Efeesa 5

De Waundel em Licht

1Aus Gott siene leewe Kjinja, sträft am emma änelja to woaren. #Luk 6,36 2Habt soone Leew eena toom aundren aus Christus to ons haud, un sien Läwen fa ons opfad aus eenen scheenen Jeroch aun däm Gott eenen Jefaulen haud. #Gal 2,20 3Oba soo aus daut heilje tookjemt, lot bie junt nich emol soo väl aus von Huararie, Orreinichkjeit ooda Jiez, de Räd sennen. #Kol 3,5 4Jie sellen nich schaundboare un noarenhauftje Räd haben, uk nich Dommheit driewen, dee junt nich aunsteit. Eeft junt leewa, dankboa to sennen. #Efs 4,29 5Wiels jie weeten sea goot: Wäa sikj met Huararie aufjeft ooda jiezich es, waut Jettadeenst es, soone Menschen haben kjeenen Aundeel aun Christus un aun Gott sien Rikj. #1Kor 6,9-10; Opb 21,8; 22,15 6Lot junt nich veleiden derch ladje Wieed; wiels jrod doawäajen kjemt Gott sien Oaja äwa dee Menschen, dee Gott nich jehorchen wellen. #Kol 3,6 7Habt nuscht met soone Menschen to doonen.

8Ieescht läwd jie uk em diestren, oba nu haft Gott en junt Licht oppdachen loten. Dan läft nu uk aus soone Kjinja, dee daut Licht haben. #Mat 5,14; Joh 12,36; Efs 2,11; 1Tess 5,5; 1Pet 2,9 9Daut Licht brinjt goodet, Jerajchtichkjeit un Woarheit verendach. #Gal 5,22; Flp 1,11 10Prooft daut to lieren un to doonen, waut däm Harn jefelt. #Reema 12,2; Flp 1,10 11Un habt nuscht to doonen met onfruchtboare Woakjen, dee von em diestren komen; stalt dee leewa verendach. 12Daut es eene Schaund doavon to räden, waut em Jeheemen väajeit. #Reema 1,24 13Waut oba derch daut Licht opjedakjt woat, es to seenen; un aules waut to seenen es, es em Licht. 14Doawäajen es jesajcht:

“Wakj opp, dee du schlapst, un sto opp vom Doot,

dan woat Christus die Licht jäwen.” #Jes 60,1; Joh 3,20-21; 8,12; Reema 13,11

15Siet väasechtich, daut jie derch dit Läwen gonen aus kluake Menschen un nich aus soone, dee nich weeten, waut to de Sach jehieet. 16Un nuzt de Tiet ut, wiels daut es eene schlajchte Tiet. 17Siet veninftich un finjt ut, waut de Har von junt velangt. 18Un bedrinkjt junt nich aun Wien, wuaderch jie de Kontroll äwa junt selfst velieren, oba woat voll vom Heiljen Jeist. #Luk 21,34 19Rät eena toom aundren met Psalmen un sinjen un jeistliche Leeda. Sinjt un spält em Hoat däm Harn to ieren. #Psa 33,2-3; Kol 3,16 20Un dankt en aules emma Gott, dän Voda, fa aules en Jesus Christus onsen Harn sienen Nomen. #1Tess 5,18

Aunordnunk fa Maun un Fru

21Schekjt junt eena toom aundren ut Ieaforcht fa Christus. #1Pet 5,5 22Un jie Frues, siet june Mana soo unjadon, aus jie däm Harn sent. #1Mo 3,16; 1Tim 2,11-12; Tit 2,5 23Wiels de Maun steit äwa siene Fru, soo aus Christus äwa siene Jemeent steit, fa dee hee sikj selfst hanjeef äa Heilant to sennen. #1Kor 11,3; Efs 1,22-23 24Un soo aus de Jemeent Christus unjadon es, soo sellen de Frues en aules äare Mana unjadon sennen.

25Mana, siet june Frues jrod soo goot, aus Christus siene Jemeent goot wia, un sikj selfst fa ar hanjäwen deed, 26daut hee ar heiljen kunn, aus hee ar ieescht met däm Wuat soo aus met Wota, jewoschen haud, #Tit 3,5; Heb 10,22 27daut dee en siene Uagen nich plakich ooda veknutscht, oba heilich un oschuldich wia. #2Kor 11,2; Kol 1,22 28Soo sellen uk de Mana äare Frues jrod soo goot sennen aus äaren ieejnen Kjarpa. Wäa siene Fru goot es, es sikj selfst goot. 29Noch haft kjeena sien ieejnet Fleesch veschmäten. Een Mensch vesorcht un näat sienen Kjarpa, soo aus Christus daut fa siene Jemeent deit, 30wiels wie Jläda aun sienem Kjarpa sent. #Efs 1,23 31“Dit es wuarom een Maun Voda un Mutta veloten woat, om met siene Fru toop to sennen, un dee twee woaren een Fleesch sennen.” #1Mo 2,24 32Dit es een grootet Jeheemnis, un ekj meen doamet Christus un siene Jemeent to schildren. 33Oba aulemol, jie Mana sellen june Frues jrod soo goot sennen, aus junt selfst, un de Frues sellen soo sorjen, daut see äare Mana achten.

Currently Selected:

Efeesa 5: PB

Highlight

Copy