KI 48
48
Sione, na hinua raha iana God#Na ki iata na raraha iana o Kora.
1Na Araha God iaka ki teha.
Ki tuguhira na enoni hato i hinua iana,
ga rahesia igê na hungana apuna iana.
2Sione, na hungana iana na Araha,#Mt 5.35
ki akê ma ki bâkoro era.
Na hinua raha iana na maneraha, i teha,
ki hagakoro obata na enoni hato i maveta.
3God ki hagabângenia,
vi ngaia ki anumasira na kariana
i raroni na ruma nganganihaga i hinua raha.
4Na maneraha i maveta ka harikato ma ka haku,
hanana viga hagasuhia na Hungana Sione.
5Ma na matena ga rigia Sione,
ngaira ka konekone, ka magu ma ka gava.
6Ngaira ka para ma, ma ka magu ma ka tata,
manga na gete i riki na gerina.
7God ki hatungia na raramohata,
manga na asi ramo i korogi na haka.
8I nago igia ka rongoa ma
na raramohana God na Araha.
Ma i ngekê igia ka kahu bâsia
i hinua raha iana na God iaka.
Na Araha raramohaga hunia
ki page anumasia na hinua raha iana
tare, ki bê ki arâ.
9God, i rarona na Ruma ni Rotu iamu
igami kami takusigo,
go takuigami tare, mareha ki hatohato.
10Na atamu ki rongo raha i maveta hagenani,
ma na enoni hato ka hagarahasigo,
suria ga oto na tauhamu.
11Na enoni i hungana i Sione ka vagevage.
Na enoni surigi na hinua raha i Juta
ka obakoro renigi na suriha oto iamu.
12Kariana God, mu râhia i Sione,
ma kamu tomanigi na bebetehe.
13Mu haharirigi na para ma na ruma nganganihaga,
hanana mu hagagirarara na raraha haoru iami renigi.
14Mu hagarongora ma kamu vivi:
“God ngekê ki na God iaka tare ma tarema.
Ngaia ki page bêngenigia, ki bê ki arâ.”
Currently Selected:
KI 48: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
