MATEO 7

Siana kamu surira na enoni

(Lk 6.37-38, 41-42)

1“Siana kamu surira na enoni, hanana God ki pe surigamu nogami. 2Renia God ki page surigamu tagenana ma, manga igamu mu surira na enoni. Ma na matena i surigamu, ngaia ki page arâ surigi na tarani, mu katogi, matena mu surira na enoni. 3Tanu hega kanimu boretenia na ahasugana na apinige i maana na goami, ma kamu pe rigia na bogona na apinige i maami maremi? 4Manga i he kani vi mu girara, mu vi tanga na goami, kamu vivi, ‘Me, goaku, be tavoa râ na ahasugana na apinige tenia na maamu,’ matena na bogona na apinige ke oga i maami maremi nogami? 5Mu bagasusuka! Mu raragea râ igê hagenago hete na bogona na apinige tenia na maami maremi, ma hemuri kamu kahu girara, mu bâbâ maninga ma kamu tavoa râ na ahasugana na apinige tenia na maana na goami.

6“Na marâ ga apuna siana kamu kasikasi tangara na o, i era ma ka apariri me ka ngasigamu. Siana kamu kasikasi na haga mora tangara na bo, i era ma ka purigi.

God ki aganarigi na nunginungiha

(Lk 11.9-13)

7“Mu nunginungi ma kanimu tavotavo. Mu bâbâ ma kanimi page tarahu. Mu korekore ma na maa ni ruma ki page tahataha tangagamu. 8Suria na ara ni enoni, i nunginungi, ngaia ki page tavotavo. Ma na enoni, i bâbâ, ngaia ki page tarahu. Ma ki page tahataha na maa ni ruma tanga na enoni, i korekore. 9O ti na hitangimi i vatea na hê tanga o karena matena i nungia na bereti? 10Se mu vatea vari na ma, matena i nungia na siare? 11Henaka vi igamu kamu pe koro, ma igamu kamu girara, mu vatera na karemi na marâ koro. Ma God Vaemami ki teharigamu ngavê ma ki page votogi na marâ koro tangara na enoni, ga nungia.

12“Na ara ni marâ, mu obanira na enoni getera, vi ga tanugi tangagamu, mu tanugi tangara nogami. Na tarana ngekê ki na girarani na Ramata iana o Moise ma na hagesuringa iata na poropete.

Na maa ni ruma i roro

(Lk 13.24)

13“Mu bêbanu nga igê na maa ni ruma, i roro. Suria na maa ni ruma, i raha, ma na tara, i mataku, karu hagataregia tanga na mera, ma ka rako na enoni, ga arâ surirerua. 14Ma na maa ni ruma, i roro, ma na tara, i kere bara, karu hagataregia tanga na mauriha mora, ma ki mareha vi ge rako na enoni, ge tarahua.

Na apinige ma na guana

(Lk 6.43-44)

15“Mu hinarura na poropete hagaparu. I metara ngaira ka bâ mangara na sipi, ma igê na aitangihata ngaira ka mangara na o vasiga, ga garagara. 16Igamu kamu page bâbâgirarara igê na tauhata. Na tone ki asa, vi ge hungu renigi na guani na apinige na vaini, ma na ria ki asa, vi ge hungu renigi na guani na apinige na fiki. 17Na apinige koro ki hunguhungu renigi na guani koro, ma na apinige era ki hunguhungu renigi na guani bera. 18I asa na apinige koro, vi ge hungu renigi na guani bera, ma ki asa na apinige era, vi ge hungu renigi na guani koro. 19Na ara ni apinige, ga pe hunguhungu renigi na guani koro, ka page tapigi ma ka sungigi. 20Hoi, tahema vikana, igamu kamu page bâgirarara na poropete hagaparu renigi na tauhata.

Na tangiana na suriha raha

(Lk 13.25-27)

21“I asa iata, vige banu i pasina God na Araha na enoni hato, ga avarasiê, ka vivi, ‘Araha, Araha’. Ngaira ma hete na enoni, ga katogi na marâ, God Vaemaku i obanigi, kaniga bêbanu i pasina. 22Igê na Tangiana na Suriha Raha ka page rako na enoni, ga avarasiê, ka vivi, ‘Araha, Araha! Igê na raramohamu igami kami tarohenia na taroha iana God! Igê na raramohamu igami kami paira na ataro rako ma kami katogi rako na mena!’ 23Ma inê kê page vi tangara, kê vivi, ‘Inê kê pe hagaregamu. Mu râ vê, igamu na enoni era!’

Na mane garu tora ruma tonganirerua

(Lk 6.47-49)

24“Hoita, vikê na ara ni enoni, ga rongogi na tamasinga iaku ma ka râ surigi, ngaira ka maratorana na mane, i takotako mataha ma ki torea na ruma iana igê na mako pusuga. 25Ki rangi raha. Ka maganu na ve. Ma na roga ki hitaria ramo na ruma ngekana. Ma na ruma ki pe ahoge, suria ngaia ki torea igê na mako pupusuga.

26“Ma na ara ni enoni, ga rongogi na tamasinga iaku ma ka pe râ surigi, ngaira ka maratorana na mane, i bonobonoga ma ki torea na ruma i one. 27Ki rangi raha. Ka maganu na ve. Na roga ki hitaria ramo na ruma ngekana, ma na ruma ki ahoge ma ki era hagetage.”

O Jesu ki na mane ni ramata

28Matena o Jesu ki visigi hato na tarani ngegê, na hakuta na enoni ka konetenia na tarana, i hagesurira igê. 29Ngaia ki pe mangara na mane ni hagesuringa ni rotu i pasita. Ngaia ki hagesuria manga na maneraha ni ramata.

Currently Selected:

MATEO 7: KCB

Highlight

Copy