LUKA 13

Mu murisigegi na tasi

1I na matena ngekana tani na enoni i ngekana ka hagarongoa o Jesu renira na Ai ni Galilea, ka vi, o Pilato ki bani nahuira ka me, matena ngaira ka susu tanga God. 2O Jesu ki aramira ki vi: “Mu takusia vari vi na Ai ni Galilea ngegana ka me vikana, suria vi na tarana ngekana vari ki hagatanga monari renira, vi ngaira ka tasi teharira na enoni hato getera i pasita? 3Mareha! Be vi tangagamu: manga igamu, ma kamu pe murisigegi na tasi iami, igamu hato kamu page meme manga ngaira. 4Ma ki hega na mane tangahuru matarevaru i Siloamo? Ngaira ka me, renia i ahogehurira na bebetehe raha na hê. Mu takusia vari, vi na tarana ngekana ki hagatanga monari vari renira, vi ngaira ka era teharira na enoni hato getera i Jerusalemem? 5Mareha! Be vi tangagamu: manga igamu, ma kamu pe murisigegi na tasi iami, igamu hato kamu page me manga ngaira.”

Na maramaraveta renia na apinige i pe hungu

6Ma o Jesu ki tamasi maramaraveta vikê tangara na enoni, ki vi: “Ta na mane ki bani hasia ta na apinige na fiki i mu na vaini iana. Ngaia ki râ ki bâbâ renigi na guani, ma ki mareha ma koko vê. 7Vikê ngaia ki vi tanga na mane, i bâsuria na mu iana, ki vi, ‘Gu bâ! Surigi na harisi gi oru noga inê kê bâbâ renigi na guani na apinige na fiki, ma ki mareha ma koko vê. Gu tapia so! Tanu hega kani ura hagâbo igê na mako?’ 8Ma na mane, i bâsuria na mu, ki arami, ki vi, ‘Naka mavê, Araha, ke oga suria na harisi gi tage togo râ nikâ. Inê be oparihia ma be kasi ae igê. 9Manga vi ngaia, ma ki hunguhungu i na harisi i muri, ua, i koro era; ma ki manga i mareha, hoi, go kahu tapia so.’”

O Jesu ki hagakomaga na gete igê na Tangiana ni Mamaroha

10Igê ta na Tangiana ni Mamaroha o Jesu ki hagesurira na enoni i ruma ni sukuru. 11Ma i ngekana ki oga igê ta na gete, i atataroga: na ataro era ki hagaape era noga surigi na harisi tangahuru matarevaru. Ngaia ki maroro ma, ma ki asa, vi ge rêra ototo. 12Matena o Jesu ki bâsia, ngaia ki ngiria, ki vi: “Kego, na maeha ki hato tenigo!” 13Ngaia ki têbuhia, ma na gete ki ura ototo râ nga, ma ki visia raha God.

14Na mane, i bâsuria na sukuru, ki mangariaga, renia o Jesu ki hagakomaga na enoni igê na Tangiana ni Mamaroha. Tahema ngaia ki tamasi ramo, ma ki vi tangara na enoni, ki vi: “Na tangiani gi ono ka tuguhigia, viga tagara igê. Vikana ki tuguhigamu, vigamu arâ me igê na tangiani ngegana, hanana ngaia ki hagakomagagamu igê ma siana hagetage vi igê na Tangiana ni Mamaroha.”

15Na Araha ki aramia, ki vi: “Mu bagasusuka! Igamu hato, na ara ni hitangimi, igê na Tangiana ni Mamaroha igamu kamu rupasia na puruka iami se na tonki iami, ma kamu merahura, hanana vi gamu hagatonomia. 16Hoita, bâsia na gete ikê. Ngaia ki na raraha iana o Abarahamo. Ma Satana ki bani rakua surigi noga na harisi tangahuru matarevaru. I hega, i apu vari, vi ge rupasia igê na Tangiana ni Mamaroha?” 17Na aramiha iana ki hagamakira na merongana hato, matena na enoni hato ka vagevage renigi na ara ni mena, i tanugi.

Na maramaraveta renia na guana na suga

(Mt 13.31-32; Mk 4.30-32)

18O Jesu ki vi: “Na Arahanga iana God ki bâ manga i he? Na ta be hagararia renia? 19Ngaia ki manga na guana na suga, na mane ki torea ma ki hasia i mu iana. Na suga ki akê ma ki vora na apinige raha, ma na manu ka beabea igê na arani.”

Na maramaraveta renia na isiti

(Mt 13.33)

20Nikâ o Jesu ki hagate, ki vi: “Na ta be hagararia renia na Arahanga iana God? 21Ngaia ki manga na isiti, na gete ki apea ma ki aroa igê na apira henia na susugu na bereti, ma na susugu hagenani na bereti ki ahunga renia.”

Na maa ni ruma i roro

(Mt 7.13-14, 21-23)

22Igê na râha iana o Jesu tanga i Jerusaleme ngaia ki râhigi na hinua, na ani raha ma na ani sisite, ma ki hagesurira na enoni. 23Ta na enoni ki hagatea, ki vi: “Araha, ta na kere nuni ka tahi vari?”

O Jesu ki aramira, ki vi: 24“Mu uhungia nga kamu bêbanu igê na maa ni ruma, i roro. Be vi tangagamu: renia ga rako na enoni, ga page uhungia, vi ge bêbanu, ma ki asa tangara.

25“Na avanu ni ruma ki page aharaga ma ki purusia na maa ni ruma. Ma na matena mu rêra i metara, kamu korekore ma kamu vivi, ‘Araha, gu tangahia vê na maa ni ruma tangagami!’ Ma ngaia ki page aramigamu, ki vivi, ‘I he kanimu râ me igê? Inê kê pe hagaregamu!’ 26Ma igamu kamu page arami bê aporo, kamu vivi, ‘Igami kami megobêrihu. Ma igo ko hagesurigami i hinua iamami!’ 27Ma ngaia ki page vi tangagamu nikâ, ki vivi, ‘I he kanimu râ me igê? Inê kê pe hagaregamu. Mu râ ve, igamu hato, i era tare na parongami!’ 28I page era ngavê na obami, ma kamu page kurukuru rivo ngavê, matena mu bâsira o Abarahamo, mo Isako, mo Jakobo ma na poropete hato, ga gâga i pasina God na Araha, matena ga purusigamu hura i metara! 29Na enoni ka page arâ me tenigi na ara ni agua i maveta hagenani, ma ka page bêrihu i pasina God na Araha. 30Ma na enoni, ga hagemuri i ngekê, ka page hagenago; ma na enoni, ga hagenago i ngekê, ka page hagemuri.”

O Jesu ki takuira na kare ni Jerusaleme

(Mt 23.37-39)

31Igê na bevoana ngekana tani na Pariseo ka râ me i pasina o Jesu, ma ka vi tanga, ka vi: “Gu hura nga tenia na agua ikê, ma ko arâ i ta na agua getea, renia o Herote ki obania, vi nahuigo.” 32O Jesu ki aramira, ki vi: “Mu râ kamu vi tanga na haku mara pageva, ‘Inê kê paira na ataro era ma kê hagakomagara na enoni i ngekê ma i gomaha, ma i oge gomaha inê kê page hatungigi na tagaraha iaku.’ 33Ma ki tuguhiê, vigê uria na râha iaku i rikini, i gomaha ma i oge gomaha; renia i pe koro, vi na poropete ke meme i na agua mavê, nga noga ma i Jerusaleme.

34“Ewaê, Jerusaleme, Jerusaleme! Igamu kamu nahuira na poropete, igamu kamu arihanunira na mane tora tamasinga, God i hagatorangenira tangagamu. Hagarako inê kê obania, vigê ruigamu hato, manga na kua hehene, i abahira na karena renirerua na gagahana ma igamu kamu pe obaniê, vi ve katogamu vikana. 35Bâ, God ki page rumakaka hagetage renigamu. Be vi tangagamu: i asa, vi gamu page bâsiê, mataro me na matena mu vivi igê, ‘God ki tamania na ani, i râ me igê na raramohana na Araha.’”

Currently Selected:

LUKA 13: KCB

Highlight

Copy