LUKA 5

O Jesu ki unira hagenago tani na kariana

(Mt 4.18-22; Mk 1.16-20)

1Ta na tangiana o Jesu ki ura i one igê na Rano i Senesarete, matena na enoni ka hepara renia, hanana vi ga rongo na tamasinga iana God. 2Ngaia ki rigirerua na kere haka gi rua, garu goto i one. Na mane hugohugo ka panirerua so, ma ka râ ka tananigi na hugo iata. 3O Jesu ki akê igê tani na kere haka, na anina o Simone, ma ki nungia, ki gusurenia ataha sisite tenia na one. O Jesu ki oga so igê na kere haka, ma ki hagesurira na enoni.

4Matena i tamasi hato, ngaia ki vi tanga o Simone, ki vi: “Gu gusurenia ataha nga i kere taha, ma na tamamu mego kamu kunigi so na hugo iami, hanana mu hugora na siare.” 5O Simone ki arami, ki vi: “Araha, i na bungi hagenani igami kami uhungia bâraha, vi gami hugora na siare, ma ki mareha ngavê. Ma suria go obania, hoi, i koro ma ve kunigi so na hugo.” 6Ngaira ka kunigi so na hugo iata, ma ka hugora rako teha vê na siare, ma na hugo ka haga ni mu renira. 7Ngekana ngaira ka karuhira na tamata igê tani na kere haka, ka râ me ma ka tamanira. Ngaira ka râ me ma ka hagavunusirerua ngavê na kere haka gi rua renigi na siare, ma karu haga ni kokoro renigi. 8Matena o Simone Petero ki bâ vikana, ngaia ki susure i maana o Jesu, ma ki vi: “Araha, râ vê teniê, suria inê ki na mane era!”

9Ngaia ma na enoni hato getera, ga oga henia, ka konekone bâraha, renia ga hugora rako teha ngavê na siare. 10Ma ka konekone bâraha nikâ na tamana o Simone, o Jakobo mo Joane, na karena o Sebeteo. O Jesu ki vi tanga o Simone, ki vi: “Siana ko magu! Haganega tenia i ngekê igo ko page hugora na enoni.” 11Ngaira ka gururerua banu i one na kere haka, ka panigi so na ara ni marâ, ma ka takua o Jesu.

O Jesu ki hagamavoa na mane i asiahu

(Mt 8.1-4: Mk 1.40-45)

12Ta na tangiana o Jesu ki oga i ta na hinua, ma i ngekana ki oga igê ta na mane, i asiahu ngavê. Matena i bâsia o Jesu, ngaia ki susure ki aba so i ano i maana o Jesu, ma ki nungia, ki vi: “Araha, manga go obania, ma ko hagamavoê!”

13O Jesu ki gusia na rimana ma ki hataria, ki vi: “Inê kê obania, gê hagamavogo. U mavo!” Ki parama na asiahu, ma ki hato tenia na mane. 14O Jesu ki hagapêpua, ki vi: “Siana ko hagarongoa rârâ ta na enoni renia na tarana ngekê. Ma ko ototo râ nga hete tanga na mane ni vogasiha, ma ko hagabângenigo maremu tanga, ki bâsigo. Ma hemuri ko tagarenia na vogasiha iamu, manga i bani visia o Moise, hanana na enoni hato ka girara vi igo ko mavo.”

15Ma na rongoha renia o Jesu ki râhigi nga na hinua, ma ka rako era na enoni ga râ me, hanana vi ga rongoa ma ka nungia, ki hagakomagara. 16Ma ngaia ki râ i bemu, hanana i nunginungi igê.

O Jesu ki rikia na mane i meapeape

(Mt 9.1-8; Mk 2.1-12)

17Ta na tangiana, matena o Jesu ki hagesurira na enoni, tani na Pariseo ma na mane ni hagesuringa ni rotu ka oga i ngekana. Ngaira ka râ me tenigi na ara ni hinua i Galilea ma i Jutea ma tenia i Jerusaleme. Igê na raramohana na Araha, o Jesu ki girara i rikira na enoni, ga maeha. 18Tani na mane ka râ me, ma ka tugia na mane, i meapeape, ma ka uhungia, vi ga mebanu i ruma, hanana vi ga naka i maana o Jesu. 19Ma suria ga rako era na enoni, ngekana ki bara tangara, vi ge mebanu. Tahema ngaira ka metagere i gerina na ruma, ma ka tahakurua vato, ma ka kunia so henia na bea i berarogata na enoni i maana o Jesu. 20Matena o Jesu ki bâsia na tongesuriha raha iata, ngaia ki vi tanga na mane, ki vi: “Goaku, na tasi iamu ka bani bonotenigi.”

21Na Pariseo ma na mane ni hagesuringa ni rotu ka haganega ka hehagateri, ka vi: “Vati ngekê, i tamasi erasia God igê na tarana ngekana? I asa ta na enoni, ge girara, vi ge bonotenigi na tasi! Ngaia getea ma God kani girara!”

22O Jesu ki giraragi na parongata, ma ki vi tangara, ki vi: “Tanu hega kanimu takusia na tarana ngekê? 23Na ta kani mataku, vi ga visia. ‘Na tasi iamu ka bani bonotenigi’, se ga vivi, ‘Gu aharaga ma ku râ’? 24Hoita, inê kê hagatanga monari tangagamu, o Karena Enoni ki tonga na raramohana i maveta, hanana i bonotenigi na tasi.” Tahema ngaia ki vi tanga na mane, i meapeape, ki vi: “Be vi tangago: gu ahara, ko tavoa na banamu, ma ko arâ i pasimu.”

25Ki parama na mane, ma ki aharaga i maata na enoni hato, ki tavoa na banana, i tâ igê, ma ki visia raha God, matena i tavoraha i pasina. 26Ngaira hato ka konekone bâraha! Ngaira ka magu ngavê, ma ka visia raha God, ka vi: “I ngekê igami kami kahu bâsigi na marâ raha!”

O Jesu ki atea o Levi

(Mt 9.9-13; Mk 2.13-17)

27Hato vikana, mo Jesu ki hura vê, ma ki bâsia ta na mane, i totora takesi, o Levi na atana. Ngaia ki oga i ruma ni tagaraniha iana. O Jesu ki vi tanga, ki vi: “U takuê!” 28O Levi ki aharaga, ma ki panigi na ara ni marâ hato ma ki takua o Jesu.

29Ma hemuri o Levi ki magoto i ruma iana tanga o Jesu. Ma i ngekana ka oga rako igê na mane, ga totora takesi, ma na enoni getera, ga ngê henirerua. 30Tani na Pariseo ma tani na mane ni hagesuringa ni Rotu, ga Pariseo nikâ, ka tamasi ngurunguru tangara na kariana o Jesu. Ngaira ka hagatera, ka vi: “Tanu hega igamu kanimu ngê ma kamu tono henira na mane ga totora takesi ma na enoni, ga aharê igê na ramata?”

31O Jesu ki aramira, ki vi: “Na enoni, ga apekoro, ka pe naasia na mane mangata, nga noga ma na enoni, ga maeha, kaniga naasia na mane mangata. 32Inê kê pe râ me, be unira na enoni koro, hanana vi ge murisigegi na tasi iata ma ke urusigi na parongata, ma kê râ me hete tangara na enoni era.”

Na hagatenga renia na hariharinga

(Mt 9.14-17; Mk 2.18-22)

33Tani na enoni ka vi tanga o Jesu, ka vi: “Na kariana o Joane ka harihari ma ka nunginungi hagarako, ma na kariata na Pariseo nikâ, ma na kariamu igo ka ngêngê ma, ma ka totono.” 34O Jesu ki arami, ki vi: “Igamu kamu takusia vari, vi igamu kamu girara mu hagaharira na enoni, ga gâga igê nga ngêra na hagataku, matena na mane êragi haoru i gâga henira? I asa vê! 35Ma ki page arâ me na matena, ga page merâ vê igê na mane êragi haoru, ma igê na tangiani ngegana ngaira ka page harihari igê.”

36Mo Jesu ki visia na tamasinga maramaraveta ngekê tangara nikâ ki vi, “I asa ta na enoni, vi ge aba na bani tuguni renia na tarasigana na gahu, i girara i herugirugi. Manga i katoa vikana, ngaia ki tarisia na gahu haoru, ma na tarisigana na gahu haoru, i girara i herugirugi, ki pe araria na bani tuguni. 37Ma nikâ, i asa ta na enoni, vi ge karangia na vaini haoru i rarona na bani anga na gavota na puruka. Manga i katoa vikana, na anga ka page raboa renia na vaini haoru, ma na vaini ki page mea, ma na anga ka page era. 38Naka vê! Na vaini haoru tanga na anga haoru. 39Ma ki mareha ta na enoni, vi ge obania na vaini haoru, matena i bani tonomia na bani vaini. Ngaia ki vi, vi na bani vaini ki koro teharia na ani haoru.”

Currently Selected:

LUKA 5: KCB

Highlight

Copy