LUKA 12

O Jesu ki tamasi pusia na hagaparunga

(Mt 10.26-27)

1Rako na rehagaro na enoni ga haku me ma ka angapopo. Ma o Jesu ki tamasi i nago tangara na kariana, ki vi: “Mu hinarua na isiti iata na Pariseo: ngaia ki na hagaparunga iata. 2Na ara ni marâ, ga aba, ka page gagatenigi. Ma na ara ni marâ, ga pinihi, ka page ranganigi. 3Ngekana na ara ni marâ, mu visigi pinihi igê na bungiana, ka page rongogi igê na tangiana. Ma na ara ni marâ, mu hahanate i karingata na enoni renigi, matena i purupuru na kiboru, ka page ngerehenigi igê na mahera.

Mu magutenia God

(Mt 10.28-31)

4“Bamane, be vi tangagamu: siana kamu magutenira na enoni, ga nahuigi na apemi, ma hemuri ki asa, vi ge katoa ta na marâ, vi ge era teharia na tarana ngekana. 5Inê be visia tangagamu na ani, i tuguhigamu, vi gamu magutenia: mu magutenia God. Ngaia ki girara i nahunahu enoni, ma hemuri ki nahunia na raramohana, i kasira so na enoni igê na agua ni hagaitangiha. Be vi tangagamu nikâ: mu magutenia!

6“Ga hagavuringenira na gapagapêsu gi rima renirerua na kere maana gi rua na haga, iê? Mu bâ, God ki takusira na ara ni hitangita hato. 7Ma nikâ, ngaia ki bani giraragi, vi gi hita na varehu i bêmi. Vikana, siana kamu magu: na memi ki teharigi na meta na gapagapêsu rako era!

Tarohenia o Kirisito i maata na enoni

(Mt 10.32-33; 12.32; 10.19-20)

8“Be vi tangagamu: manga na enoni, ma ki rangania marena i maata na enoni, vi ngaia ki na kariaku, o Karena Enoni ki page rangania nogana na enoni ngekana i maata na angelo iana God, vi ngaia ki na kariana. 9Ma ki manga na enoni, ma ki hagaiga pusia marena i maata na enoni, vi ngaia ki mareha vi na kariaku, o Karena Enoni ki page hagaiga pusia nogana i maata na angelo iana God, vi na enoni ngekana ki mareha vi na kariana.

10“Manga na enoni, ma ki tamasi erasia o Karena Enoni, God ki page bonotenia na tasi iana. Ma ki manga na enoni, ma ki tamasi erasia na Higona Apu, God ki asa, vi ge bonotenia na tasi iana.

11“Matena na enoni ka bugurenigamu, hanana vi ga hagakotigamu i ruma ni sukuru, se i maata na gavumane se i maata na maneraha, siana kamu anumanuma, vi gamu arami bê aporo, se vigamu visigi na teha iami. 12Renia i na matena ngekana na Higona Apu ki page hagatako obami, kamu visigi na marâ i oto.”

Na maramaraveta renia na mane ruruguha i bonobonoga

13Ta na mane i berarogata na enoni ki vi tanga o Jesu, ki vi: “Araha, gu vi tanga o veogaku ke meêtongani na nahuninga, o vaemamamirua i bani vategamirua renigi.” 14O Jesu ki aramia, ki vi: “Se vego! O ti kani ateê, hanana vi gê suria se vige votoa tangagamurua na nahuninga iana o vaemamurua?” 15Ma ngaia ki tamasi nikâ tangara na enoni hato, ki vi: “Bâsigamu ma kamu hinaru, siana kamu hagatage igê na ani mavê na marâ. Renia, suria i naka vi na enoni ma ki nahunigi rako era na marâ, ngaia ki pe nahunia na mêrihana, suria na morana na mêrihana ki teharigi na nahuninga iana.”

16Mo Jesu ki tamasi maramaraveta vikê tangara, ki vi: “I oga ta na mane ruruguha. I koro era na mako iana ma ki aharêsia na ngêra. 17Ngaia ki tako munimuni i obana, ki vi, ‘Na ruma ni harisi iaku ka pe ararigi na ngêra hato iaku. Na ta be katoa?” 18Ngaia ki vi i obana, ki vi, ‘Inê kê girara gê tagarahia ta na marâ. Inê be hogegi na ruma ni harisi iaku, ma be toregi na ani haoru, na ani ga raharaha teharigi, hanana gê bêbagi igê na harisi iaku ma na ara ni nahuninga hato iaku getigi. 19Ma be kahu vi so mareku, be vi: Oi, inê kê babarisi! Inê kê nahunigi na ara ni marâ koro era, ga ararigi na harisi rako era i muri. Be mamaro, be ngêngê ma be totono, ma be magoto tare!’ 20Ma God ki vi tanga, ki vi, ‘Vego, go bonobonoga! Igê na bungiana i ngekê nga igo ko page meme. Ma o ti kani page nahunigi na ara ni marâ, go bani nakagi haku tangago maremu ngegê?’”

21Ma ngekana o Jesu ki vi: “Na tarana ngekê ki tarahura na enoni, ga rurugi na ruruguha ma na nahuninga tangara mareta ma, ma i maana God ngaira ka matareha ngavê.”

Mu hagêguritogo renia God

(Mt 6.25-34)

22Mo Jesu ki tamasi tangara na kariana, ki vi: “Tahema inê kê vi tangagamu: siana kamu tako bâraha renigi na ngêra, mu obanigi, vi gamu mauri renigi, se vi renigi na gahu, mu obanigi tange na apemi. 23Na mêrihami ki raha teharigi na ngêra. Ma na apemi ka raha teharigi na gahu. 24Mu bâsira na manu: ngaira ka pe hasihasi, ma ka pe rurugi na harisi i ruma. Ngaira ka pe nahunigi na ruma ni harisi se vi na ruma ni ngêra. God kani hagangêra! Ma igamu kamu teharira na manu! 25O ti na hitangimi ki girara, i hagaborahusia na mêrihana marena? Henaka i tako bâraha renia, ma ki asa ngavê! 26Suria i bara tangagamu, vi gamu katoa na kere tarana sisite ngekana, tanu hega kanimu tako bâraha renigi na ani getigi na marâ? 27Mu bâsigi na mahe. Ngaigi ki mauri. Ngaigi ka pe tagara, ma ka pe tagarahigi na gahu tangara mareta. Ma be vi tangagamu: na bâkorohana na anima na mahe ngegana ki teharigi na gahu bâkoro iana o Solomone, henaka vi ngaia ki ruruguha ngavê. 28God nga kani hagabâkorogi na rauga ma ki marupegi. Mu girara, na rauga ka mauri i ngekê, ma i gomaha ka maugu ma ka sungigi. Ma ki hega, mu takusia vari, vi ngaia ki pe marupegamu ma ki pe hagesurugamu? E, igamu kamu bagahagêguri!

29“Siana kamu anumanuma, ma siana kamu tugupu renigi, vi na ta kamu ngaugi ma kamu tonomigi. 30(Na enoni i maveta, ga pe tongesuri, ka bâbâ tare nogata renigi na marâ ngegana.) O Vaemami ki girara, vi igamu kamu obanigi na marâ ngegana. 31Hoita, i tuguhigamu, vigamu katoa i nago na obaniha iana God na Araha, ma hemuri ngaia ki kahu vategamu renigi na marâ ngegana.

Na ruruguha i pasina God

(Mt 6.19-21)

32“Henaka igamu kamu pe rako, ma siana kamu magu! Renia o Vaemami ki aganarigamu noga, hanana vi gamu araha henia. 33Mu hagavuringenigi na ara ni nahuninga iami, ma na meni kamu vatera na enoni matareha. I tuguhigamu, mu nahunigi na anga ni haga, ga auga tare, ma kamu rurugi na ruruguha i pasina God, renia i ngekana na ruruguha ki asa vi ge so, suria i ngekana ki asa na mane hanago, vi ge hanagogi, se vi na hasikoko ke erasigi. 34Renia na aitangihami ka barigia na agua, ga tâtâ igê na ruruguha iami.

Mu nananêa na Araha matena i arâ me

35“Mu nananê tare. Mu gahugahu ma kamu hugusigamu maninga. Ma siana ka meme na laiti iami. 36I tuguhigamu, mu mangara na enoni tagara, ga oga karia na araha iata, vi arâ me tenia na ngêra ni hagataku. Matena ngaia ki arâ me ma ki korekore, ngaira ka tangahia ototo râ na maa ni ruma. 37E, na enoni tagara ngekana ka babarisi ngavê, matena na araha iata ki tarahura me, ga bâbâ ma ka nanê! Be vi tangagamu: ngaia ki page hugusia marena, ma ki page vi tangara, ka gâga so ka ngêngê. Ma ngaia ki page totora na ngêra tangara. 38Ngaira ka babarisi ngavê, manga vi ngaia ma ki tarahura, ga nanê, henaka vi ngaia ki hagarihu ata me igê na gupuna bungiana, se igê na matena ga hagarite igê na kua. 39Mu naka i obami na tarana ngekana! Manga na avanu ni ruma, ma ki girara na matena, i page arâ me igê na mane hanago, ngaia ki asa, vi ge hagamarumungenia, ke hogea na ruma iana. 40Ma igamu nikâ, mu nananê, renia o Karena Enoni ki page arâ me igê na matena, igamu kamu pe hinarua, vi ge arâ me igê.”

Na enoni vurivuri na ani koro ma na ani era

(Mt 24.45-51)

41O Petero ki vi: “Araha, igo ko tamasia na maramarata ngekana tangagami igami ma, se tangara na enoni hato?” 42Na Araha ki arami, ki vi: “O ti ki na enoni vurivuri, i takotako mataha, ma na araha iana i hagêguritogo renia? Ngaia ki na ani na araha iana ki hagêguria, ki bâbâsuria na ruma, ma ki titi na ngêra tangara na enoni vurivuri getera igê na matena ni ngêra. 43Ki babarisi ngavê na enoni vurivuri ngekana, manga vi na araha ki atata me, ma ki tarahua, i tanugi na tagaraha iana! 44Hoi, be vi tangagamu: na araha ki page hagêguria na enoni vurivuri ngekana, ki bâbâsurigi na ara ni nahuninga iana. 45Ma ki manga vi na enoni vurivuri ngekana, ma ki vi i obana, ki vivi, ‘Na araha iaku ki hagarihu, vi ge aporo me’, ma ki haganega ki tahurura na enoni vurivuri getera, na mane ma na hehene, ma ngaia ki ngêngê ma ki totono, ki ruguhia ma ki aripo na maana. 46Ma na araha iana ki page arâ me igê na tangiana, na enoni vurivuri akana i pe hinarua, vi arâ me nga igê, se vi igê na matena, i pe girara. Na araha iana ki page kasia hura tenira na kariana God, ma ki page kasia henira na enoni, ga pe tongesuri.

47“Manga na enoni vurivuri, ma ki giraragi na marâ, na araha iana i hagatora renigi, ma ngaia ki pe nanê, vi ge tagara ma ki pe tanugi na marâ, na araha i obanigi, na araha ki page ramoramo gagahia. 48Ma manga na enoni vurivuri ma ki pe giraragi na marâ, na araha iana i obanigi, ma ki tanua ta na marâ, i pe koro, ma na araha ki girara i ramusia renia, na araha iana ki page ramusia râ ma. Na enoni, ga gâga na marâ rako i pasina, ka page nungia renigi rako na marâ. Na enoni, ga gâga na marâ rako era i pasina, ka page nungia renigi rako teha ngavê na marâ.

Na enoni ka heavoavoa so mareta renia o Jesu

(Mt 10.34-36)

49“Inê kê râ me, hanana gê tanga na gi i maveta, ma kê obania bâraha, vi ngaia ke bani tarê! 50I tuguhiê, vigê batesimo renigi na mamasiaganiha, ma kê hataera ngavê, mataro me ki hatohato na batesimo! 51Mu takusia vari, vi inê ke merâ me na marapeha tangara na enoni i maveta? Mareha! Be vi tangagamu: Inê kê pe merâ me na marapeha, ma kê merâ me hete ma na hemerongeana. 52Haganega tenia i ngekê, na enoni gi rima igê na ahemata ka page hemeronge: na vera oru ka merongasirerua na verarua, na verarua karu merongasira na vera oru. 53Na mane ka page merongasira o kareta, ma na ani ngegê ka page merongasira vaemata. Na gete ka page merongasira ka kareta, ma na ani ngegê ka page merongasira kenata, ma ka hehungâta ka hemeronge.”

Mu aitangisigi na girarani na bevoani

(Mt 16.2-3)

54O Jesu ki tamasi nikâ tangara na enoni, ki vi: “Matena mu bâsia na roto igê na apanena na toragina, mu vivi ototo râ, vi, ‘I page rangi,’ ma ki rangirangi. 55Ma na matena i rogasigamu na roga tenia na apanena na gari, igamu kamu vi, vi, ‘i page mahana,’ ma ki mahana. 56Mu bagasusuka! Igamu kamu bâsirerua na ano ma na vavearo, ma igamu kamu bâbâgiraragi na ta tenirerua. Ma ki tanu hega kanimu pe aitangisia na girarana na matena i ngekê?

Mu henakunaku

(Mt 5.25-26)

57“Ma ki tanu hega kanimu pe hagaotoa na berarogami? 58Manga na enoni ma ki aramenia na kotiha, ma ki toregamu igê na tamasinga i koro kamu uhungia nga, kamu hagaotoa na tarana ngekana henia, matena mu arâ vê mênga i tara. Manga i mareha, ngaia ki page tutugurigamu igê na hagatamasinga ma na maneraha igê na hagatamasinga ki page tagarenigamu tanga na mane, i bâsuria na ruma ni hagaitangiha, ma ngaia ki kasigamu igê na ruma ni hagaitangiha. 59Be vi tangagamu: i asa, vi gamu page hura me tenia na ruma ni hagaitangiha, mataro me kamu barubaru hato na ara ni marâ.”

Currently Selected:

LUKA 12: KCB

Highlight

Copy