpramunmaani̱ yurumáwarmiayi. 47Rapancha ni chichame̱ja̱i̱ Jekar Satuta tu anaikiamiayi tura Jakupsha ni chichame̱ja̱i̱ Karaat anaikiamiayi.

48Tura Rapan chichaak “Jú̱ kaya irumpramu ana ju̱ja̱i̱ ii jímiarti chícham najanamu paant nekamu átatui” tímiayi. Tuma asamtai nuna naari̱ Karaat anaikiamiayi. 49Nu arant Rapancha chichaak “Wainniaiyachkurnisha iin jímiartin Uunt Yus wáitmaktai” tusa nú kaya irumpramun Mispa#31:49 Mispa támaka ni chichame̱ja̱i̱ṉkia “Wáitmaktai̱” tamaiti. anaikiamiayi. 50Nuya̱sha Rapan chichaak “Winia nawantur yajauch awajáiniakmincha tura chíkich nuwa̱ja̱i̱ apatainiakmincha aents ujatainiachkuisha Yuska nekarmattawai” tímiayi. 51Nu arant Rapan Jakupan chicharuk “Íimsakia. Warí jú̱ kaya irumpramu tura kaya apujamusha iiji̱a̱i̱ péṉker chicham najanamu támaiti. 52Nuyá̱ jú̱ kaya irumpramuka tura kaya apujamusha amesha ántsaṉ wisha ju̱yá̱ yajauch awajnáisa̱i̱j tusar naṉkamatnaikiashtatji. Warí itiurchatkesha túruniashtatji tusar kaya apujamuiti. 53Tura ame apachrumin Aprajáma Yusri̱ tura winia apachru Nakura yusri̱sha iin iirmastai tajai” tímiayi. Antsu Jakupka chichaak “Winia apar Isak tikishmátniuya nú Yus nekarma iirmastai tajai” tímiayi. 54Nuya̱ṉka Jakupsha nui̱ṉ nainnium taṉkun maa Yusan áestuamiayi. Tura ni shuari̱ncha yurumáitiarum tusa untsukarmiayi. Tura ashí nui̱ pujuarmia nu yurumáwar nui̱ṉ kanararmiayi.

55Tura Rapancha káshik nantaki̱ ni nawantri̱ncha tura tiraṉki̱ncha yapiniam mukuná shiir awajás ikiuak ni nuṉke̱n waketkimiayi.

Currently Selected:

Naṉ. 31: jiv

Highlight

Copy