MATEO 8

O Jesu ki hagamavoa na asiahu

(Mk 1.40-45; Lk 5.12-16)

1O Jesu ki so me tenia na kere hungana, ma na hakuta raha na enoni ka takua. 2Ma na mane asiahu ki râ me tanga, ki susure i maana, ma ki vi: “Araha, manga go obania, ma ko hagamavoê.” 3O Jesu ki gusia na rimana ma ki hataria. Ngaia ki arami, ki vi: “Inê kê obania gê hagamavogo. Gu mavo!” Ki parama, ma na asiahu ki hato tenia na mane. 4Mo Jesu ki vi tanga, ki vi: “Gu rongo! Siana ko hagarongoa ta na enoni renia na tarana ngekê. Ma ko arâ ototo râ nga hete tanga na mane ni vogasiha, ma ko hagabângenigo maremu tanga, ki bâsigo. Ma hemuri ko kahu tagarenia na votovoto iamu, manga i bani visia o Moise, hanana na enoni hato ka girara, vi igo ko mavo.”

O Jesu ki rikia na kariana na maneraha iata na mane ni me i Roma

(Lk 7.1-10)

5Matena o Jesu ki banu i hinua i Kapenamu, ta na maneraha iata na mane ni me i Roma ki râ me vurusia, ma ki avarasia, vi tamania. 6Ngaia ki vi: “Araha, na kariaku, i oga i pasiku, ki maeha ki tâtâ i bea; ma ki bara tanga vi ge arârâ, ma ki hatamia bâraha na mamasiaganiha.” 7O Jesu ki vi: “Inê be râ ma be rikia.” 8Na maneraha iata na mane ni me ki arami, ki vi: “E, siana, Araha! I pe ararigo, vi gu arâ i pasiku. Gu tamasi ma, ma ke komaga na kariaku. 9Inê nikâ na mane, gê oga i ruguhata na araha raha ni me. Ma inê kê nahunira nogaku na mane ni me i ruguhaku. Tahema, inê kê bonasia tani, kê vivi, ‘Gu râ,’ ma ngaia ki arâ. Ma kê bonasia tani, kê vivi, ‘Gu râ me,’ ma ngaia ki arâ me. Menê kê bonasia na kariaku, kê vivi, ‘Gu tagarahia na marâ ikê,’ ma ngaia ki tagarahia.”

10O Jesu ki kone, matena i rongoa, i tamasi vikê. Ma ngaia ki vi tangara na enoni, ga takua, ki vi: “Be vi tangagamu: Inê kê pe tarahua noga ta na enoni i Isiraele, vi ge tongesuri gatagata manga o vani ikê. 11Mu rongo! Na enoni rako ka page arâ me tenia i kerekê ma i kereso, ma ka page merangê o Abaramo mo Isako mo Jakobo i pasina God na Araha. 12Ma ngaira hete na enoni, vi ge banu i pasina God na Araha, ka page kasira hura igê na roto hono. Ma i ngekana ngaira ka page angiangi ma ka page hengaki igê na rivota, suria i aera na obata.” 13O Jesu ki vi tanga na maneraha iata na mane ni me, ki vi: “Gu aporo i pasimu. I page voravora me na marâ, go tongesuria.”

Ma na kariana na maneraha iata na mane ni me ki komaga igê nga na matena ngekana.

O Jesu ki rikira rako na enoni

(Mk 1.29-34; Lk 4.38-41)

14O Jesu ki râ i pasina o Petero. Ma i ngekana ngaia ki bâsia igê ka hungâna o Petero, i maeha. Ngaia ki matoro ki tâtâ i bea. 15O Jesu ki hataria na rimana. Ma ki avogea na matoroha. Ma ngaia ki aharaga ma ki hagamako tanga o Jesu.

16Matena i bungi me, na enoni ka torera me tanga o Jesu rako na enoni, ga atataroga. O Jesu ki paira hura na ataro era tenira renia ma na tamasinga, ma ki rikira na enoni hato, ga maeha. 17Ngaia ki kato vikê, hanana i hagamonaria na tamasinga iana o Isaia na poropete, i bani vi, “Ngaia marena ki toregi vê na maeha iaka urusigia, ma ki hagamahagia igê na mera iaka.”

Manga i he ka amaka suria o Jesu

(Lk 9.57-62)

18Matena o Jesu ki bâsira na hakuta na enoni, ga ogarihia, ngaia ki bonasira na kariana, ki vi: “Ge tarê i na apanena tarê na Rano.” 19Ta na mane ni hagesuringa ni rotu ki râ me tanga o Jesu ma ki vi: “Araha, inê kê nanê, hanana vi gê arâ me henigo na ara ni agua, go arâ igê.” 20O Jesu ki aramia, ki vi: “Na o vasiga ka nahunigi na tahuta, ma na manu ka nahunigi na beata, mo Karena Enoni ki pe nahunia na agua, vi ge tâtâ igê ke mamaro.” 21Ma ta na hitangita na kariana ki vi: “Araha, gu nakê so noga, be bagia o vaemaku.” 22O Jesu ki arami, ki vi: “Gu takuê. Ku nakara vê na enoni, ga me, ke bagira na kariata, ga me.”

O Jesu ki hagapiova na rano

(Mk 4.35-41; Lk 8.22-25)

23O Jesu ki meratage na kariana igê na kere haka. 24Ki parama, ma ki râ me na roga raha ma ki akirokiro na rano, ma na navo ka akêhia na kere haka. Mo Jesu ki bani mêru bore. 25Na kariana ka râ ka hagaritea, ka vi: “Araha, gu hagatahigami! Mi meme noga!” 26O Jesu ki arami, ki vi: “Tanu hega kanimu magu bâraha? Mu pe tongesuri vari?” Ma ngaia ki aharaga, ma ki bonasigi na roga ma na navo, ka so. Ma ki piova ngavê. 27Ngaira hato ka konekone, ma ka vi: “E, vania kini noga? Henaka na roga ma na navo nikâ, ngaira ka tê viteana!”

O Jesu ki rikirerua na mane garu atataroga

(Mk 5.1-20; Lk 8.26-39)

28O Jesu ki ata me igê na mako iata na Ai ni Gatara, i na apanena tarê na rano. Ma i ngekana na mane gi rua karu râ me vurusia. Ngairerua karu hura me tenigi na vaba, ga bêbagi nuni igê. O vani ngegê karu atataroga ma karu ramoramo teha. Ma na enoni ka mamakuku tenirerua, tahema ka magu, vi ge râ i tara i ngekana. 29Ngairerua karu ngere ototo râ, karu vi: “Karena God, na ta ko obania tangagamirua? Go râ me vari, ko hagaitangigamirua? Na matena tanga ki mamênga!”

30Ma hagarangia na agua ngekana na totoha raha ni bo ka suasua igê. 31Na ataro ka nungia o Jesu, ka vi: “Manga go paigami hura, go hagatorangenigami, kami bêbanu i apeta na bo.” 32O Jesu ki vi tangara, ki vi: “Mu râ!” Vikê ngaira ka hura ma ka râ ka banu i apeta na bo. Ma na totoha hagenani ni bo ka tango, ka rere igê na apanena na suragina tanga na rano, ma ka tono ka me igê.

33Na mane, ga bâbâsurira na bo, ka gava ma ka râ i hinua. Ma ngaira ka hagarongora na enoni i hinua ngekana renira na bo ma renirerua na mane, garu atataroga. 34Vikê na enoni hato i hinua ngekana ka râ vurusia o Jesu. Ma na matena ga tarahua, ngaira ka nungia nga, hanana vi arâ tenia na mako iata.

Currently Selected:

MATEO 8: KCB

Highlight

Copy