LUKA 6

Na hagatenga renia na Tangiana ni Mamaroha

(Mt 12.1-8; Mk 2.23-28)

1Ta na Tangiana ni Mamaroha o Jesu ki barebare suria na tara i gupuna na mu ni koni. Na kariana ka haganega ka husi na guani na koni, ka nuinuigi i rimata, ma ka ngêgi na maani. 2Tani na Pariseo ka vi: “Tanu hega kanimu katoa igê na Tangiana ni Mamaroha na tarana, na Ramata i na Buka Apuna i manimania?”

3O Jesu ki aramira, ki vi: “I hega? Mu pe bani tomania vari na tamasinga renia na tarana, i katoa o Tavite, matena ngaia ma na me iana ga magê? 4Ngaia ki banu i ruma iana God, ma ki tavogi na bereti, ga nakagi tanga God, ma ki ngêgi, ma ki vatera nikâ na me iana. Henaka na Ramata i na Buka Apuna iaka ki manimania, vi siana na enoni ka ngaugi, nga noga ma na mane ni vogasiha.” 5Mo Jesu ki vi nikâ: “O Karena Enoni ki araha tanga na Tangiana ni Mamaroha nikâ.”

Na mane i tavi na rimana

(Mt 12.9-14; Mk 3.1-6)

6Igê nikâ ta na Tangiana ni Mamaroha o Jesu ki banu i ruma ni sukuru, ma ki hagesurira na enoni. Ma i ngekana ki oga igê ta na mane, i tavi na rimana. 7Tani na Pariseo ma na mane ni hagesuringa ni Rotu ka obania, vi ga ramonia o Jesu, manga vi tanugi ta na tarani ga pe oto. Tahema ngaira ka bore rapurapu renia, hanana vige bâsia, manga vi rikia ta na enoni igê na Tangiana ni Mamaroha. 8Mo Jesu ki bani giraragi na parongata. Ngekana ngaia ki vi tanga na mane, i tavi na rimana, ki vi: “U aharaga ma ku arâ me ikê i maata na enoni.” Na mane ki aharaga ma ki ura i ngekana. 9Mo Jesu ki vi tangara, ki vi: “Be hagategamu! Na ta ki hagamarumungenigi na Ramata iaka i na Buka Apuna tangagia, ga tanugi igê na Tangiana ni Mamaroha? Ka tamanira na enoni, se ga erasira na enoni? Ka hagatahia na mauriha iana na enoni, se ga hagamesia na enoni?” 10Ngaia ki bâ tatare renira ngaira hato, me muri ngaia ki vi tanga na mane, ki vi: “Gu otoa na rimamu.” Ma ngaia ki otoa na rimana, ma na rimana ki koro aporo. 11Ma ngaira ka mangarianga ngavê, ma ka haganega ka hekarigi renigi na katoha iata tanga o Jesu.

O Jesu ki atera na aposotolo tangahuru matarerua

(Mt 10.1-4; Mk 3.13-19)

12Igê na matena ngekana o Jesu ki akê igê na kere hungana, hanana i nunginungi, ma suria na bungiana hagenani ngaia ki oga i ngekana ma ki rahesia God. 13Matena i tangi me, ngaia ki unira me na kariana, ma tenira ngaia ki atera na tangahuru matarerua, ma ki hêtata, vi na aposotolo. 14Ngaia ki atera: o Simone (i hêtana nikâ renia vi o Petero) mo Anterea na vesina, o Jakobo mo Joane, o Pilipo mo Batolomeo, 15o Mateo mo Toma, o Jakobo ngaia ki no karena o Alapeo, mo Simone (ga hêtana renia vi na mane ramo), 16mo Juta ngaia ki no karena o Jakobo, mo Juta Isikariote, va ani i hagavuringenia o Jesu.

O Jesu ki hagesurira ma ki rikira na enoni

(Mt 4.23-25)

17O Jesu ki merarere me tenia na kere hungana, ma ki ura i bena. Ma ka ura i ngekana rako era na kariana. Ma ka oga i ngekana nikâ rako era na enoni, ga râ me tenia i Juta hagenani, ma tenia i Jerusaleme, ma tenirerua na hinua raha i Taire ma i Sitone, igê na tarasini. 18Ngaira ka râ me, hanana vi ga rongoa, ma hanana vi ngaia ki rikira. Na enoni, ga hatamigi na mamasiaganiha renira na ataro era, ka râ me nikâ, ma ngaia ki hagakomagara. 19Na enoni hato ka uhungia, vi ga hataria, hanana vi ga komaga renia na raramohana.

Na vagevageha ma na mamasiaganiha

(Mt 5.1-12)

20O Jesu ki boretenira na kariana ma ki vi:

“Igamu na enoni matareha, mu babarisi,

suria mu obania, vi God ki marungigamu!

21Igamu na enoni, mu magê i ngekê, mu babarisi,

suria mu page masu!

Igamu na enoni, mu angi i ngekê, mu babarisi,

suria mu page ruru.

22“Igamu kamu babarisi, bevoana na enoni ka kitenigamu, ma ka usitenigamu, ma ka guharigamu, ma ka visigamu bera, renia mu tongesuria o Karena Enoni! 23Mu vagevage, matena ga tarahugamu na tarani ngegana, ma kamu mâmâ, suria i koro na obami, renia God ki bani naka noga na vuriha raha tangagamu i pasina. Renia na êvarita ka bani katogi nogata na tarani ngegana tangara na poropete. 24“Ma ki era ngavê tangagamu na enoni

mu ruruguha i ngekê,

suria ga hato noga na ara ni marâ,

ga hagakoro obami! 25I era ngavê tangagamu na enoni, mu masu,

suria igamu kamu page magê!

I era ngavê tangagamu na enoni, mu ruru,

suria mu page angi maramara

ma ki page rugu na obami!

26“I era ngavê tangagamu, bevoana na enoni hato ka visigamu koro, renia na êvarita ka visira koro nogata na poropete ngarangara.

Takuira na merongami

(Mt 5.38-48; 7.12a)

27“Ma be vi tangagamu na enoni, mu karingê: I tuguhigamu, mu takuira na merongami ma kamu komanira na enoni, ga kitenigamu. 28I tuguhigamu, mu visira koro na enoni, ga visigamu bera, ma kamu nunginungi tangara na enoni, ga merongasigamu. 29Manga ta na enoni, ma ki bahitaria na parimu, go naka ki bahitaria nikâ ta parimu. Manga ta na enoni, ma ki torea tenigo na tuguni iamu, go naka, ki torea tenigo nikâ na gahu iamu. 30Manga ta na enoni, ma ki nungia tenigo ta na marâ, i koro, ko vatea. Ma na matena ta na enoni ki torea tenigo ta na marâ iamu, siana ko nungia aporo tenia. 31Mu tanugi tangara na enoni getera na marâ, mu obanira nogami, vi ga tanugi tangagamu.

32“Manga mu takuira ma na enoni, ga takuigamu, tanu hega kanimu obanira, na enoni vige visigamu bâkoro? Henaka vi na enoni era, ngaira ka takuira vikana nikâ na enoni, ga takuira bême! 33Ma ki manga mu komanira ma na enoni, ga komanigamu bême, tanu hega kanimu obanira, na enoni vige visigamu bâkoro? Na enoni era ka katokato vikana nogata. 34Ma ki manga mu hagaba tangara ma na enoni mu takusia, vi ga page barua aporo, tanu hega kanimu obanira na enoni vige visigamu bâkoro? Henaka vi na enoni era, ngaira ka hagaba tangara na enoni era, hanana vi ga tavoa aporo na baruna! 35Mareha vê! I tuguhigamu, mu takuira na merongami ma kamu komanira. I tuguhigamu, mu hagaba, ma siana kamu naasia na baruna. Na vuriha tangagamu ki page raha teha, ma igê na tarana ngekana igamu kamu vora re na karena God, na Araha i teha. Renia ngaia ki komanira na enoni, ga pe visia koro, ma na enoni era. 36I tuguhigamu, mu takuira na enoni, tagenana manga God Vaemami i takuira.

Siana kamu surira na enoni

(Mt 7.1-5)

37“Siana kamu surira na enoni, hanana God ki pe surigamu nogami. Siana kamu tugurira na enoni, hanana God ki pe tugurigamu nogami. Mu bonotenigi na eraha iata na enoni tangagamu, hanana God ki bonotenigi na eraha iami. 38Mu mahata tangara na enoni, ma God ki page mahata tangagamu: igamu kamu page tavoa na apira, i vunu bâkoro, ga bani piringia, ma ka bani kâkâa, ma ki vunu ahaharê, ma ka karangia huria na tuguni, mu roha i rimami. Na tarani mu katora na enoni renigi, God ki page katogamu nogami renigi.”

39Mo Jesu ki tamasi maramaraveta vikê tangara, ki vi: “I asa na mane, i guru, vi ge bêa na tamana, i guru nikâ. Manga i katoa vikana, ngairerua karu page votavota igê na kiru. 40Na kare hagesuri ki pe teharia na mane ni hagesuringa iana. Ma na ara ni kare hagesuri ka page manga na mane ni hagesuringa iata, bevoana ngaira ka hatungia na hagesuri iata.

41Tanu hega kanigo boretenia na marupina na apinige i maana na goamu, ma ko pe rigia na bogona na apinige i maamu so maremu? 42Manga i he kanigo girara, vi go vi tanga na goamu, ko vivi, ‘Me goaku, be tavoa râ na marupina na apinige tenia na maamu,’ ma igo ko pe rigia na bogona na apinige i maamu so maremu? Go bagasusuka! Gu ragea râ hagenago na bogona na apinige tenia na maamu so maremu, ma hemuri ko kahu girara, go bâbâ maninga, ma ko tavoa na marupina na apinige tenia na maana na goamu.

Na apinige ma na guana

(Mt 7.16-20; 12.33-35)

43“I asa na apinige koro, vi ge hungu renigi na guani era. Ma ki asa na apinige era, vi ge hungu renigi na guani koro. 44Na ara ni apinige ka bâbâgirara suria na guana. I asa, vige husigi na guani na apinige na fiki tenigi na tone, se na guani na vaini tenigi na kareagani na apinige kakaruga. 45Na enoni koro ki tavogi hura na marâ koro tenia na korohana i na aitangihana; ma na enoni era ki tavogi hura na marâ era tenia na erahana i na aitangihana. Na enoni ki tamasia na marâ, suria i gonea na aitangihana.

Na mane garu torererua na ruma tonganirerua

(Mt 7.24-27)

46“Tanu hega kanimu hêtaku, kamu vi, ‘Araha, Araha,’ ma kamu pe katogi na marâ, gê visigi tangagamu? 47Na ara ni enoni, i arâ me i pasiku, ma ki rongogi na tamasinga iaku, ma ki arâ surigi, ngaia ki manga ikê, be hagararia tangagamu. 48Ngaia ki manga na mane, i torea na ruma. Ngaia ki opa ki so igê na mako pusuga, ma ki hagêrasigi na u. Ma ki maganu bâraha na ve, ma na âgogo ki takea na ruma, ma ki asa, vi ge ngingia, renia na ruma ki nganganihaga. 49Ma na enoni ki rongogi na tamasinga iaku, ma ki pe râ surigi, ngaia ki manga na mane, i torea na ruma, ma ki pe opa bâkoro tarani na u. Ma na matena na âgogo ki takea na ruma ngekana, na ruma ki ahabogo, ma ki era hagetage ngavê.”

Currently Selected:

LUKA 6: KCB

Highlight

Copy