KI 51
51
Na nungi ni angiteniha na tasi#Na ki iana o Tavite, matena na poropete o Natane ki ramonia, renia i gamogamo henia ka Baseba. #
1God, gu takuiê,
suria na takuiha iamu ki goga tarema.
Gu taruhigi vê na tasi iaku,
suria na takuiha iamu ki raha teha.
2Gu tananigi vê na ginoku era hato,
ma ku katoê, be matarotaro
tenia na parongaku era.
3Inê kê ranganiê mareku, vi inê kê tasi.
Inê kê tangahuriê tare renigi na ginoku era.
4Inê kê bani tasi pusigo igo.#Ro 3.4
Inê kê bani katoa na tarana, i era i maamu.
Tahema ki oto tangago, go suriê.
Ki oto tangago, go hagaitangiê.
5Na eraha ki bani tarêhiê, matena gê vora me.
Matena kenaku ki atuingeniê,
na eraha ki tarahuê.
6Igo ko obaniê, vigê tamasi igê na monariha.
Tahema gu mavesia na obaku
renigi na takoha mataha iamu.
7Gu hagapuê, be matarotaro.
Gu tananiê, be siki ahuru.
8Gu hagakoro obaku, be vagevage.
Igo ko bani katoê, kê oba era.
Gu katoê, be obakoro aporo.
9Gu bonotenigi na tasi iaku,
ma ku taruhigi râ na ginoku era.
10Gu katoa na aitangihaku, ke matarotaro,
hanana ve têtê viteamu
ma be tototo surigo.
11Siana ko paiê hura tenigo.
Siana ko tavoa teniê
na maurihamu, go vateê.
12Gu katoê, be vagevagesigo nikâ,
suria go hagatahiê,
ma ko hagaganariê, be tê viteamu.
13Me muri inê be hagesurira na enoni tasi,
hanana ga marupegi na ramata iamu,
ma ka tari surigo aporo.
14Gu hagatahiê tenia na mera,
igo God na tahingaku.
Ma inê kê page vagevage, ma kê agana,
hanana gê tarohenia na otohamu.
15Araha, gu tamaniê be tamasi,
ma be hagarahasigo.
16Igo ko pe obakoro renigi na vogasiha.
Ma inê kê pe hagakoro obamu,
manga ve susu tangago.
17Na vogasiha, i hagakoro obamu,
ngaia ki na tê vitana.
Igo ko pe usitenira na enoni, ga haritagi
ma ka urisi parongata.
18God, gu korokoro tanga i Sione, ma ku tamania.
Gu hagahaorungigi na para i Jerusaleme.
19Ma igami kami page hagakoro obamu,
renia mi vogasigo maninga,
ma kami susu tangago.
Ma igami kami page vogasigo renira na puruka mane,
mi sungira tangago igê na bea ni vogasiha.
Currently Selected:
KI 51: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
