KI 49
49
Siana ka raruni togo renigi na ruruguha#Na ki iata na raraha iana o Kora.
1Mu karingê, igamu hato!
Mu rongo, igamu na enoni hato i maveta!
2Igamu na enoni raha ma na enoni purua.
Igamu na enoni rurugua,
ma igamu na enoni matareha nikâ.
3Inê be visigi na takoha mataha iaku.
Inê be tamasi igê na giraraha.
4Inê be takusigi na maramarêrava,
ma be ramatenigi,
matena gê tarugia na gita iaku.
5I asa be magu matena na bagabevoani,
matena ga rihiê na merongaku.
6I asa be magutenira na enoni era,
ga raruni togo renigi na ruruguha iata,
ma ka paroparo renigi na nahuninga raha iata.
7I asa ta na enoni, vige vuripusia marena.
Ngaia ki asa, vige vuria tenia God na mêrihana.
8Renia na mena na mêrihana na enoni
ki raha teha ngavê.
Na mena, i girara i vuria renia,
ki mareha ngavê, vige araria.
9Na mena ki pe uhu,
hanana vige hagatahia tenia na kiru,
ma ke katoa, ke mauri tarema.
10Igia hato ka bani girara,
na enoni hato ka page meme.
Ka page meme na ani, ga bagatatako ma ka tugupu,
ma na ani ga tako mataha, nogata.
Ngaira hato ka page panigi so na ruruguha iata
tangara na kareta ma na goata.
11Na anoanota ka na hinua iata tare.
Ngaira ka goga tare i ngekana, ki bê ki arâ,
naka ma ga bani nahunigi na mako i tagua.
12Naka ma na enoni, i rongo raha na atana,
ngaia nikâ ki girara i meme.
Ngaia ki page meme mangara na marâ purua.
13Mu bâsia na tarana, i tarahura na enoni,
ga hagêguri togo renira mareta,
ma ka tare surigi na nahuninga raha iata.
14Na Mera ki page bêngenira tangagi na anoanota,
manga na mane i bâsuri sipi.
Ngaira ka tari oto râ igê na kiru,
ma na gahuata ka hata ni kakaga.
Na agua, ga goga igê na enoni, ga bani me noga,
ki na hinua iata nogata.
Ma na enoni, ga koro ma ka oto,
ka page aharaga igê na mahogotana.
15Ma God ki page hagatahiê nikâ
tenia na raramohana na mera.
16Siana kamu anumanuma,
matena mu bâsia ta na enoni ki ruruguha,
ma na nahuninga iana ka ama ni raharaha nga.
17Ngaia ki asa, vige migirâ henia,
matena i meme.
Na nahuninga raha iana ki asa,
vige râ henia i na kiru.
18I page me nikâ na enoni, i vagevagesia na mêrihana,
naka ma i rongo raha na atana,
renia ga tavoraha koro na tagaraha iana.
19Ngaia ki page hakunira na uvarina,
ga bani me ma ka goga igê na roto hono tarema.
20Naka ma na enoni, i rongo raha na atana,
ngaia nikâ ki girara i meme.
Ngaia ki page meme mangara na marâ purua.
Currently Selected:
KI 49: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
