ISAIA 63
63
Na siva iana na Araha
1Ti ki arâ me akana
tenia i hinua i Bosera
i Etome?
Ngaia ki hagesuru bâkoro ngavê.
Na tuguni iana ki rotorotoaga memera.
Ngaia ki tavo uga ma ki bâ hahaneaga.
Inê nga na Araha.
Inê kê tarohenia na tahinga.
Inê kê nahunia na ramoha ni hagatahinga.
2Tanu hega na tuguni iamu ki rotorotoaga memera?
Ngaia ki manga na gahu iana na enoni,
i rusirusi na vaini.
3Inê mareku na Araha kê rusirusi na vaini.
Inê geteê ma; mareha vige tamaniê.
Igê na mangariaganiha iaku
inê kê menamenarira na merongaku hato i maveta.
Inê kê hagamonaria na siva iaku tangara.
Na gaputa ki pisirigi na tuguni ma na gahu iaku.
4Na matena iana na siva iaku tanga!
Inê kê hagatahira na kariaku,
ma kê hagaitangira na merongata.
5Inê kê bâ rârâ, ma kê kone,
suria i mareha ngavê na enoni, vige tamaniê.
Na raramohaku kani tamaniê.
Na mangariaganiha iaku kani hagaramoniê.
Tahema gê teha.
6Igê na mangariaganiha iaku
inê kê pu menamenarira na merongaku i maveta
ma na gaputa ka tata berabera i ano.
Na Araha ki koro tangara na Isiraelita
7Inê be tarohenia na Araha,
suria na takuiha iana ki asa, vige page hato.
Inê be hagarahasia renigi na tauhana tangagia.
Ngaia ki koro ngavê tangara na Isiraelita,
suria ngaia ki makuanira ngavê,
ma na takuiha iana ki asa, vige page hato.
8Na Araha ki vi:
“Ngaira nga ka na kariaku.
Ngaira ki asa vige hagaparuê.”
Tahema ngaia ki hagatahira
9tenigi na mamasiaganiha hato iata.
Mareha suria vi na angero
ma suria hete na Araha ngaia marena i hagatahira.
Ngaia ki hagatahira,
suria hete i takuira ma ki makuanira.
I nago ngaia ki bani marupera me.
10Ma ngaira ka guguruga tanga
ma ka hagaera obana bâraha.
Tahema na Araha ki merongasira
ma ki hagaitangira.
11Ma hemuri na kariana ka takusigi aporo
na tarani, ga vora me i nago kere vê noga,
i na matena iana o Moise na kariana koro.
Ngaira ka hagate, ka vi:
I he nga na Araha, i hagatahira tenia na asi
na kariana henira na maneraha iata?
12I he nga na Araha, i angaria o Moise?
I he nga na Araha, i vatea o Moise renia na ramoha,
hanana i voasia na asi i kokoro
ma ki bêngenira na kariana, ka râ mamata igê?
13I he nga na Araha, i katoa, ki rongo raha vikana na atana?
Na Araha ki bêngenira bâkoro
ma ki asa vige tapasu.
Ngaira ka ramo ni râha
mangara na hosi vasiga igê na masusu.
14I tagenana manga na avanu ni puruka
i hagamamarora igê na bena ni go igê na maruguna,
na Araha nogana ki hagamamarora na kariana.
Ngaia ki bêngenira,
ma ki rongo raha na atana renia.
Na nungi ni avarasiha
15Araha raramohaga hunigo, God Apuna,
bâ me tenia i pasimu, ku takuigami.
I he nga na marupeha iamu tangagami?
I he nga na raramohamu?
I he nga na takuiha iamu tangagami?
I he nga na botageha iamu tangagami?
Siana ko murisigegami!
16Igo nga ki na vaemamami!
O Abaramo mo Jakobo, na êvarimami,
karu bani tako mu renigami.
Igo, Araha, igo nga ki na vaemamami.
Igo ko bani hagatahigami me tare.
17Tanu hega, ko katogami, kami hagatasia na tara,
i tuguhigami, vigami arâ igê?
Tanu hega, ko katogami, kami togeaga,
kami murisigego?
Gu aharigami,
hanana gu tamanigami na kariamu,
na enoni go bani nahunigami me.
18Na merongamami ka bani henahuraugami râ nga,
igami na kariamu, go bani ategami.
Ngaira ka hoge erasia na Ruma ni Rotu iamu.
19Igo ko katogami,
manga vi igo ko pe Araha iamami,
ma manga vi igami kami mareha vi na kariamu.
Currently Selected:
ISAIA 63: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
