Lukas 3

Johanes de Deepa prädicht

(Mat 3,1-6; Mrk 1,2-6; Joh 1,19-23)

1Em 15. Joa daut Tiberius aus Kjeisa rejieed, aus Pontius Pilatus de Harschoft en Judäa haud, Herodes en Galiläa un sien Brooda Filippus äwa de Lenda Ituräa un Trachonitis, Liesanias äwa Abileen, 2un aus Hanas un Kaifas Huagepriestasch wieren, kjeem Gott sien Befäl aun Johanes, Zacharias sien Sän, en de Wiltnis. #Hes 1,3; Hos 1,1 3Un hee jinkj en aule Jäajenden aum Jordan un prädijd: Kjieet om un lot junt deepen. Dan woat Gott junt de Sinden vejäwen. 4Soo aus em Profeeten Jesaja sien Buak jeschräwen steit:

“Doa roopt wäa en de Wiltnis: Moakt dän Wajch reed fa onsen Harn.

Moakt fa am een jlikjen Stich! #Jes 40,3-5

5De Läachten sellen aula jefelt,

un de groote un kjliene Boaj utjejlikjt woaren;

de kromme Wäaj motten jlikj jemoakt woaren,

un de ruche Wäaj glaut jemoakt.

6Un aule Menschen woaren Gott siene Radunk seenen.”

De Deepa prädicht daut see omkjieren sellen

(Mat 3,7-10)

7De Menschen kjeemen bie Schoowa sikj von Johanes deepen to loten. Hee säd to de Menschen dee doa kjeemen: Jie Schlangenbroodsel, wäa haft junt jewoarnt Gott sien Jerecht ut däm Wäaj to komen? 8Brinjt Frucht, dee doa wiest, daut jie junt oppjemoakt haben. Un fangt nich aun to junt selfst to sajen: Wie haben Abraham aus Voda. Wiels ekj saj junt: Gott kaun Abraham ut dise Steena Kjinja schaufen. 9De Akjs licht bie de Beem aun de Wartlen reed; un doawäajen woat jieda Boom, dee nich goode Frucht drajcht, aufjehakt un em Fia jeschmäten.

10De Menschen fruagen am: Waut sell wie dan doonen? 11Johanes säd to an: Wäa twee Sauts Kjleeda haft, saul däm eent jäwen dee kjeene haft; un wäa to äten haft, saul daut krakjt soo moaken. 12Dan kjeemen de Takskollakjta, om sikj deepen to loten, un fruagen: Liera, waut sell wie doonen? 13Hee säd to an: Kollakjt nich mea, aus daut Jesaz velangt! 14Dan fruagen am de Soldoten: Un waut sell wie doonen? Hee säd to an: Nämt kjeenem met Jewault Jelt auf un doot kjeenem faulsch beschuljen un siet tofräd met jun Loon!

15Wiels de Menschen doamet räakjenden daut Christus komen wudd, wundaden see aul, auf Johanes dee opplenjd wia. #Joh 1,19-28 16Johanes säd to an aula: Ekj deep junt met Wota, oba doa woat eena komen dee stoakja es aus ekj, jäajen däm ekj daut nich wieet sie, daut ekj am de Schoo oplees. Dee woat junt met dän Heiljen Jeist un met Fia deepen. 17Hee haft siene Schmietscheffel en de Henj, un woat siene Draschflua jrintlich reinjen. Dän Weit woat hee em Spikja brinjen, un daut Sprie em Fia schmieten, daut niemols utjeit. 18Hee ermond de Menschen noch derch veschiedne aundre Woarnungen un prädijd an daut Evangelium.

19Aus Johanes Herodes, dän Gowernia, daut väahilt, daut hee sien Brooda Filippus siene Fru jefriet haud, un wäajen aul daut orrajchte daut hee jedonen haud, #(19 un 20) Mat 14,3-4; Mrk 6,17-18 20leet hee bowa aul daut noch Johanes enstoppen.

Jesus lat sikj deepen

(Mat 3,13-17; Mrk 1,9-11)

21Aus daut Volkj sikj aula deepen leet, wort Jesus uk jedeept. Un aus hee bäd, muak de Himmel sikj op. 22Un de Heilja Jeist kjeem en kjarpaliche Jestault rauf un sad sikj opp am soo aus eene Duw. Un eene Stemm vom Himmel säd: Du best mien leewa Sän, met däm ekj sea tofräd sie. #3,22 Eenje oole Schreften sajen noch vondoag hab ekj die Läwen jejäft. #Luk 9,35; Joh 1,32

Jesus siene Staumvodasch

(Mat 1,1-17)

23Jesus selfst wia ojjefäa 30 Joa oolt aus hee sienen Deenst aunfunk. See hilden am aula fa Josef sienen Sän, #Luk 4,22 24een Sän von Eli, een Sän von Matat, een Sän von Levi, een Sän von Melchi, een Sän von Jana, een Sän von Josef, 25een Sän von Matitja, een Sän von Amos, een Sän von Nahum, een Sän von Hesli, een Sän von Nagai, 26een Sän von Mahat, een Sän von Matitja, een Sän von Schimi, een Sän von Josech, een Sän von Joda, 27een Sän von Johanan, een Sän von Resa, een Sän von Serubabel, een Sän von Schealtiel, #3,27 Griechisch Salatiel een Sän von Neri, 28een Sän von Melchi, een Sän von Addi, een Sän von Kosam, een Sän von Elmadam, een Sän von Er, 29een Sän von Jesus, een Sän von Elieser, een Sän von Jorem, een Sän von Matat, een Sän von Levi, 30een Sän von Simeon, een Sän von Juda, een Sän von Josef, een Sän von Jonam, een Sän von Eljakim, 31een Sän von Melea, een Sän von Menna, een Sän von Matata, een Sän von Natan, een Sän von David, #2Sam 5,14 32een Sän von Isai, een Sän von Obed, een Sän von Boa, een Sän von Salmon, een Sän von Nachschon, #Rut 4,17-22 33een Sän von Aminadab, een Sän von Admin, een Sän von Arni, een Sän von Hezron, een Sän von Perez, een Sän von Juda, #(33-38) 1Mo 5,1-32; 11,10-26; 21,2-3; 29,35 34een Sän von Jakob, een Sän von Isaak, een Sän von Abraham, een Sän von Terach, een Sän von Nahor, 35een Sän von Serug, een Sän von Regu, een Sän von Peleg, een Sän von Eber, een Sän von Schelach, 36een Sän von Kenan, een Sän von Arpachschad, een Sän von Sem, een Sän von Noah, een Sän von Lamech, 37een Sän von Metuschelach, een Sän von Henoch, een Sän von Jired, een Sän von Mahalalel, een Sän von Kenan, 38een Sän von Enosch, een Sän von Sett, een Sän von Adam, dee von Gott kjeem.

Currently Selected:

Lukas 3: PB

Highlight

Copy