2 ESETARASE 7
7
1Matena gê tamasi hato, na angero, God i bani hagatorangenia me igê na ani ga hato na bungiani, ngaia ki vora me nikâ. 2Ngaia ki vi: “O Esera, gu aharaga ma ku karinga na marâ gê râ me hanana vigê hagarongogo renia.”
3Inê kê vi: “Hoita, angero!”
Ngaia ki vi: “Takusia na asi i kokoro, ki aberabera ma ki raha teha ngavê, 4ma na maanitava tanga ki roro manga na ve. 5Manga na enoni ma ki obania, vi ataha i asi ngekana, hanana vige bâsia se vige nahunia, ngaia ki asa iana vige ata igê na ve aberabera ma ki raha ngavê, manga vi i pe taratara rârâ igê na maanitava i roro. 6Tani nikâ na hagararinga. Takusia na hinua raha igê na bena. Na hinua ngekana ki vunu renigi na ani mavê na marâ koro, 7ma na teha tanga ki roro ma ki urahu. I ta na apanena ki tarê igê na gi ma i ta na apanena ki oga igê na ve i kokoro ngavê. 8Na teha ki gi tage togo ma, ma ki oga i berarogaterua na gi ma na ve. Ngaia ki roro ngavê ma ki araria ma na vere tage na enoni i taratara râ igê. 9Manga vige vatea na hinua ngekana tanga na enoni, ngaia na enoni ngekana ki asa vige nahunia, manga vi ngaia ma ki pe taratara râ igê na teha i hagamamakuku.”
10Inê kê vi: “Go vi koro, angero.”
Na angero ki vi: “I tagenana ma tangara na Isiraelita. 11Inê kê hagavora na maveta ngekê tangara ngaira, ma na matena o Atama ki aharêngigi na ramata iaku, inê kê suria na maveta. 12Inê kê katogi na teha tanga na maveta ikê ka rororo ma ka hagagara era vige arâ igê. Ngaigi ka sutasutaga, ka hagamamaguraga ma ka pe rakorako. 13Ma ngaigi na teha tanga na maveta raha i page arâ me, ka page aberabera, ka pe hagamamaguraga ma ka page râ tanga na mêriha i gâga tarema. 14Na enoni hato ga mauri ki tuguhira, viga arâ surigi na teha ni maveta i hemuri me. 15Hoi, o Esera, tanu hega kanigo obaera ma ko anumanuma, suria go girara go meme ma ki tuguhigo vigo meme? 16Tanu hega kanigo pe takusia hete na matena i page arâ me. Siana ko takusia na matena i ngegê!”
17Inê kê arami, kê vi: “Araha God, igê na buka ni ramata iamu, igo ko vi, vi na enoni ga toto surigo ka page nahunigi na marâ koro hato ngegana ma na enoni erataga ka page meme. 18Ngekana na enoni ga toto surigo, ka girara ga teharigi na mamasiaganiha igê na teha i roro ngekana, suria ngaira ka naasia na mêriha i hemuri me, i aberabera ma ki hatahata, ma na enoni erataga ki tuguhira, viga taratara igê na teha i roro ma ki bara tangara vige bâsia na mêriha i aberabera ma ki hatahata.”
19Na angero ki arami, ki vi: “Go takusia vari vi na suriha iamu ki koro teharia na anina God? Go takusia vari, vi igo ko tako mataha teharia God raramohaga hunia? 20I araria viga meme rako na enoni i na mateni i arâ ngegana, suria i era ma ka aharêngigi na ramata, God i bani nakagi tangara. 21God ki bani nakagi mave na girarani na ramata iana tangara na ara ni enoni hato ga voravora me i maveta ikê, ma na ramata ngegana ka hagarongora na enoni renigi na tarani ga tuguhira, hanana ga page nahunia na mêriha ma ki mareha vi na hagaitangiha. 22Ma na enoni erataga ka guguruga tanga God ma ka usi vige tê viteana. Ngaira ka bekabekaga. 23Tahema ngaira ka katogi na anita mareta na katoha ni eraha ma ni hagabekasiha. Ngaira ka hagaiga God raramohaga hunia vi goga ma ka usitenigi na katoha iana. 24Ngaira ka kitenigi na ramata iana, ka pe aganarigi na suruha iana, ka haritohegigi na tamasinga iana ma ka pe râ surigi na bonasiha iana. 25Tahema o Esera, na baguruha tangara na ani ga baguru ma na vunuha tangara na ani ga vunu.”
Na suriha raha
26Na angero ki vi: “I râ me noga na matena ga page akê me igê na tarani ngegê. Na hinua i pinihi ki page oga tatara ma na marê i pinihi ki page oga mave. 27Na enoni ga pe me igê na bagabevoani gê bani visigi, ngaira ka page bâsigi nikâ na marâ raha, gê page tanugi. 28O kareku na Mesaia ki page vora mave me henira na ani ga takua. Ngaia ki page haganahunira na enoni hato ngegana ga tahi, renia na vagevageha, i gâga surigi na harisi tangarê ge he. 29I murina ngekana o kareku na Mesaia ma na enoni hato ka page meme. 30Na maveta ki page mamanguaga aporo manga i nago. Surigi na tangiani gi pi ngaia ki page aporo manga igê na haganegahana. I mareha rârâ ta na enoni vige tahitahi. 31I murini na tangiani gi pi na matena erataga ngegê ka page hatohato ngavê ma na mateni haoru ka haganega ka akê me. 32Na mako ki page nakara ka huhura na enoni ga bani me ma ka mauru purunguniaga igê, ma na atarota na enoni ga bani me ka page hura me tenigi na agua ga oga igê. 33God raramohaga hunia ki page voravora me igê na atohana ni suriha. Na takiha ma na pirigiapeha karu page hato ngavê. 34Na suriha ki page urusirerua. Na monariha ma na totosuriha karu page nganganihaga nga aporo. 35Na parongata koro ma na bagatauhata na enoni ka page rangaranga mave. Na enoni koro ka page taugi na meta koro ototo râ nga, ma na hagaitangiha ki tangara na enoni era. 36Na kokoro ni mamasiaganiha ma na gi na agua ni hagaitangiha karu page vora me, ma i na apaneterua râ ki page vora na Paratiso ni vagevageha ma ni mamaroha.
37Hemuri God raramohaga hunia ki page tamasi tangara na enoni hato, i bani hagamaurira aporo, ki vivi: “Bâ, inê nga nga na ani mu bani hagaigê ma kamu usi vigamu tê viteaku. Na ramata iaku nga igamu kamu usitenigi. 38Mu bâ rârâ. I ta na apanena na vagevageha ma na marapeha, ma i ta na apanena na gi ma na mamasiaganiha.’ Ngaigi nga nga na tamasinga iana igê na tangiana ni suriha raha.
39Igê na tangiana ni suriha raha ka mareha rârâ igê na arito, na hageha, na higu, 40na vaha, na gugusuhia se vi na marangeia; ka mareha rârâ igê na roga, na ve se vi na mamava; ka meraha rârâ igê na mengo, na manurahi se vi na mavoraro; 41ka mareha rârâ igê na arito ru, na hagahisi se vi na rogaroga ahuru; ka mareha rârâ igê na bababa, na anumaganiha se vi na maratoha; ka mareha rârâ igê na hêni na rangi, na rangi se vi na korupu; 42ka mareha rârâ igê na ritovagana, na bungiana se vi na mahogotana; ka mareha rârâ igê na mavetana na tangiana, na togotogana se vi na marara. Na marara gi tage ma ki page oga. Ngaia ka na mavetana raha ngavê God raramohaga hunia, na enoni hato ga bâsia. 43Na suriha raha ki page surigi na harisi gi pi. 44Nga hanana gê bani naka tanga na tangiana ni suriha raha ngekana ma kê bani hagarongogo renigi igo getego ma.”
Ta kereani ma ka page tahi
45Hoi, inê kê vi: “Araha, inê kê visigi aporo na marâ gê bani visigi i nago. E, ga babarisi ngavê na enoni ga oga i ngekê ma ka marupegi na ramata iamu! 46Ma tangara na enoni gê bani nungigo tangara, ka hega? I berarogata na enoni ga oga i ngekê ki mareha rârâ tani vige pe tasi se vige pe aharêngia na suruheri iamu. 47Hoi, i ngekê inê kê rongogirara, vi na maveta haoru i muri me ki page vatea na vagevageha tangara tani ma, ma na mamasiaganiha tangara na ani rako. 48Na teniha era igê na aitangihamami ki bani akê me raha ma ki bani hagaharogami tenigi na obaniha iana God, ki bani hagaerasigami ngavê, ki bani bêngenigami suria na tara tangarerua na mera ma na magahurunga. Ngekana igami kami hagatê ngavê tenia na mêriha mora. Na teniha era ngekana ki pe hagaerasira ta kereani ma na enoni hato hete. God ki bani hagavorara me, nga noga ma tani.”
49Na angero ki vi: “Gu karingê. Inê be hagesurigo nikâ ma be hagaotoa na takotako iamu. 50Suria ta kereani ma kaniga page tahi, tahema God ki hagavorarerua na maveta gi rua, mareha vi na ani gi tage ma. 51Igo ko bani vi, vi ta kereani ma na enoni kaniga hagakoro obana God, ma na enoni erataga kaniga rako teha ngavê. Bâ! 52Manga go nahunigi ta kereani ma na hê bâkoro ga akê na meni, ki hega, igo ko hagatonganigi vari renigi na hêni na poro se na mako memera, hanana vigo nahunigi na ani rako?”
53Inê kê arami, kê vi: “Mareha rârâ. I bara ngavê, angero!”
54Na angero ki vi: “Ta na hagararinga nikâ. Ngaia nga na maveta kani page aramigo, manga vi igo ma ko hagatea haritagi, 55vi na ta kani nahunigi rako: na golo, na siliva, na kapa, na aiani, na poro se na mako memera. 56Na siliva ka rako teharigi na golo; na kapa ka rako teharigi na siliva; na aiani ka rako teharigi na kapa; na poro ka rako teharigi na aiani, ma na mako memera ka rako teharigi na poro. 57Hoi, gu hagakitakitagi so maremu, na ta ka na marâ na enoni ga obanigi bâraha ma ki akê na meni: na marâ purua ga rako se na marâ ga gâga ma ta kereani?”
58Inê kê arami, kê vi: “Araha, na marâ purua ga raha ma ka so na meni, ma na marâ ga gâga ma ta kereani ka akê na meni.”
59Ngaia ki arami, ki vi: “Go vi koro. Hoi, gu takotako bâkoro ma ku kahu girara na aramiha. Na enoni, i nahunigi na marâ ga oga ma ta kereani, ngaia ki girara i vagevage teharia na enoni i nahunigi na marâ purua ga oga mave. 60Na suriha gê bani surua, ki manga ngekana nikâ. Inê kê page vagevage renira ta kereani na enoni ga page tahi, suria ngaira nga ka na ani ga hagarahasiê ma ka hagahigasiê ma ka taroheniê i ngekê. 61Inê ki asa vige rugu na obaku renira na enoni rako ga pe tahi, suria, henaka i ngekê, ngaira ka magahuru rêrê manga na hurahurana na ve i agobogobo, se manga na gi se na robona. Ngaira ka haganega ka tarê, ka vavata ma ka hatani makaka râ.”
62Hoi, inê kê tamasi tanga na maveta, kê vi: “Bâ, na ta kanigo katoa? Matena God ki bani hagavorago igo ma igo ko bani hagavorara na marâ hato getigi, igo ko hagavora na takotakoha. 63I gahanita God ma kani hagavorago! Vikana igami na enoni ki asa vigami nahunia na ramoha ni takotakoha. 64Ma vi na ta nikâ? Matena mi raharaha, na takotakoha iamami ki raharaha nogana ma ki kahu hagamamasiagagami, suria igami kami tahetara, vi igami kami page meme! 65Manga go hagararingenigami, gami nahunia na mamasiaganiha ngekana, henira na marâ mamauri getera, ngaira hete kaniga vagevage. 66Na ogaha iata ki koro teharigi na ogaha iamami igami. Ngaira ka pe naasia na suriha. Ngaira ka pe hagarea rârâ na mamasiaganiha se vi na tahinga, i tâ tangara i murina ga meme. 67Manga vi na mêriha, mi page nahunia i hemuri me, ki na mêriha ni mamasiaganiha raha ngavê, na ta kani koro tangagami? 68Na enoni hato ga vora me, ngaira ka tu igê na robona na tasi, ka erataga ngavê ma ka tangahurira ngavê. 69Inê kê takusia, vi i murina igami kami meme, i koro manga vi na suriha ki pe tâtâ tangagami.”
70Na angero ki arami, ki vi: “Matena God raramohaga hunia ki hagavora na maveta henira o Atama ma na raraha iana, na tarana i katoa hagenago, ngaia ki hagarêgi na ara ni marâ tanga na suriha. 71Hoi, go bani girara vi ararigo, vigo hagesuri tenigi na tamasinga iamu maremu. Igo ko bani vi, vi na takotakoha iamu ki raharaha, matena go raharaha nogamu. 72Ngaia ngekana! Na enoni i maveta ikê ka takotako ma ka kahu tasitasi. Ngaira ka aganarigi na ramata iana God ma ka pe kahu marupegi. Ngaira ka tavoa na buka ni ramata ma ka pe kahu arâ suria. Tahema ngaira ka page mamasiaga. 73Na ta ka na teha iata igê na suriha? Na ta ka na aramiha iata igê na tangiana na hagahatongina? 74I arihu era me noga God raramohaga hunia ki bani piringiape me henira na enoni i maveta ikê, ma ki mareha vige tamanira. Ma God ki piringiape vikana tanga na matena i hemuri me.”
Manga i he kani tanga na atarona na enoni i murina i meme
75Hoi, inê kê hagatea na angero, kê vi: “Angero, inê be nungigo, ku ramatenia me, manga i he tangagami, matena mi meme, matena na ara ni hitangimami ki tagarenia bê aporo na atarona? Igami kami mamaro vari, mataro me na matena go page haganega ko hagavorara igê na ani haoru na marâ, se na mamasiaganiha iamami ka page haganega ototo râ nga?”
76Ngaia ki arami, ki vi: “Inê be aramia na hagatenga ngekana nikâ, ma siana ko takusia, vi igo kani i berarogata na ani ga page oga igê na mamasiaganiha, suria vi ngaira ka pe botage rârâ renia na rotu. 77Ma tangago igo, igo ko bani rurugi haku rako na tagaraha koro, ma ngaigi ki oga i pasina God raramohaga hunia. Ma ki asa vigu bâsigi mênga i ngekê, mataro me na hatongini na tangiani. 78Hoi, be aramia na hagatenga iamu renia na mera. Matena God raramohaga hunia ki naka na ramata i gâga hagahu, vi na enoni ki girara i meme, na atarona ki pania na apena, hanana i aporo tanga na ani i vatea renia. Na atarona ki kahu hagarahasia God raramohaga hunia ototo râ nga. 79Nakê, be hagararingenira hagenago na atarota na enoni, ga pe botage rârâ renigi na ramata iana God raramohaga hunia ma ka kitenira na enoni ga rahesia. 80I mareha rârâ ta na agua tangara na atarota hanana vige mamaro igê. Ngaira ki tuguhira, viga arârâ tarema, matena ga mamasiaga, ka têtêtara ma ka rugurugu na obata. Na mamasiaganiha iata ki page akê me tatage igê na tarani gi pi. 81Na ani hagenago: ngaira ka pe botage renigi na ramata iana God raramohaga hunia. 82Na ruata: ngaira ki asa vige urisi parongata, hanana vige nahunia na mêriha. 83Na oruta: ngaira ka bâsigi na meta na enoni ga totosurigi na suruheri iana God raramohaga hunia, na meta i bani nakagi tangara. 84Na heta: ngaira ka takusia na mamasiaganiha, i bani tâ tangara igê na hagahato tangiani. 85Na rimata: ngaira ka bâsira na angero ga anumasigi na agua iata na atarota na enoni getera igê na mangumanguaganiha raha. 86Na onota: ngaira ka tahetara, vi na hagamamasiaganiha ki sugi tarahura. 87Na pita ki erataga ngavê. Matena ga bâsia na bâbâhana raha God raramohaga hunia, ngaira ka tangahurira ngavê ma ka maki teha ngavê. Ngaira ka magu rukurukunira, suria, matena ga tahitahi mêngara, ngaira ka haritohea. Ma i ngekê ngaira ka sugi ura i maana, hanana i surira igê na hagahato tangiani.
88Hoi, nakê be hagararingenira na atarota na enoni, ga tê viteana God raramohaga hunia ma na ta ki page tarahura igê na matena ga panigi na apeta ga girara ga meme. 89Matena ga oga i maveta, henaka ga tarahura tare na mamasiaganiha ma na perenga, ngaira ka totosuria God raramohaga hunia ma ka marupegi maninga na ramata iana God, i nahuni ramoha hanana i nakagi na ramata. 90Igê nga na tarani ga page tarahura. 91Ngaira ka page vagevage, matena ga bâsia na bâbâhana raha God. Ngaia ki page unira banu ma ngaira ka page bêbanu tanga na mamaroha igê na tarani tatage gi pi ni vagevageha. 92Na ani hagenago: ngaira ka vagevage, suria ga uhungia bâraha nga ma ka teharia na teniha era, i oga igê na aitangihata ma ki bara vige bêngenira tenia na mêriha tanga na mera. 93Na ruata: ngaira ka vagevage, suria ga bâsira na atarota na enoni era ga arârâ tare ma na hagaitangiha i oga tangara. 94Na oruta: ngaira ka vagevage, suria ga girara, vi na taroheniata iana God, i hagavorara, renira ki koro, suria igê na ogaha iata hagenani ngaira ka marupegi na ramata God i hagêgurira renigi. 95Na heta: ngaira ka vagevage, suria ga ageagesia na mamaroha, ga vagevagesia surigi na agua God ki bani hagahakura igê, matena na angero ka anumasira igê na mangumanguaganiha raha. Ngaira ka naasia na hanetaganiha raha, i bani tâ tangara igê na hagahato tangiani. 96Na rimata: ngaira ka vagevage, suria ga bani tahi tenia na maveta erataga ma ka page nahunia na mêriha i hemuri me. Ngaira ka girara ka bâsirerua na maveta gi rua: tani ki roro ma ki erataga, ga bani tahi tenia, ma tani ki aberabera, ga page nahunia ma ka page vagevagesia tare ki bê ki arâ. 97Na onota: ngaira ka vagevage, suria ga page bâsia, vi manga i he na maata kaniga page togatoga manga na arito, ma manga i he ngaira kaniga page manga na mavetani na higu, i asa vige page meme. 98Na pita ki koro teha ngavê. Ngaira ka vagevage, suria ngaira ka page arâ rêrê i pasina God, hanana ga mematohetanga, matena ga tangatanga pupu maninga renia ma ka obâbakoro ngavê renia, ma ki asa vige magu se vige maki. Ngaira ka têtê viteana God igê na ogaha iata hagenani ma i ngekê ngaia igê na bâbâhana raha ki page haganahunira renigi na meta. 99Manga gê bani vi, na meta ngegana ka bani tâ me tangara na atarota na enoni ga hagakoro obana God. Tanga na mamasiaganiha i page tarahura na atarota na enoni ga haritohea God, inê kê bani hagarongogo renia.”
100Hoi, inê kê hagate, kê vi: “Matena na atarota na enoni ga hagakoro obana God, ka panigi na apeta, ki hega, ngaira ka page nahunia vari na matena, hanana ga bâsigi igê na marâ go bani visigi tangê?”
101Ngaia ki arami, ki vi: “Ngaira ka page asitatara surigi na tangiani gi pi, ma i na matena ngekana ngaira ka page girara ga bâsigi na tarani, gê bani visigi tangago. I na murina ngekana ngaira ka page hakuhaku henira na atarota getera igê na atohata.”
Na suriha raha ma na tahingata ta kereani
102Hoi, inê kê vi: “Angero, gu visia me, i hega, na enoni ga totosuria God ka girara vari ga nungia God raramohaga hunia, hanana i takira igê na tangiana ni suriha raha na enoni ga haritohea? 103I hega, o vaemani kare ka girara vari ga nungia God tangara na kareta, na kareta tangara na enata, o hegoata tangara o hegoata ma na enoni tangara na goata ma tangara na tamata?”
104Ngaia ki arami, ki vi: “Inê kê agana ma vigê visia vê tangago. Na tangiana ni suriha raha ki na hagahatungina ngavê ma ki rangania na monariha tangara na enoni hato ka bâsia. Ma ki mareha ngavê ta na marâ i hemuri. Igo ko bani girara, vi i na matena ngegê o vaemani kare i asa vige vi tanga o karena ke maeha urusia ngaia, se vige mauru, se vige ngêngê, se vige komaga aporo urusia ngaia. Na avanuna na kare vurivuri ki asa vige vi tanga na kare vurivuri iana ke katogi na tarani ngegana urusia ngaia marena, ma ki asa nikâ na enoni vige vi vikana tanga na tamana koro. 105I tagenana ma igê na tangiana ngekana. I asa ta na enoni vige girara ge nungia God tanga ta na enoni. Na ara ni enoni ki page nahunia na hagaitangiha tangagi na bagatauhana se na mena tangagi na parongana koro.”
106Inê kê hagate, kê vi: “Manga ngekana, manga i he kani vigami ramatenigi na tarani igê na buka apuna? O Abarahamo ki nungia God tangara na ai ni Sotome, ma o Moise ki nungia God tangara na êvarimami, ga haritohea God igê na bagamasusu raha? 107Nikâ o Josua ki nungia God tangara na Isiraelita igê na matena iana o Akane. 108O Samuele ki nungia God tangara na Isiraelita igê na matena iana o Saulo. O Tavite ki nungia God tangara na Isiraelita igê na matena na ringa raha, ma o Solomone ki nungia God tangara na ani ga arâ ka hagarahe i ruma ni rotu. 109O Elia ki nungia God tangara na enoni, hanana i râ me na rangi tangara, ma ki nungia God hanana i hagamêria aporo na enoni i bani me. 110O Hesekia ki nungia God tangara na enoni igê na matena iana o Senageribi. Ma ka rako mêngagi na hagararinga vigana. 111Manga vi na enoni ga hagakoro obana God ma ka nungia God tangara na ani ga guguruga tanga God igê na mateni na eraha ki ama ni raharaha nga, ma na tarani ga pe oto ka ama ni rakorako nga, hoi, tanu hega kani pe akê me na tarana vikana igê na tangiana ni suriha raha?”
112Na angero ki arami, ki vi: “Na matena ngegê ki mareha vi na hagahatongini na ara ni marâ. Ma igê na matena ngegê nikâ ka mareha vige bâsia tare na bâbâhana raha God. Tahema na ani ga ramo ka tê viteana God ka nungia God tangara na ani ga makumakusiga vige tê viteana igê na matena ngegê. 113Hoi, na tangiana ni suriha raha ngaia ki na hagahatongina na matena ngegê ma ki na haganegahana na matena i muri me. Igê na matena ngekana ka page hato na ara ni eraha, 114na ara ni râ suri barisuniana ma na ara ni petotosuriana. Na tê vitana God ma na monariha karu page raharaha igê na ara ni tarani. 115Tahema igê na tangiana ni suriha raha ki asa ta na enoni vige takira na ani God i bani surira tanga na hagaitangiha meni na bagatauhata ma ki asa ta na enoni, vige hagaerasira na ani God i bani surira ka asitatara.”
116Inê kê arami, kê vi: “Na tarana gê bani visia i nago, inê kê obania vigê visia akê nikâ. Na maveta ki gahanita ma kani hagavora o Atama. Ma suria i hagavora, tanu hega kani pe hagavora, hanana siana ke tasitasi? 117Manga vi na mamasiaganiha ma ki hagarêsia ngavê na ogaha iamami i na metana ngegê, ma na marâ i tâ tangagami i murina mi meme ka na hagaitangiha ma, hoi, na mêriha i ngekê ki tanga na ta? 118E, Atama, bâ, na ta kanigo katoa? Na tasi iamu ki pe hagavotarigo igo getego so ma, ma ki hagavotarigami hato nogamami hete, na raraha iamu. 119Igami kami meme meni na tasi iamami. Hoi, na suruha ni mêriha tarema ki tanga na ta? 120Igami kami oga igê na bagahagêguriana vikana. Hoi, na naasiana na mêriha i asa vige page hato, ki tanga na ta? 121Suria igami kami bani bagatauhamami ngavê, na agua asitatara ma purunguniaga ga bani oga nanêgami igê na maveta i hemuri me, ka tanga na ta? 122Suria na tasi ka aharêsigi na ogaha iamami, na suruha vi na hetamaniha raha iana God raramohaga hunia ki page anumasira na ani ga bani paronga koro i maana, ki tanga na ta? 123Ga hagabângenia na Paratiso tangagami, ma na guana i komaga tare ki girara i hagakomagagami ma ki vategami renigi na ara ni marâ mi obanigi, ka tanga na ta? Igami ki bara vigami râ i ngekana, 124suria na ogaha iamami ka erataga. 125Matena na maamami ka page masuri puru teharia na bungiana, na ani ga oto surira mareta ka page togatoga teharigi na higu, ki tanga na ta? 126Igê na ogaha hagenani iamami, matena mi tasitasi, igami ki mareha ngavê, vigami takusia na mamasiaganiha i page tarahugami i murina mi meme.”
127Na angero ki arami, ki vi: “Ikê ka na girarana na hearihatana i tarahua na ara ni enoni i maveta. 128Manga i votavota igê, ngaia ki tuguhia vi mamasiaga renigi na marâ go kahu visigi râ ngegana. 129Tahema i nago o Moise ki kanukanura na enoni, hanana ga atea na mêriha, hanana ga mauri. 130Ma ngaira ka pe tongesurira ngaia ma na poropete ga akê me i murina, ma ngaira ka haritoheê nogaku, matena gê tamasi tangara. 131Tahema manga go hagararingenirerua na hagarugu obaha renia na mera iata ma na vagevageha raha renia na tahingata na enoni ga tongesuri, na hagarugu obaha ki na marâ purua ma.”
132Inê kê arami, kê vi: “Angero, inê kê bani girara, viga visia God raramohaga hunia, vi ngaia ki hetaki ngavê, suria i takira na ani ga mamêngara vige voravora me i maveta. 133Ga visia, vi ngaia ki hetaki, suria vi ki hetaki henira na ani ga urisi parongata ma ka kahu marupegi na ramata iana. 134Ga visia, vi ngaia ki piringiape, suria vi ngaia ki piringiape henira na enoni, ngaia marena i bani hagavorara ma ka bani tasi. 135Ga visia, vi ngaia ki mamahata, suria vi ngaia ki obania vi votovoto teharia vige nunginungi. 136Ga visia vi ngaia ki haritagi ngavê, suria vi ngaia ki ama ni bonotenigi nga na tasi iata na enoni tasi, ga oga i nago, i ngekê ma i hemuri me. 137Manga vi ngaia ma ki pe ama ni bonotenigi nga na tasi, ngekana na mêriha tanga na maveta ikê ma tangara na enoni igê, ki barabara ngavê. 138Ga visia, vi ngaia ki bonotenigi na eraha. Suria vi ngaia ki koro teha ngavê, tahema ngaia ki bonotenigi na tasi iata na enoni tasi. Manga vige pe manga ngekana vikê ke asa ngavê, vi na ani gi tage ma na enoni igê na rehagaro tangahuru vige nahunia na mêriha. 139Ga visia vi ngaia ki surira na enoni, suria vi ngaia ki bonotenigi ma ki ahunigi na tasi rako iata na enoni, i bani hagavorara renia na tamasinga iana. 140Manga vige mareha, vikê ta kereani ma renira na enoni hato kani ge hita râ.”
Currently Selected:
2 ESETARASE 7: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific