2 ESETARASE 5
5
1Hoi, na girarana ka manga igê. I page arâ me na matena na anumanumaha raha i page ranguira gatagata ngavê na enoni hato i maveta. Na tara ni monariha ki page pinihi. Na tongesuriha ki page hato ngavê. 2Na eraha ki page ama ni akê raha nga me. Na eraha raha ngekana igo ko pe bani bâsia me i nago. 3Na agua, go bâsia i ngekê i marungia na maveta, ngaia ki page aruhuruhu, ki page hihiruga, ma ki asa ta na enoni vige râ i ngekana. 4Hemuri, manga vi God raramohaga hunia ma ki nakago ko mauri rârâ mataro me na matena ngekana, igo ko page bâsia na agua ngekana ki anumanuma ngavê. Na arito ki page mave igê na bungiana ma na hageha igê na tangiana. 5Na gapu ki page ususu tenigi na apinige. Na hê ka page tamasi. Na enoni surigi na agua ka page anumanuma. Na higu ka page râ igê na tara getigi. 6Na maneraha, i mareha rârâ ta na enoni vige obania, ki page rêra akê. Na mane ka page gaha râ. 7Na navo ka page panegenira banu na siare i one igê na Asime. Na ringena na ani, na enoni rako ka pe hagarea, ki page rongoa igê na bungiana. Na enoni hato ka page rongoa. 8Na ano ki page avagavaga igê rako na agua ma ki page pusurenigi akê na vavatani na gi. Na marâ vasiga ka page arâ tenigi na bena ma na vapuni. Na gete ka page aparara na marâ ga bâ mamagutaga i na ara ni mateni i tarahura igê na hageha. 9Na ve ka page marasiga. I na ara ni agua na enoni ga hekomaniheri igê, ka page hemerongeheri. Na aitangisiha ki page magahuru ma na takotakoha ki page ahiahi. 10Henaka rako na enoni ka garirerua, ngaira ki bara vige tarahurerua. Suria na maveta hagenani na eraha ma na hemerongeana karu page ama ni akê nga me. 11Na enoni i ta na agua ka page hagatera na enoni i ta na agua, ka vi: ‘I hega na otoha se ta na enoni ni parongo koro ki râ me i pasimi?’ Ma na aramiha tangara ki tagenana rârâ ma, ki vi: ‘I mareha rârâ!’ 12Igê na matena ngekana na enoni ka page rarunigi rako na marâ koro, ma ka page raruni baguru ma. Ngaira ka page tagara raha ma ka page tagara hagaborâ ma. 13Nga na girarana na hatungina na maveta, God ki hagamarumungeniê kê hagabâsigo renigi ngegana. Ma ki manga go haganega ko nunginungi aporo nikâ ma ko ama ni angiangi nga ma ko ama ni harihari nga surigi na tangiani gi pi me nikâ, igo ko page rongogi na tarani ga raha teharigi na ani ngegana.”
14Hoi, inê kê tata ngavê. Inê kê hataera ngavê ma kê haga ni bagamame. 15Ma na angero, i bani meêtamasi, ki têê, ki hagaramoniê ma ki rageê aharaga kê ura.
16Ki bungi me nikâ ma o Palatiele, i bêngenira na enoni, ngaia ki râ me i pasiku ma ki hagateê, ki vi: “Go râ i he? Tanu hega kanigo babau? 17Go pe girara kani tuguhigo vigo bâbâsurira na Isiraelita igê na agua ga vora re na kare rakuraku igê? 18Vego, aharaga ku ngê. Siana ko panigami manga na avanuta na sipi panira na togoha iana tangara na o vasiga ka ngasira.”
19Inê kê arami, kê vi: “Gu nakê so ku râ! Siana ko aporo me surigi na tangiani gi pi. Hato ma ko kahu aporo me.” Ma ngaia ki râ.
NA RUATA NA MARUTEHA
Uriele ki aramia o Esera i tamasi ki hagagege tanga God
20Hoi, inê kê angi, kê angi maramara ma kê hari surigi na tangiani gi pi, manga i bani bonasiê na angero Uriele. 21Ga hato na tangiani gi pi, inê kê hataera ngavê nikâ. 22Henaka, ma inê kê girara gê takotako bâkoro aporo. Inê kê haganega kê tamasi nikâ tanga God raramohaga hunia, kê vi: 23“Araha God, tenigi na apinige ma na rauga hato i maveta igo ko bani atea na anima ikê na varo. 24Tenigi na agua hato i maveta igo ko bani atea na anima ikê na kere agua. Tenigi na mahe hato i maveta igo ko bani atea na anima ikê na mahe siki. 25Tenigi na ve hato i poroni na asi, igo ko bani hagavunusia na anima ikê na ve. Tenigi na hinua hato ga bani tagarahigi me, igo ko bani naka getea râ na anima ikê na hinua i Jerusaleme ki na animu. 26Tenira na manu hato, go bani hagavorara, igo ko bani atea na anima ikê na kuvê. Tenira na marâ mamauri hato go bani hagavorara, igo ko bani atea na anima ikê na karena sipi. 27Tenira na enoni surigi na agua hato i maveta, igo ko bani atera na anima igê na enoni ka na animu ma ko vatera na kariamu ngegana renigi na ramata iamu, na enoni hato i maveta ga hagahigasigi.
28Araha, na tarani hato ngegana ka monari. Hoita, tanu hega kanigo hagamakira na enoni go bani atera tangago maremu teharira na enoni hato getera, suria go tagarenira i rimata na enoni surigi rako na agua getigi? Tanu hega kanigo tokorenira na kariamu maremu? 29Bâ, ngaira ka tongesurigi na suruheri iamu tangara! Tanu hega kanigo nakara na enoni ga usitenigi na suruha iamu, ka purira so i ano? 30Manga igo ma ko mangariaga bâraha tangara na kariamu maremu, igo ko hagaitangira so maremu.”
31Matena gê tamasi hato, God ki hagatorangenia me nikâ na angero, i bani râ me i pasiku igê na bungiana i hato. 32Na angero ki vi: “Gu karingê maninga. Inê be hagesurigo râ nikâ.”
33Inê kê vi: “Hoi, angero!”
Hoi, ngaia ki hagateê, ki vi: “I hega, igo ko takusira bâraha vari na Isiraelita? Go takusia vari, vi igo ko takuira ngavê teharia God i hagavorara?”
34Inê kê arami, kê vi: “Angero, i mareha rârâ. Inê kê tamasi vikana, suria ma inê kê tako tugupu ma kê hataera. Inê kê anumanuma tare matena gê uhungia vigê takotako renigi na tauhana God raramohaga hunia se gê uhungia vigê aitangisigi, henaka vi sisite râ ma.”
35Ngaia ki arami, ki vi: “I bara ngavê tangago vigu aitangisigi!”
Ma inê kê hagate, kê vi: “Tanu hega kani mareha, angero? Manga i mareha, tanu hega kanigê vora me? Manga vige manga ngekana inê ki asa vi ve bâsigi na mamasiaganiha ma na bagabevoani ga tarahura na Isiraelita.”
36Na angero ki vi tangê, ki vi: “Hoi, inê be aramigo, manga vi igo ma ko girara go katogi na tarani igê. Visia me, na enoni gi hita kaniga page voravora me. Go ruguni haku me na êsusuni na rangi ga totoko. Go hagamêrigi aporo na mahe ga maugu. 37Go tangahigi na kiboru ga purusigi igê na roga, hanana ga rogaroga me tangê. Go hagabâsiê renia na nununa na ringe. Hoi, manga vigo girara go katogi na tarani ngegana, inê kê aramigi na hagatenga iamu renigi na mamasiaganiha iata na Isiraelita.”
38Inê kê arami, kê vi: “E, araha, i mareha rârâ ta na enoni vige girara ge katokato vikana, nga noga ma God, suria ngaia ki pe maratorata na enoni i maveta ikê. 39Manga i he kanigê girara gê aramigi? Na kere ta kani vigê girara?”
40Na angero ki vi tangê, ki vi: “Igo ki bara ngavê tangago, vigu katogi na marâ gê visigi tangago, henaka vi na kere ani gi tage togo ma. Tanu hega kanigo takusia, vi igo ko girara go aitangisigi na suriha iana God, se vigo aitangisia vi manga i he God ki bani suru vi takuira na kariana?”
Na hagatenga renira na enoni i nago, i ngekê ma i hemuri me
41Hemuri inê kê vi: “Bâ, Araha God, igo ko tako renira na enoni, ga tahitahi mêngara igê na hatongina na maveta. Ma na ta kani page tarahura na enoni ga bani me i nago tarana na matena ngekana? Ma igami kami hega? Ma tangara na enoni i nago taramami ma na ani ga page oga i murimami?”
42Ngaia ki arami, ki vi: “Na suriha raha ki manga na marâ i arige, i pe tonga na haganegahana ma na hagahatongina. Ngekana na ani ga râ me i nago tarana na matena ngekana, ngaira ka pe râ me i nago tarana na matena ngekana, ma na ani ga page arâ me i murina na matena ngekana, ngaira ka pe râ me i murina na matena ngekana.”
43Inê kê arami kê hagate, kê vi: “Tanu hega kanigo pe hagavorara na enoni hato, na ani i nago, na ani i ngekê ma na ani i hemuri me, hanana vige oga igê na matena gi tage hanana vi siana ko hagarihu renia na suriha raha iamu?”
44Ngaia ki arami, ki vi: “Na marâ inê gê hagavorara, ki asa vige râ rêrê tehariê inê gê hagavorara. Ma nikâ, manga vige manga ngekana, na maveta ki pe raha, hanana vige ararira na enoni hato, manga vi ve hagavorara ngaira hato igê na matena gi tage.”
45Ma inê kê hagate, kê vi: “Tanu hega kani go kahu hagarongoê so ma i ngekê, vi i ta na matena igo ko page hagamaurira igê na matena gi tage na ara ni marâ hato go bani hagavorara? Manga vi na maveta ma ke ararira ngaira hato igê na matena ngekana, ngaia ki ararira i ngekê nikâ.”
46Ngaia ki arami, ki vi: “Na hagatenga iamu ki manga go hagatea na gete i aparara na kare tangahuru gi tage, vi tanu hega kani pe aparara igê na matena gi tage, mareha vi tatage.”
47Inê kê arami, kê vi: “Vikana ki bara ngavê. I asa vige aparara igê na matena gi tage.”
48Ngaia ki vi: “Nga na ngekana! Inê kê katoa na maveta ki manga na anga ni kare, hanana i hagaborahusi kare, matena i aparara na enoni. 49Na kare i tarahua mênga na hageha ma na gete i mamata na obana, ngairerua ki asa vigaru apara kare. I tagenana ma tanga na maveta inê kê bani hagavora.”
50Hoi, inê kê vi: “Suria igo ko akê me igê na tarana ngekana hoi, nakê be hagatego. I hega, na maveta, go takusia, ngaia ki hahaoruga mênga manga na kere gete ngekana se i sugi gemêa noga?”
51Ngaia ki arami, ki vi: “Na anima na gete i bani aparara kare, ngaia kani girara i aramigo. 52Go hagatea, vi manga i he na karena i muri kani pe raha mangara na ani hagenago. 53Ngaia ki page hagarongogo, vi na karena i aparara, matena i karekare ma ki apekoro, ngaira ka ramoramo teharira na ani i aparara matena i apara kare mênga ma ki pe ramo na apena manga i nago. 54Igo ko bani girara, vi igo ko pe borahu mangara na enoni ga oga i nago, 55ma na ani ga page voravora me i murimu ka page abubu teharigo. Na tarana ngekana ki hagagirarago vi na marâ gê bani hagavorara, ka varahu noga ma ka pe ramo manga igê na matena ga haoru mêngara igê.”
God ki page hagahatungia na maveta
56Inê kê hagatea God, kê vi: “Araha, igo ko agana vari vi hagabâsiê renia na ani, go page surira na marâ hato go bani hagavorara renia?”
Currently Selected:
2 ESETARASE 5: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific