MATEO 6

Na hagesuringa renia na hetamaniha

1“Mu hinaru, siana kamu katogi mave na marâ, na rotu i bonasigamu renigi, hanana vi na enoni ke bâsigamu. Manga mu katokato vikana, God Vaemami ki asa, vi ge page vurigamu.

2“Vikê, matena mu mahatangenia ta na marâ tanga na enoni matareha, siana kamu mahata suria ma, vi na enoni ke bâsigamu, mangara na enoni, ga katokato vikana igê na ruma ni sukuru ma igê na mahera. Ngaira ka katokato vikana, hanana vi na enoni ka visira raha. Mu rongo! Ngaira ka bani têa na vurita. 3Ma na matena mu komania na enoni matareha, mu katoa hete igê na tarana, hanana siana hagetage ta na enoni ki girara henigamu. 4I koro, kamu katoa pinihi. Ma ngaia ma God Vaemami, i giraragi na marâ, mu katogi pinihi, ngaia kani page vurigamu.

Na hagesuringa renia na nunginungiha

(Lk 11.2-4)

5“Ma na matena mu nunginungi, siana kamu mangara na enoni, ga nunginungi hagaparu. Matena ga nunginungi, ngaira ka obania, vi ga rêra ma ka nunginungi i ruma ni sukuru ma igê na mahera, hanana vi na enoni hato ke bâsira. Mu rongo! Ngaira ka bani têa na vurita. 6Ma na matena mu nunginungi, mu bêbanu hete igê na kiboru iami, ma kamu purusia na maa ni ruma, ma kamu nunginungi tanga God Vaemami, i goga pinihi. Ma ngaia ma God Vaemami, i giraragi na marâ, mu katogi pinihi, ngaia nga kani page vurigamu.

7“Matena mu nunginungi, siana ki rakorako i harami, mangara na enoni, ga pe Siu. Ngaira ka takusia, vi God ki page rongora, suria vi ngaira ka nunginungi borahu. 8Siana kamu mangara ngaira. Naka ma i mênga, vi gamu nungia God Vaemami, ma ngaia ki bani giraragi na marâ, mu obanigi. 9Mu nunginungi vikê hete:

‘God Vaemamami,

igo getego ma ko God.

Gu katora na enoni hato, ke rahesigo.

10Gu marungigami, Araha.

Ke tê viteamu i ano manga ngaira i pasimu.

11Vategami me i rikini na ngêra, i ararigami.

12Gu bonotenigi na tasi iamami,

renia igami kami bani bonotenigi nogamami na eraha,

na enoni ga katogi tangagami.

13Siana ko naka na heuhungiha, ki teharigami.

Ma ko anumasigami hete tenia Satana.

Suria igo ko Araha,

ko raramohaga hunigo,

ma ka visigo raha,

tare ma tarema. Amen.

14“Renia i manga mu bonotenigi na eraha, na enoni getera ga tanugi tangagamu. God Vaemami ki page bonotenigi na eraha iami nogami. 15Ma ki manga mu pe bonotenigi na eraha iata na enoni getera, God Vaemami ki pe bonotenigi na eraha iami nogami.

Na hagesuringa renia na hariharinga

16“Ma na matena mu harihari, siana kamu bâbâ heruruhi mangara na enoni, ga harihari, hanana vi na enoni ke visira raha. Ngaira ka magê, ma ki kukuku na maata, ma ka arârâ, hanana vi na enoni ka girara vi ngaira ka hari. Mu rongo! Ngaira ka bani têa na vurita. 17Matena mu harihari, mu make na maami ma kamu surasura bê, 18hanana na enoni getera ka pe bâbâgiraragamu, vi gamu hari. Na God Vaemami, i goga pinihi, ngaia ma ki page giraragamu. Ma ngaia ma God Vaemami, i giraragi na marâ, mu tanugi pinihi, kani page vurigamu.

Na morani na ruruguha

(Lk 12.33-34)

19“I maveta ikê siana kamu hakugi igê tangagamu maremi na ruruguha, suria ikê i maveta na hasikoko ka erasigi, ma na ruruguha ka kakaga, ma na mane hanago ka hogegi na ruma ma ka hanagogi na ruruguha igê. 20Ma kamu hakugi na ruruguha i pasina God hete, suria i ngekana na hasikoko ki asa, vi ge page erasigi, ma ki asa nikâ, vi ge page kakaga, ma na mane hanago ki asa, vi ge page hogegi na ruma ma ke rurugugi. 21Renia na aitangihami ka barigia na agua, ga tâ igê na ruruguha iami.

Na maana na enoni ki manga na laiti tanga na apena

(Lk 11.34-36)

22“Na maami ka manga na laiti tange na apemi. Manga mu mahata, ki bâ, manga vi na maami ka marava ma na apemi hagenani ka mave bâkoro ngavê. 23Ma ki manga mu maongo, ki bâ, manga vi na maami ka guru ma na apemi hagenani ka roto. Vikê, manga i pe marava na aitangihami, ngaia ki meme, ma ki voravora renia na roto, e, i rotoroto hono ngavê!

God ma na nahuninga

(Lk 16.13; 12.22-31)

24“I asa ta na enoni, vi ge tagara tangarerua na araha gi rua. Manga i katokato vikana, ngaia ki ruhia tani ma ki takuia tani; ngaia ki tari suria tani ma ki kikitenia tani. I asa iami, vi gamu tagara tangarerua God ma na haga.

25“Tahema inê be vi tangagamu: siana kamu tako bâraha renigi na ngêra ma na tonoha, mu obanigi, vi gamu mauri renigi, se renigi na gahu tange na apemi. Na ta ki raha: na ngêra se na maurihami? Se na ta ki raha: na gahu se na apemi? 26Mu bâsira na manu, ga gagaha rârâ. Ngaira ka pe hasihasi. Ngaira ka pe opaopa na ngêra, tanga vi ge bêbagi i ruma ni harisi. God Vaemami kani hagangêra! Na ta ki raha: na manu se igamu? 27O ti na hitangimi ki girara, i hagaborahusia na maurihana renigi na takoha bâraha?

28“Ma renia i hega mu tako renigi na gahu? Mu bâsigi na mahe. Ngaira ka pe tagara ma ka pe tagarahigi na gahu tangara mareta. 29Ma be vi tangagamu: na bâkorohana na anima na mahe ngegê ki teharigi na gahu bâkoro iana o Solomone, naka ma ngaia ki ruruguha ngavê. 30God nga ki hagabâkorogi ma ki marupegi na rauga. Mu girara, na rauga ka mauri i ngekê ma i gomaha ka maugu ma ka sungigi. I hega, mu takusia, vi ngaia ki pe marupegamu ma ki pe hagesurugamu? E, igamu kamu bagahagêguri! 31Vike, siana kamu haganega, kamu takotako bâraha, kamu vivi, ‘Na ta kaniga page ngaugi? Na ta kaniga page tonomigi? I he kaniga page tarahugi igê na gahu?’ 32Na enoni, ga ahuroto, ka bâbâ tare nogata renigi na marâ ngegana. God Vaemami ki girara, vi gamu kamu obanigi na marâ hato ngegana. 33Hoita, i tuguhigamu, vi mu tanugi i nago na obaniha iana God ma kamu têtê viteana. Ma ngaia ki kahu vategamu na ara ni marâ hato getigi, mu obanigi. 34Vikê, siana kamu tako bâraha renia na tangiana i gomaha. Na marâ, ga page takotako bâraha renigi i gomaha, ka tanga mavê nogana i gomaha. Na marâ, mu takotako bâraha renigi i ngekê, ka uhu tanga nogana i ngekê, ma ki pe arari, vi gamu hagatonganigi kê nikâ renigi tani.

Currently Selected:

MATEO 6: KCB

Highlight

Copy