Lukas 2

Jesus, de Rada, woat jebuaren

(Mat 1,18-25)

1De Kjeisa Augustus befool to siene Tiet, daut aul siene Menschen sullen jetalt un em Taksrejista enjeschräwen woaren. 2Dit wia daut ieeschte mol daut de Menschen jetalt worden, un passieed aus Kierinius de Rejentschoft en Sierien haud. 3Un een jiedra jinkj doahan, wua hee jebuaren wia, om sikj enschriewen to loten. 4Dan jinkj Josef von Nazaret, en Galiläa, no Betlehem, en Judäa, wiels sien Staumvoda, de Kjennich David, doa jebuaren wia, 5om sikj met Maria, dee am aunvetrut wia, enschriewen to loten. See wia schwanga. 6Un jrod aus see en Betlehem wieren, kjeem de Tiet, daut see daut Kjint to Welt brinjen must. 7Un see brocht äaren ieeschten Sän to Welt, wekjeld am en Winjlen un läd am en de Foodakjrebb; wiels em Gausthus kjeen Rum to finjen wia. #Mat 1,25

8En dee Jäajent wieren en dee Nacht Schophoad opp de Stap un woakten äwa äare Häad. 9Un plazlich stunt dän Harn sien Enjel ver an, un Gott siene Harlichkjeit muak daut om an soo dach, daut an eene groote Angst äwakjeem. 10Oba de Enjel säd to de Hoad: Fercht junt nich! Horcht! Ekj brinj junt eene goode groote Freidens Norecht, wuatoo sikj aule Menschen freien woaren; 11junt es dise Nacht, en David siene Staut, de Heilant jebuaren, de Har, Christus! 12Un om uttofinjen auf daut soo es, woa jie doa een Kjint finjen daut en Winjlen enjewekjelt es, un en eene Kjrebb licht. 13Dan stunden bie dän eenen Enjel plazlich een grootet Schoof Enjel un lowden Gott un säden: #Psa 103,20-21

14Lot Gott em hechsten Himmel Iea kjrieen,

un de Menschen opp de Ieed Fräd,

dee, aun dee hee sien Jefaulen haft. #2,14 Eenje oole Schreften sajen fa daut latste Poat Mucht doa Fräd oppe Ieed sennen, un de Menschen sikj freien. #4Mo 6,26; Luk 19,38; Efs 2,14.17

15Un aus de Enjel wada trigj nom Himmel fuaren, säden de Hoad eena toom aundren: Dan well wie nu fuaz no Betlehem gonen un de Jeschicht unjasieekjen, dee de Har ons haft weeten loten. 16Un see spooden sikj, daut see hankjeemen, un fungen Josef un Maria, un doatoo uk daut Kjint, daut en de Kjrebb lach. 17Un aus see daut Kjint jeseenen hauden, vetalden see aulemaun, waut an von daut Kjint wia jesajcht worden. 18Un aula, dee daut hieeden, wundaden sikj doaräwa, waut de Schophoad an to vetalen hauden. 19Maria oba, leet sikj jieda Wuat to Hoaten gonen un docht doaräwa no. 20De Hoad jinjen wada trigj, un lowden un veharlichten Gott fa aules, waut see jehieet un jeseenen hauden, un daut et krakjt soo jewast wia aus an wia jesajcht worden.

Jesus kjricht sien Nomen un woat em Tempel jeweit

21Om acht Doag must daut Kjint beschnäden woaren, un hee kjrieech dän Nomen, Jesus, jrod soo aus de Enjel daut befolen haud, noch ea Maria am druach. #1Mo 17,12; Luk 1,31.59

22Un aus äare Reinjungstiet äwa wia, soo aus Moses sien Jesaz väaschreef, brochten de Elren daut Kjint no Jerusalem nom Tempel, om am aun Gott to äwajäwen. #3Mo 12,1-4; 4Mo 18,15 23Daut Jesaz säd: “Jieda ieeschta Jung, dee to Welt kjemt, saul dän Harn aus heilich äwajäft woaren.” #2Mo 13,2.15 24Un see wullen dän Harn uk een Opfa brinjen, soo aus daut Jesaz daut velangd: “een Poa Turtelduwen ooda een Poa junge Duwen”. #3Mo 12,6-8

25En Jerusalem wond don een Maun, dee heet Simeon; daut wia een fromma Maun, dee Gott ferchten deed un doano luad, daut Israel äa Heilant komen sull, un de Heilja Jeist wia en am. #1Mo 49,18 26Am wia vom Heiljen Jeist jesajcht worden, daut hee noch ea hee stoawen wudd, dän Harn sienen Christus seenen wudd. 27Dan jinkj hee, vom Jeist jedrungen, em Tempel nenn. Un aus de Elren daut Jesus Kjint doa nenn brochten, soo aus an väajeschräwen wia, 28neem hee daut Kjint opp siene Oarms, lowd Gott un säd:

29Har! Du hast dien Vespräakjen jehoolen.

Nu latst du dienen Deena en Fräd stoawen.

30Nu haben miene Uagen dienen Heilant jeseenen,

31dän du fa aule Menschen häajestalt hast,

32een Licht, de Velkja de Woarheit to brinjen,

un eene Harlichkjeit fa dien Volkj Israel. #Jes 49,6

33Sien Voda un siene Mutta wundaden sikj doaräwa, waut Simeon von daut Kjint to sajen haud. 34Un Simeon säajend an un säd to Maria, Jesus siene Mutta: Dit Kjint es doatoo bestemt, daut derch am en Israel väle woaren tofaul komen, un uk daut väle derch am woaren oppjerecht woaren. Hee woat een Tieekjen sennen, wua eenje doajäajen räden woaren. #Luk 20,17-18; Apost 28,22; 1Kor 1,23 35Un uk derch diene ieejne Seel woat een Schwieet jestoaken woaren, daut et verendach kjemt, waut väle Menschen em Hoat denkjen. #Joh 19,25

36Em Tempel wia dan uk jrod eene Profeetin, Hana, Fanuel siene Dochta, dee staumd von Asser häa. 37Dee wia aul sea oolt; säwen Joa wia see befriet jewast un wia nu eene Wätfru von 84 Joa oolt. Dee veleet dän Tempel nich, oba bleef doa Dach un Nacht un deend dän Harn met Fausten un Bäden. #1Tim 5,5 38Dee troff daut doa dan uk aula aun un dankt Gott un vetald vom Harn Jesus to aulemaun en Jerusalem, dee no daut Heil luaden.

Trigj no Nazaret

39Un aus Josef un Maria aules jedonen hauden waut Gott sien Jesaz velangd, jinjen see trigj no Hus no Galiläa, no äare ieejne Staut, Nazaret. 40Daut Kjint woss groot un stoakj un wia voll Weisheit, un Gott siene Jnod wia met am.

De twalwjoascha Jesus em Tempel

41Siene Elren reisden aule Joa no Jerusalem toom Passafast. #5Mo 16,1-8 42Aus hee 12 Joa oolt wia, jinjen see, soo aus jeweenlich, no Jerusalem toom Passafast. 43Aus daut Fast äwa wia un see no Hus jinjen, wia de Jung Jesus en Jerusalem jebläwen, onen daut Josef un Maria daut wisten. #2Mo 12,18 44See dochten, dee wia en äare Jesalschoft, un reisden een gaunzen Dach, ea see mank äare Frind un vewaunte aunfungen no am to sieekjen. 45Un aus see am nich fungen, jinjen see trigj no Jerusalem un sochten am. 46Om dree Doag fungen see am em Tempel, met de Lierasch om am, un daut hee no an horcht un Froagen stald. 47Un aula, dee am hieeden, wundaden sikj, woo hee aules vestunt un beauntwuad. 48Aus see am sagen, wisten see nich waut see doavon denkjen sullen, un siene Mutta säd to am: Sän, wuarom hast du ons dit aunjedonen? Kjikj emol, dien Voda en ekj haben die ut Angst jesocht. 49Hee säd to an: Wuarom socht jie no mie? Wist jie nich, daut ekj en mien Voda sien Hus sennen must? #Joh 2,16 50Oba see vestunden nich, waut hee doamet meend. 51Dan jinkj hee met an met, un see kjeemen no Nazaret, un hee jehorcht an un wia an unjadon. Maria leet sikj aul dise Wieed to Hoaten gonen un vegaut dee nich. 52Un Jesus woss opp #2,52 ooda neem too aun Joaren un neem too aun Weisheit. Un Gott un Menschen hauden Jefaulen aun am. #1Sam 2,26

Currently Selected:

Lukas 2: PB

Highlight

Copy