KI 50
50
Na morana na hagarahenga#Na ki iana o Asapa.
1Na Araha God raramohaga hunia ki tamasi.
Ngaia ki hagahakura na enoni hato
tenigi na ara ni agua hato i maveta.
2Ngaia ki hura me tenia i Sione,
tenia na hinua, i bâkoro teha ngavê,
manga na arito i raboa.
3Na God iaka ki pe arâ me munimuni.
Na angihuhuna na gi ki nanago tarana,
ma na roga raha ki arâ rihia.
4Ngaia ki hagatorarerua na vavearo ma na ano,
karu hahutugia, i surira na kariana.
5Ngaia ki vi: “Muru hagahakura me na kariaku koro,
ga bani surua, viga têtê viteaku,
ma ka hagagatagatania renia na vogasiha.”
6Na vavearo ki hagagirarara na enoni
renia vi na suriha iana God
ka koro ma ka oto tare.
7“Kariaku, mu karingê, gê tamasi.
Inê be ranganigamu, Isiraelita.
Inê God nga, na God iami.
8Inê kê pe ramonigamu renigi na vogasiha iami,
suria igamu kamu susu tare tangê.
9Naka ma, ma inê kê pe obanira
na puruka mane tenigi na pena iami,
se na goti tenira na totoha na goti iami.
10Na ara ni marâ hato, ga mauri i bemu, ka na aniku,
ma nikâ na puruka hato igê na rehagaro na hungani.
11Na ara ni manu hato ka na aniku,
ma nikâ na marâ hato, ga mauri igê na bena.
12Manga ve magê,
i asa be nungigamu renigi na ngêra.
Suria na maveta ma na ara ni marâ hato i rarona
ka na aniku.
13Inê kê ngaua vari na hasigona na puruka mane,
se gê tonomia vari na gaputa na goti?
14Mu vogasia God renia na visiha koro,
ma kamu hagamonaria na suruha iami tanga na Araha.
15Mu avarasiê,
matena ga tarahugamu na bagabevoani.
Inê kê page hagatahigamu,
ma igamu kamu page hagarahasiê.”
16Ma God ki vi vikê tangara na enoni, ga pe tê viteana:
“Renia ta mu pasi visigi na ramata iaku,
ma kamu pasi tamasia na suruheri iaku henigamu?
17Igamu kamu usiteniê, vigê hagaotogamu.
Igamu kamu kitenigi na ramata iaku.
18Igamu kamu tari surira tare na enoni hanago,
ma kamu hakunira na enoni, ga gamogamo.
19Igamu kamu tamasi era ma pe oto tare,
ma kamu pe makuku, vigamu hagaparu.
20Igamu kamu tugurira na goami,
ma kamu torahurira.
21Igamu kamu bani katogi na tarani ngegê,
ma inê kê pe visigamu.
Tahema igamu kamu vi ma,
vi inê kê manga igamu.
Ma i ngekê nga inê kê ramonigamu,
ma kê ranganigamu.
22Igamu, mu guguruga, mu karinga,
ma kê tê erasigamu manga na o vasiga,
ma ki asa ta na enoni, vige hagatahigamu.
23Na enoni, ga vogasiê renia na visiha koro,
ngaira ka hagarahasiê.
Na enoni hato, ga têtê viteaku,
inê be hagatahira nga.”
Currently Selected:
KI 50: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
