2 ESETARASE 6
6
1Ngaia ki vi tangê, ki vi: “Inê kê bani kato me vikana i nago tarana gê hagavora na maveta: hagenago tarani ga ura na maani na maveta: i nago tarana gê hakugi na roga ka rogaroga; 2i nago tarana na marangeia i sisiki, se na gugusuhia i ngurunguru; i nago tarana gê nakagi na peregana na Paratiso 3se na mahe bâkoro ga vora me; i nago tarana gê hagavoragi na ramoha tangagi na higu, hanana ga arâ se gê hagahakura na bera na angero; 4i nago tarana gê rurugi haku na rogaroga se gê hagatanigi na atani na apaneni hegitigi na vavearo; i nago tarana gê atea na hungana i Sione ki vora na pupu ni uga iaku, 5i nago tarana gê naka na katoha tange i ngegê, se gê usitenigi na katoha iata na enoni tasi se gê segera renia na giraraha na enoni ga marupegi na ramata ma ka nakanaka râ na marâ koro tangara mareta tanga i muri me, suria ga totosuriê. 6I nago tarani ngegana, inê kê bani kato me, vi inê, ma inê geteê ma, kê page hagahatungia na maveta, suria inê, ma inê geteê ma, kê hagavora.”
7Ma inê kê hagate, kê vi: “I borahu manga i he ka na matena i berarogaterua na mateni hehegitigi? I na keta kani page hato igê na matena hagenago ma ki page haganega igê na ruata na matena me nikâ?”
8Ngaia ki arami, ki vi: “I borahu manga na matena i berarogaterua o Abarahamo ma o Abarahamo. Ngaia ki no viraterua o Jakobo mo Esau. Matena garu vora, o Jakobo ki here i popogani na ugana o Esau. 9Na tarana ngekê ki vi, vi o Esau ki na hatongina na mateni i ngegê ma o Jakobo ki na haganegahana na matena haoru. 10Hoita, manga vi na rimana o Jakobo ka na haganegahana ma na popogani ugana o Esau ka na hatongina, siana ko uhungia vigo garia na matora i berarogaterua.”
Na girarana na hatongina na maveta
11Inê kê vi: “Araha God, gu aganaria na nungiha iaku. 12I ta na bungiana igo ko bani hagabâsiê renigi tani na girarana na hatongina na maveta. Hoi, gu hagabâsiê renigi na ani getigi nikâ.”
13Ngaia ki vi: “Gu aharaga. Igo ko page rongoa na ringe i rongo raha. 14Manga na agua go ura igê ma ki angingi ngavê, 15matena i tamasi na ringe, siana ko magu. Ngaia ki tamasia na hatongina na maveta ma na gatana na maveta ka page girara, 16vi na ringe ki tamasigi. Ngaira ka page angingi ma ka page gisigisi, suria ngaira ka page girara, vi ngaira ka pe tâ nga manga i nago igê na matena na hatongina.”
17Matena i tamasi vikana, inê kê aharaga ma kê karinga. Inê kê rongoa na ringe i rongo manga na ve i ao ngavê. 18Na ringe ki vi: “I hagarangi me noga na matena inê kê page arâ me kê surira na enoni ga oga i maveta. 19Inê be hagaitangira na ani ga katora bera na enoni getera ma ka hagamamasiagara. Na makiha iana i Jerusaleme ki page hato. 20Na mateni i ngegê, ga sugi hato ngegê, ka page tonga na girarana na hatongina. Inê be nakagi na girarana na hatongina. Ngaigi kani igê. Inê be gasigi na buka i vavearo, i ta bogona tanga i ta bogona, hanana ngaira hato ka girara ka bâsigi. 21Na kere kare, i tonga na harisi gi tage iata, ka page tamasi. Na gete, ga obara, ka page apara i murini na hageha gi oru se ge he ma. Ma na kareta ngegana ka page mauri ma ka arârâ. 22Na mu ga bani hasigi, ka page parama ma ka magahuru na marâ ga hasigi igê. Na ruma ni ngêra ka page parama ma ka baguru. 23Hemuri na ahuri ki page angiangi ma na enoni hato ga rongoa, ka page anumanuma ngavê. 24Na enoni ga bani hekorokoro me, ka page hemerongeheri, ma na enoni hato i maveta ka page bubununuga ngavê. Na ve ka page hato vige gogogo ma ka page tâ tonge suria na heta na apanena na tangiana.
25Na enoni ga mauri mêngara i murini na tarani hato gê bani visigi ngegana, inê kê page hagatahira, matena gê hagahatungia igê na maveta, gê bani hagavora. 26Ngaira ka page bâsira na mane, ga pe bani me rârâ ma ka bani akê mamêrigata i pasiku. Na aitangihata ma na takoha iata na enoni i maveta ka page tora getigi tenia i nago. 27Na eraha ma na hagahagaparunga karu page hato. 28Na tongesuriha ki page nganganihaga. Na aharêngiani na ramata ma na hagabekasiana karu page hato. Na monariha, i pe bani hungu me arihu, ki page akê me bâkoro nikâ.”
29Matena i tamasi na ringe, na ano gê ura igê, ki haganega ki angingi. 30Hemuri na angero ki vi tangê, ki vivi: “Ngegana nga na marâ gê râ me gê hagabâsigo renigi i na bungi ngegana. 31Hoi, manga vi igo ma ko page nunginungi ma ko page harihari surigi na tangiani gi pi nikâ, inê kê page aporo me ma kê page hagarongogo renigi na tarani ga raha akê nikâ, 32suria God raramohaga hunia ki bani aganaria na nunginungiha iamu. God raramohaga hunia ki bani bâsia, vi na ogaha iamu tenia na matena go sisite mataro me i ngekê, ngaia ki matarotaro ma ki oto i maana. 33Tahema ngaia ki hagatorangeniê me kê hagabâsigo renigi na tarani hato ngegana ma kê hagarongogo, vi siana ko magu, ma ko hagêguritogo renia God hete. 34Siana ko hatani hagate purupuru i na matena ngegê nga. Manga ngekana igo ki asa vigu page kato vikana igê na matena na hagahatongina.”
NA ORUTA NA MARUTEHA
Tanu hega na kariana God kaniga mamasiaga
35I murina ngekana inê kê angi ma kê hari surigi na tangiana gi pi me nikâ manga i nago. Ngekana inê kê hatungigi na wiki gi oru gê hari surigi, manga i bani vi tangê na angero. 36Igê na varuta na bungiana inê kê anumanuma bâraha nikâ. Inê kê haganega kê tamasi tanga God raramohaga hunia. 37Inê kê tako bâraha ngavê ma na aitangihaku ki pe tâ haritagi. 38Henaka, ma inê kê vi: “Araha, matena go hagavorara na ara ni marâ hato, igo ko tamasi ma. Igê na tangiana hagenago igo ko haribona, ko vi, ‘Ge vora me na ara ni marâ hato’, ma na tamasinga iamu ki râ suria na bonasiha iamu. 39I na matena ngekana na rogarogana na tamasinga iamu ki rârâ. Na mengo ma na puruguniha karu buhigi na ara ni marâ hato. Na ringena na enoni ki mamênga. 40Hemuri, igo ko bonasia na marara ki mave hura me tenia na kiboru i oga igê, hanana ga oga mave na tagaraha iamu. 41Igê na ruata na tangiana igo ko hagavora na angero ni vavearo, ma ko bonasia, ki voasia na ve, hanana ta agua ki akê i avorana na vavearo ma ta agua ki oga i ano. 42Igê na oruta na tangiana igo ko bonasia na ve i anuia na maveta, ki oga haku igê na agua gi tage ma ki anuia ma na pita na apanena na basina na maveta. Hemuri igo ko hagamamatarigi na apaneni gi ono na basina na maveta, ka vora re na mako mamata tange na ngêra ma na hasinga ma tangagi na katoha go takusigi tange. 43Na tamasinga iamu ki râ ma ki hagahatongia ototo râ nga na tagaraha. 44Na ani mavê na apinige ni ngauha ka rasirasi ototo râ nga ma ka akê na ani mavê na ngêra nogani. Tani ka ararigi tani na marotaniha ma tani ka ararigi tani. Tani na mahe ka sigini koro ngavê na vanuhani ma ka bâkoro ngavê. Na marâ ngegana ka vora me igê na oruta na tangiana. 45Igê na heta na tangiana igo ko haribona, ma ka vora me na arito i mave, na mavetana na maveta ma na higu igê na atohani. 46Igo ko bonasigi ka page tamanira na enoni, go sugi hagavorara. 47Igê na rimata na tangiana igo ko bonasia na apanena na maveta, na ve i anuia, hanana i hagavorara na manu ma na siare. 48Suria na bonasiha iamu na ve, i tâ tone ma ki baguru, ki hagavorara na marâ ga mauri, hanana na enoni i maveta ke torahenigi na tagaraha iamu. 49Hemuri igo ko tavorerua hura na ani gi rua na marâ mamauri. Igo ko hêtana tani vi Behemote ma tani vi Leviatane. 50Igo ko voasirerua hegitigi, suria na asi ki pe raha hanana vige ararirerua. 51Igo ko naka Behemote ki oga igê na apanena na maveta go bani katoa ki mamata igê na oruta na tangiana ni hagavoraha. Ngaia ki na apanena na maveta ni rehagaro ni hungani. 52Igo ko naka o Leviatane ki oga i asi. Igo ko marupererua karu mauri, hanana vi na kariamu hetakui ka magoto renirerua igê na matena go naka tanga. 53Igê na onota na tangiana igo ko bonasia na maveta, ki hagavorara na marâ mamauri, na ani ga manata ma na ani ga vasiga, na ani raha ma na ani sisite. 54Ma ta na marâ i raha teharira na marâ hato ngegana, igo ko hagavora o Atama, ma ko kasia ki bâsurira na ara ni marâ hato, go bani hagavorara. Ma igami hato na enoni, go bani ategami, igami ka na raraha iana.
55Araha, inê kê hagarongogo renigi na marâ hato ngegana, suria go bani vi, vi igo ko hagavora na ani hagenago na maveta tangara na kariamu. 56Igo ko bani vi, vi na enoni hato getera na raraha iana o Atama nogata, ka na marâ purua ma manga na êsusuna na ve se na kere musu, henaka viga rako teha ngavê. 57Hoita, Araha, ma i ngekê na enoni ngegana, na marâ purua ma, kaniga marungigami ma ka mutegami. 58Igami nga ka na kariamu, ma igo ko bani visigami vi na bêbê ni kare iamu, o karemu gi tage togo na ani i tarohenigo, na ani go takuia, ma ku bâ, igami kami oga i rimata na enoni ngegana. 59Manga vi i monari, vi igo ko hagavora na maveta ikê tangagami na kariamu, tanu hega kanigami pe nahunia? I na keta kanimi page nahunia? Mi naasia taraha?”
Currently Selected:
2 ESETARASE 6: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific