KI 44
44
Na nungi ni hetamaniha tenia God#Na vivita iata na raraha iana o Kora.
1God, igami maremami kami bani rongoa,
ma na uvarimami ka bani hagarongogami renia nikâ.
Igê na matena iata i nago kere vê noga
igo ko bani tanugi tangara na tagaraha raha.
2Igo maremu ko paira hura tenigi na mako iata
na enoni, ga pe tongesurigo,
ma ko haganahunira na kariamu renigi.
Igo ko hagaitangira na enoni, ga pe tongesurigo
ma na kariamu ko vatera renia na ramana.
3Na kariamu ka rêgi na mako,
mareha vi surigi na tagaraha iata mareta.
Ngaira ka tehateha,
mareha vi surigi na raramohata mareta.
Ngaira ka tehateha hete
renigi na raramohamu ma na marungamu,
ma suria go tamanira ma ko takuira.
4Igo ki na Araha iaku ma na God iaku.
Igo ko katora ka teha na kariamu.
5Igê na raramohamu
igami kami teharira na merongamami.
6Inê kê pe hagêguri togo renia na epage iaku,
se na tangaruha iaku, vige hagatahiê.
7Ma igo nga hete ko hagatahigami
tenira na merongamami.
Igo ko katora, ka tugupu na ani, ga kitenigami,
suria ga pe teha.
8Igami kami ageage tare renigo
ma kami page hagarahasia tare na atamu.
9Ma i ngekê igo ko bani kasi renigami.
Tahema mi pe teha.
Ma ki hato, vigu bêngenira
na rehagaro na mane ni me iamami.
10Tahema igami kami gavagava tenira na merongamami,
ma ngaira ka raugi na nahuninga iamami.
11Igo ko bani hagamarumungenira na merongamami,
ka nahigami, manga vi igami ka na sipi.
Igo ko bani tokorenigami, kami mamahuara
i pasita na enoni, ga pe tongesurigo.
12Igo ko bani hagavuringenira na kariamu
renia na mena, i sisite,
manga vi ngaira ka na marâ purua.
13Vikê ka guharigami na enoni, mi oga henira.
Ngaira ka rurusigami,
ma ka hagakokohara tangagami.
14Igo ko bani katora na enoni i na agua getegi,
ka tamasi erasigami,
ma ka karikarige bê renigami.
15Inê kê tangahuriê tare,
ma ki makitaga ngavê na apeku.
16Inê kê ruruhi renigi na guhata iata na merongaku
ma renigi na tamasinge ngurunguru
iata na enoni, ga ruhiê.
17Na ara ni tarani ngegê ka tarahugami,
naka ma igami kami pe bonotenigo,
se vigami aharê igê na suruheri iamu.
18Igami kami toto surigo tare,
ma kami pe guguruga igê na ramata iamu.
19Igo ko bani rumakaka renigami,
ma igami kami nagia ve renigo
i guputa na o vasiga.
Igo ko bani panigami
igê na roto hono.
20Manga mi pe rahesigo, God monari,
ma kami hagarapera ma na ataro,
igo ko pe hitenia.
21Renia igo ko giraragi na takotako iamami,
ga pinihi i obamami.
22Suria renigo igo#Ro 8.6.
tahema ga nahuigami tare ma ka nahigami,
manga vi igami ka na sipi.
23Araha, gu rite!
Renia ta go mêru?
Gu aharaga!
Siana ko kasi renigami ngavê!
24Renia ta ko murisigegami?
Gu takusigi na mamasiaganiha iamami
ma na anumanumaha iamami.
25Igami kami vota,
kami gaha renigami i ano,
ma kami abahigi na mamaami.
26Gu hata ni tamanigami!
Gu hagatahigami,
suria go takuigami tare.
Currently Selected:
KI 44: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
