Jeremia 51
51
Gott sien Wuat äwa Babel
1Dit es waut de Har sajcht:
Paust opp, ekj brinj eenen hunjschen Stormwint
opp Babel un dee, dee doa wonen;
2ekj woa soone no Babel schekjen,
dee ar derchsäwen woaren
un daut Launt rein fäajen woaren.
Aun dän Dach wan äa Schoden kjemt,
woaren dee von aule Sieden aunkomen. #Jer 15,7
3Lot dän Flizboagen nich scheeten,
un dän Soldot nich Tiet toom sikj äwatrakjen.
Veschoont nich äare junge Mana,
un brinjt äare gaunze Armee om,
4daut de jeschloagne em Chaldäalaunt ligjenbliewen,
un de jestoakne oppe Gaussen bleeden.
5Israel un Juda äa Gott,
äa Har, dee aules rejieet,
haft an nich onen Help jeloten,
wan see sikj uk sea veschulcht hauden
jäajen däm Heiljen en Israel. #Jes 54,4; Jer 50,29
6Rant wajch von Babel.
Nu es daut een jiedra fa sikj selfst.
Lot äare Strof nich junt trafen,
wiels nu tolt de Har an trigj
fa waut see jedonen haben. #Jer 50,8; Opb 18,4
7Babel wia een goldnet Kuffel em Harn siene Haunt,
un hee leet de gaunze Welt doavon drinkjen.
Aule Velkja haben von sienen Wien jedrunken,
un soo sent dee aula dieslich jeworden. #Jer 25,15; Opb 17,4; 18,3
8Woo es Babel soo haustich jefollen un tweijebroaken?
Hielt met ar. Brinjt waut Saulw fa de Wunden.
Veleicht kaun dee noch bäta woaren. #Jes 21,9
9Wie haben ons aunjestrenjt Babel to halpen,
oba daut wudd nich veheelen.
Nu lot ar toch,
un well wie een jiedra no sien Launt trakjen,
wiels äare Strof rieekjt bat aum Himmel
un bat äware Wolkjen.
10De Har haft onse Sied jenomen.
Komt, well wie no Zion gonen un preisen
fa aul de Dinja, dee de Har,
ons Gott, jedonen haft.
11Schoapt de Spetzen von june Feilen.
Nämt een jiedra sien Schilt.
De Har haft dän Jeist
von dän Kjennich von Medien aunjeräacht,
wiels hee jäajen Babel steit
un daut vedoawen well.
Dit es woo de Har trigjtolen woat;
hee tolt trigj wäajen dän Tempel. #Jes 13,17; Jer 50,28
12Häft june Flag jäajen de Mieren von Babel.
Lot nuscht en de Staut nenn ooda rut.
Bewoakt de Staut.
Hoolt Soldoten em Vestäakj,
wiels de Har sienen Plon utfieet,
dän hee äwa Babel bekaunt jeef.
13Du, dee du aun de Wotakanols wonst,
un sea rikj jeworden best,
dien Enj es jekomen.
Waut die aum Läwen hilt,
es nich mea doa. #Opb 17,1
14De Har, dee aules rejieet,
vesprakjt met aules waut hee haft,
daut hee woat diene Staut gaunz voll
von fientliche Soldoten fellen,
soo dicht aus eene Graushoppa Ploag.
Un dan woaren see “Jewonnen” schrieen,
äwa Babel.
15Hee haft de Ieed jemoakt, met siene Krauft,
un aules soo aus daut rant, en siene Weisheit,
un hee vestunt dän Himmel uttospreeden. #(15-19) Jer 10,12-16
16Wan hee sikj hieren lat, dan es
doa eene Maussen Wota enne Wolkjen;
hee brinjt Wolkjen von wiet auf oppe Ieed.
Hee lat daut blitzen, un dan räajent daut;
hee lat dän Wint ut siene Städa komen. #Psa 135,7
17Waut Menschen noch doonen kjennen
es nuscht nich em Vejlikj;
un jieda Goltschmett mott sikj schämen
met de Jetta, dee hee moakt;
daut es waut väajestaldet un gaunz doot.
18Doa es nuscht doahinja, dee sent toom lachen;
wan de Har kjemt, woaren dee veschwinjen.
19Israel äa Gott es waut gaunz aundret;
hee es dee, dee aules jemoakt haft;
un Israel es daut Volkj, woont hee sikj jewält haft.
Hee es de Har, dee aules rejieet.
20Babel, du best mien Stock toom priejlen,
un Jereetschoft fa dän Kjrich;
met die hab ekj Velkja jeschloagen;
met die hab ekj Kjennichrikjs vedorwen. #Jer 50,23
21Met die hab ekj Pieet un Ritta jeschloagen;
met die hab ekj Woagen un Kutscha jeschloagen.
22Met die hab ekj Mana un Frues jeschloagen;
met die hab ekj oole un junge jeschloagen;
met die hab ekj Junges un Mejales jeschloagen.
23Met die hab ekj Hoads un Häaden jeschloagen;
met die hab ekj Foarma un Pieed jeschloagen;
met die hab ekj Volkjsleida un aunjestalde jeschloagen.
24Oba nu woa jie seenen, woo ekj Babel
un aul de Chaldäa bestrofen woa
fa aul daut schlajchte, waut see
jäajen Zion jedonen haben,
sajcht de Har. #Hiob 1,17; Jer 50,29
25Paus opp, du hast soo väl Schoden jebrocht,
un kjeena oppe Welt kunn die waut aundoonen,
sajcht de Har.
Oba ekj woa miene stoakje Haunt jäajen die brinjen,
un die von de Spetz rauf kulren,
un diene huach aunjeseene Städ,
vebrent ligjen loten.
26Niemols woat noch wada wäa
een Akjsteen ooda Gruntsteen bie die nämen;
du woascht opp emma eene Wiltnis bliewen,
sajcht de Har.
27Häft eene Flag enne Welt!
Blost de Trompeet mank de Velkja!
Moakt aulet mäajelje reed
toom Kjrich jäajen Babel.
Lot de Kjennichs von Ararat un Minni,
un Aschkenas aula komen.
Stalt eenen Kommandaunt aun,
un brinjt de Pieed noda,
bat doa soo väl sent
aus en een Schwoarm Graushoppa. #1Mo 10,3; Jes 13,3
28Lot de Velkja aulet mäajelje reedmoaken.
Lot de Kjennichs von Medien,
un aul äare Leida un aunjestalde,
un de gaunze Armee, sikj reedmoaken
fa dän Kjrich.
29Dan scheddat un zettat de Ieed,
wiels daut aula romkjemt,
waut de Har sikj väajenomen haft
jäajen Babel. Hee wull Babel
to eene Wiltnis moaken,
wua kjeena wont.
30De stoakje Soldoten von Babel
jäwen opp un bliewen enne Schutzstäda.
Daut es ut met äare Krauft;
dee sent nu aus Frues jeworden;
äare Hiesa brennen,
un nuscht es mea veräajelt. #Jer 50,37
31Dee waut ranen dän Kjennich sajen,
trafen sikj hinjawäajes toop;
von aule Sieden sajen see,
daut de Staut enjenomen es;
32daut de Städen, wua
see äwa dän Riefa gonen kjennen,
enjenomen sent;
daut de sechre Städen brennen,
un daut de stoakje Soldoten
sikj nich Rot weeten.
33De Har, dee aules rejieet,
un Israel äa Gott es, sajcht:
De scheene Babel es plaut aus een Draschplauz,
un boolt woat de Arnt doa jenomen woaren.
34De babelonischa Kjennich, Nebukadnezar,
haft onse Staut veschlungen un omjebrocht,
hee haft aules ut ons utjeriemt.
Hee haft ons oppjeschlukt,
aus een schrakjeljet Ontia wudd;
hee haft sikj aun onse scheenste Dinja
voljefräten, un ons utjeriemt.
35Lot dän Schoden, dee äwa ons
un onse Menschen kjeem,
opp Babel utjerecht woaren,
sajen dee waut en Zion wonen.
Lot de Lied von Chaldäa schuldich sennen,
fa dee waut mank ons storwen,
sajcht Jerusalem.
36Un nu sajcht de Har: Paust opp,
ekj woa fa die enstonen
un fa die Rach eewen.
Ekj woa äa Mäa utzoppen,
un äare Kjwal vedrieejen loten.
37Un Babel woat een Klompen Schunt sennen,
wua de Wilw sikj tus moaken.
Lied woat daut veschrakjen, daut doa kjeena wont,
un see woaren sikj enjsten, daut et soont jeft. #Jer 50,13
38De Menschen von Babel woaren brellen
aus Leiws, un gnorren aus junge Leiws.
39Wan see no mea velangen,
woa ekj an eene Moltiet väasaten,
daut see sikj bedrinkjen un beschwiemen,
un nienich wada oppwakjen,
sajcht de Har.
40Ekj woa an raufleiden aus Lama
un Bakj un Kosen toom schlachten.
41Woo es Scheschach doch jefollen,
dee weltbekaunde Staut?
Woo es Babel nu soo äakjlich
mank de Velkja jeworden? #Jer 25,26
42Daut Mäa es äwa Babel jeschält;
see sent met Walen, waut ruzhen, bedakjt.
43Äare aundre Städa sent eene Wiltnis,
eene ladje doodje Stap,
wua kjeena noch wont ooda vebie reist.
44Ekj woa dän Bel von Babel bestrofen;
un daut, waut hee jefräten haft,
ut sienen Schlucka rieten.
De Velkja ranen nich mea no am;
siene Mieren sent jeplauzt un jefollen. #Jes 46,1; Jer 50,2
45Mien Volkj, nu blieft doa nich lenja;
een jiedra, nu rat junt daut Läwen,
ver däm Harn sienen growen Oaja.
46Lot junt daut nich schwoa woaren
ooda enjsten, wan een Joa
nom aundren novetalt woat,
von furchtboare Sachen em Launt;
daut sikj groote Mana jäajenäwa stonen
un jewaultmässich omhäagonen.
47Paust mau opp. De Tiet kjemt,
daut ekj met de Jetta en Babel veräakjnen woa;
dan woat äa gaunzet Launt sikj schämen motten,
un äare Menschen woaren oppe Gaussen doot ligjen.
48Dan woat de Himmel un de Ieed
un aules waut doabennen es fa Freid schrieen,
daut dee, dee Babel venichten woat,
vom Nuaden jekomen es,
sajcht de Har. #Opb 18,20
49Nu mott Babel jeschloagen woaren
fa aul de Israeliten, dee see ombrochten,
krakjt soo aus oppe gaunze Welt,
dee omkjeemen, woone Babel schluach.
50Dee waut jie soowiet noch
vom Schwieet sent wajchjekomen,
Velot! Hoolt nich stell!
En daut framde Launt wua jie sent,
denkjt aun dän Harn,
un lot junt Jerusalem wichtich sennen. #Psa 137,5
51Wie musten ons schämen aus wie hieeden,
woo de aundre Menschen ons veachten;
ons vekalieed daut Jesecht aus de framde
em Heilichtum vom Harn sien Tempel jinjen.
52Oba nu sajcht de Har,
daut woat bestemt woaren,
daut ekj met de Jetta von Babel veräakjnen woa,
un dan woaren en daut gaunze Launt,
dee stänen, dee omkomen.
53Uk wan Babel sikj wudd bat däm Himmel opprechten,
un sikj sea huage Mieren bud,
wudd doa doch eena von mie jeschekjt komen,
waut an venichten wudd, sajcht de Har. #1Mo 11,4; Jes 14,13
54Eena hieet woo see en Babel schrieen,
un woo daut en Chaldäa to Enj jeit.
55De Har vestieet Babel,
un hee woat een Enj moaken
von äa grootet Jelud.
Soo aus groote Walen ruzhen,
hieet sikj däm Fient sien Jeschrech;
56dee gonen en Babel
un venichten doa aules.
De babelonische Soldoten woaren faustjenomen,
un äare Flizboages woaren tweijebroaken.
Gott es eena, dee veräakjent,
hee es de Har, dee trigjtolt. #5Mo 32,39-41
57Ekj woa äare Leida, äare Rotjäwa,
äare aunjestalde un äare groote Soldoten
soo väl to drinkjen jäwen, daut see enschlopen
un nienich wada oppwakjen,
sajcht de Kjennich, dee doa de Har,
dee aules rejieet, heet.
58Dit es waut de Har, dee aules rejieet, sajcht,
De stoakje Mieren rom Babel
woaren en Grus vemolt,
un äare groote Puaten doljebrent woaren.
Daut, aun waut de Menschen jeoabeit haben,
es to nuscht jeworden;
waut de Velkja met Mieej jebut haben,
es en Flaumen veschwungen. #Hab 2,13
59Aus Zedekia, en sien vieedet Joa aus Kjennich en Juda wia, muak hee eene Reis no Babel. Un Jeremia schekjt eene Norecht, met Seraja, dee Nerija sien Sän, un Machseja sien Grootsän wia. Seraja must doano seenen, woo aul de Eenselheiten opp de Reis jeräajelt worden. #Jer 36,4 60Un Jeremia schreef en eene Schreftroll aul dän Schoden dol, waut opp Babel komen wudd, soo aus daut en dit Buak steit. #Jer 50,1—51,58 61Un Jeremia säd to Seraja, daut wan hee no Babel kjeem, sull hee daut aula lud ver de Lied väaläsen. 62Hee sull sajen, daut de Har haft jesajcht, daut hee dise Staut venichten wudd, soo daut doa kjeene Menschen ooda Vee mea wonen wudden, un opp emma wudd eene ladje Wiltnis bliewen. 63Un wan hee de Schreftroll gaunz jeläst haud, dan sull hee doa eenen Steen naun binjen, un daut aulatoop em Eufrat Riefa schmieten #(63 un 64) Opb 18,21 64un sajen: Dit es woo Babel veschwinjen un nienich wada trigj oppkomen woat von dän Schoden dän de Har opp an brinjen woat.
Hia hieren Jeremia siene Wieed opp.
Currently Selected:
Jeremia 51: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
