ISAIA 64
64
1Tanu hega, ko pe tangahia na vavearo ku so me?
Ke gisigisi i maamu na hungani!
2Gu râ me manga na gi raramohaga,
i ngatongato igê na ario
ma ki katoa na ve ki agobo.
Gu hagabângenia na raramohamu tangara na merongamu,
hanana ge bubununuga renigo.
3I nago matena go râ me,
igo ko katogi na mena,
ga hagakangigami ma ka hagamagusigami.
Igo ko so me
ma na hungani ka gisigisi i maamu.
4Haganega tenia i nago ki râ me,
mareha vê ta na enoni, vige bâsigi
se vige rongogi rârâ na marâ vigana.
Mareha vê ta na enoni,
vige bâsia na ani ge maratoramu,
suria igo ki na God, go marupera maninga
na ani ga hagêguri togo renigo.
5Igo ko tamanira na ani
ga vagevagesigi na tarani, ga oto,
ma ka râ suria na tara, gu usia tangara.
Igo ko mangariaga tangagami,
ma igami kami ama ni tasitasi nga.
Naka ma igo ko mangariaga bâraha tangagami,
igami kami ama ni tasitasi nga arihu me noga.
Manga i he kami girara vigami tahitahi?
6Igami hato kami erataga ngavê.
Naka ma na parongamami koro
ngaigi nikâ ki makoraga,
manga na gahu i gapugapuga.
Renigi na bagatarihamami,
igami kami mangagi ma ahani na apinige, i mêgu,
i ahegenigi na roga.
7Mareha ta na enoni,
vige nungigo se vige avarasigo.
Igo ko ahi tenigami,
ma ko nakagi na bagaparongamami, ki angarigami.
8Ma igo, Araha, igo ki na vaemamami.
Igami kami manga na mako memera
ma igo ko manga na enoni i tagarahigi.
Igo ko hagavoragami.
9Tahema, Araha, siana ko ama ni mangariaga nga tangagami.
Gu bonotenigi na bagatarihamami.
Igami ka na kariamu.
Gu takuigami!
10Na hinua iamu ka manga na manihê raha.
Jerusaleme ki aruhuruhu ma ki hihiruga.
11Na gi ki ngêa na Ruma ni Rotu iamami,
na ruma apuna i bâkoro ngavê,
na êvarimami ka hagarahasigo igê.
Na ara ni hinua, mi makuanigi, ka aruhuruhu.
12Araha, na marâ hato ngegê ka pe hagamarâ apemu vari?
Igo ko pe gagêmaga vari?
I hega, na mamasiaganiha iamami
ki pe ama ni raharaha nga vari?
Currently Selected:
ISAIA 64: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
