Naṉ. 30

1Tura Rakirka uchin takuchu asa ni kain Rían suir enentáimtiniuyayi. Rakirsha Jakupan chicharuk “Winisha yajutmarta. Nuíchuka jakattajai” tímiayi. 2Nuya̱ṉka Jakup Rakir nuní̱ tutai kajerak “¿Warí wisha Yúskaitiaj ámin uchin amatnia? Uchin takuchu awajtámsa nuka Yúskechukait” tímiayi. 3Nu tutai Rakir chichaak “Antsu yamaikia winia iniatai̱r Píraja̱i̱ tsaniṉta tura uchin takustatna nuka winia uchirua áintsaṉ átatui” tímiayi. 4Nuyá̱ Rakir ni iniatairi̱n Píran nuatkat tusa Jakupan susamiayi. 5Túram Pírasha Jakupja̱i̱ tsaniṉ ajapruk uchin takursámiayi. 6Tura Pira takusmatai Rakir chichaak “Ju̱ úchikia Tan anaikiamu atí. Warí wi seamaj nuna Yus anturtukchaik. Tura péṉker awajtak uchi takustinia núnis awajtúsai” tímiayi. 7Tura Píraka Rakira takarniúri̱ ataksha uchin takusmiayi Jakupnan. 8Túramtai Rakir chichaak “Ju̱ úchikia Neptarí anaikiamu atí. Warí wikia uchin takustaj tusan kairja̱i̱ ti kajernaichakaitiaj tura yamaikia nupetkachjak” tímiayi.

9Núnisaṉ Ríasha uchi iniaṉnakman nekaama ni iniatairi̱n Sérpan Jakup nuatkat tusa tsaṉkatkamiayi. 10Tura Ría iniatairi̱ Serpa uchin Jakupnan takusmatai 11Ríaka chichaak “Imiá shiirsha wáinkiajá” tusa uchí náari̱ṉkia Kaat anaikiamiayi. 12Tura Ría iniatairi̱ Sérpaka ataksha uchin Jakupnan takusmiayi. 13Nuya̱ṉka Ría chichaak “Ti waraajai tura yamaikia chíkich nuwa̱sha ‘ti waraawai’ turutiartatui” tusa uchí náari̱ṉkia Aser anaikiamiayi. 14Tura trikiu júuktin tsawantai̱ Ruwin kampunniunam wémiayi. Tura mantrakuran wainiak ni nukurí̱n Rían itiarmiayi. Tura Rakir nuna wainiak mantrakura yuar uchi takutainti tu enentáimias Rían chicharuk “Ame uchiram itiartámainia nu winiasha waitneasam ajamprusta” tímiayi. 15Tutai Ría aya̱k “Warí áishrusha atantrukchamkum. Tura yamaisha uchir numí nere̱n surusáinia nusha ¿atantrúktiaj tamek?” tímiayi. Tura nuní̱ tutai “Uchiram itiartámainia nu surakminkia jú̱ kashi ii aishri̱ ámiji̱a̱i̱ kanartatui” tímiayi.

16Tura Jakup ki̱arai̱ takatnumia̱ winian Ría jintiá iṉkiuṉ chicharuk “Winia uchir numí neré̱ itiartimiun Riwikian susan ikiamsajme. Tuma asamtai jú̱ kashi wiji̱a̱i̱ kanartiniaitme” takui̱ nú kashi Jakupsha Ríaja̱i̱ kanarmiayi. 17Ríaka Yusan seak uchin takustaj timia nuna Yus anturkam Jakupnan ajapruk nú uchiji̱a̱i̱ seṉku takursámiayi. 18Tura Ría chichaak “Winia takarniúrui̱ áishur yajutmarti tusan susa asamtai Yus winiasha jú̱ uchin surusai” tusa Isakár anaikiamiayi.

19Nuyá̱ Ríaka ataksha uchin takusmiayi. Nuja̱i̱ sais uchin Jakupnan takursámiayi. 20Tura nú uchin takus chichaak “Ju̱ péṉkera núnaka Yus surusuiti. Tuma asamtai yamaikia winia áishur shiir awajtústatui. Warí, sais uchin takursachjak” tusa Sapurún anaikiamiayi. 21Nuyá̱ iniaṉnamun nuwa̱chin takusmiayi. Nuna náari̱n Tiinia anaikiamiayi.

22Tura Rakirsha uchin takustaj tusa ataksha Yusan seamiayi. Seam Uunt Yus Rakiran anturkamiayi tura uchi takustinian tsaṉkatkamiayi. 23Kame Rakir iwia̱i̱n takus chichaak “Uchin takaachkun natsant ajauyaj nú natsantrunka Yus emeṉkátrukai” tímiayi. 24Nu arant chichaak “Aya jú̱nakcha antsu chíkich uchincha surusat tusan wakerajai” tinia nu iwiai̱nkia Jusé anaikiamiayi.

Jakup Rapanja̱i̱ anaṉnaiyamu

25Nuya̱ṉka ukunam Rakir Jusen takusmatai Jakup Rapanan chicharuk “Waitneasam winia nuṉkarui̱ waketkitin tsaṉkatrukta. 26Túran winia nua̱rnasha uchirnasha júkiartajai. Warí wi aya̱sartaj tusan takatan ti takakmatsacharmakaj. Núnisnak áminkia tí nukap takarsaitjiamna nuka ti paant nékame” tímiayi. 27Nu tutai Rapan aya̱k “Warí Uunt Yus ame pujakmin ti shiir awajtúsma nuna nekaamjai. Tuma asamtai waitneasam ju̱yá̱ wéakum ikiurkip. Antsu wiji̱a̱i̱ tuke pujusta. 28Kame ¿urutmá akirkai tusamea wakeram? Nuna akiktajme” tímiayi. 29Tutai Jakup aya̱k “Kakaram takakmasan ame taṉkurmin péṉker wainkiamaj nu ti paant nékame. 30Warí wi táachkuiṉkia ame taṉkuram peṉké ishichik takakuyame. Tura wi támatai Uunt Yus shiir yáintmakui taṉkurmesha pamparchaik. Kame wisha yamaikia wíniancha takartumsachminkiaitiaj” tímiayi. 31Takui̱ Rapancha “Enta, ¿urutmá akirkai tusamea wakeram?” tutai Jakup aya̱k “Kame kuítniaka enentáimtatsjai. Antsu títiatjamna nu anturtuktatkumni̱ṉkia murikrumin tuke wáitkiaintjiame. 32Wats yamaik murikrum matsatainia nui̱ wena murik uchich mukusancha tura chipiu tsákencha núnisaṉ puju apujturmancha akantratjai. Nuka winia ártatui. 33Nuna túramtai ukunam ame wi takasa apampárma íistaj tusam winiakum wi péṉker túramu paant nekanattawai. Kame winí̱ murik mukusachu tura chipiu puju apujturchamu tura tsákechu wainkiamka ‘Nuka kasartukma áiniawai’ tíminiaitme” tímiayi. 34Tutai Rapan chichaak “Ee, péṉkeraiti, támena núnismek túrata” tímiayi.

35Nuya̱ṉka Rapan nú tsawantai̱k murik mukusan tura chipiu áishmaṉ puju apujturman tura chipiu nuwa̱ tsake tura puju apujturman irumar akanák ni uchirí̱n iistarum tusa súsarmiayi. 36Tura Rapancha nú taṉkun yaruak menaintiú tsawant jeatainiam wémiayi. Tura Jakupka juak Rapanan chíkich murikrí̱n wáitiuk pujurmiayi. 37Tura Jakupsha enentáimias áramu numí kanawe̱ncha tura armintiur numi kanawe̱ncha tura kastaniu numi kanawe̱ncha tsupir saepe̱n jiuri̱n achintrarmiayi. 38Tura murik entsa áatai̱niam nú numi anu achia̱rman naka aeprurmiayi. Nui̱ muriksha tura chípiusha entsá úmuiniak achiniáikiar pampain ármiayi. 39Nuya̱ṉka uchirí̱ṉkia mukusasha tsákesha tura puju apujturmasha akiinin ármiayi. 40Nui̱ṉkia Jakupka murik uchichinkia akanák tsake matsamia nuní̱ aya̱i̱k matsamiayi. Tura mukusa armia núnaka Rapanauya nuní̱ matsamiayi. Níniuncha tura Rapanancha pachimchamiayi. Nuní̱ túruki̱ Jakupsha ikiauntumkamiayi. 41Tura murik jaeram achiniakuiṉkia entsa umutai̱niam numi pakarman aepru wémiayi. Murik achiniaksha nuna wáinkiarat tusa túrimiayi. 42Tura murik watsaru armia nu winiakuiṉkia numin aepru wéchamiayi. Túramu ásar watsararuka Rapanna ármiayi tura jaeram armia nuka Jakupna ármiayi. 43Kame nuní̱ turamuja̱i̱ Jakup tí kuitrintin ajasmiayi. Túruna muriknasha kamiyuncha umpuruncha núnisaṉ ni iniatairi̱ṉkia áishmaṉsha tura nuwa̱sha ármiayi.

Currently Selected:

Naṉ. 30: jiv

Highlight

Copy