Efeesa 6

Aunordnunk fa Kjinja un Elren

1Kjinja, june Christenpflicht es, june Elren to jehorchen, wiels daut es daut rajchte to doonen. #(1-3) Mrk 7,10-13 2“Voda un Mutta ieren” wia daut ieeschte Jeboot, wuaropp Gott daut Vespräakjen läd: #2Mo 20,12 3“daut die daut goot jeit un du lang oppe Ieed läwen kaust.” #5Mo 5,16

4Un jie Vodasch, vezoajcht june Kjinja nich. Trakjt dee christlich opp un doot dee em christlichen Senn trajchtwiesen. #5Mo 6,20-25

Deena un äare Haren

5Jie Kjnajchts, jehorcht june Wieetslied un deent an met Forcht un Zetren, opp Iernst von Hoaten, soo aus wan jie Christus selfst deenden. #(5 un 6) 1Tim 6,1-2; Tit 2,9-10; 1Pet 2,18 6Oba deent nich bloos dan goot, wan de Wieet siene Uagen äwa junt haft. Deent soo aus wan jie Christus siene Deena wieren. 7Doot jewessenhauft daut, waut jie jleewen, daut Gott jefaulen wudd. 8Dit sell jie weeten: Daut goode, waut jie doonen, woat de Har junt beloonen, eendoont auf jie Sklowen ooda friee Menschen sent. #2Kor 5,10

9Un jie Wieetslied, denkjt aun june Veauntwuatunk. Sied jrod soo jewessenhauft to june Deena, aus jie von an velangen to junt to sennen. Mesbrukt june Jewault äwa an nich. Denkjt doaraun, daut jie ver dän selwjen Harn veauntwuatlich sent aus see. Gott moakt tweschen kjeenem eenen Unjascheet.

Nämt de Jewäaren von Gott

10Tolatst: Sorcht doafäa, daut jie stoakj woaren derch dee Krauft, dee de Har junt jeft. #Efs 3,16; 1Kor 16,13; 2Tim 2,1; 1Joh 2,14 11Lajcht junt daut Jescher opp, daut Gott fa junt reed haft, daut jie bestonen kjennen, wan de beesa Fient junt aunjript. 12Wiels wie haben nich mau jäajen Fleesch un Bloot to kjamfen, oba jäajen jewaultje, beese Jeista von de Himmelswelten un met Jewaulten un Harschoften von em diestren, dee äwa dise Welt harschen. #Luk 22,31; Efs 2,2 13Nämt aule Jewäaren, dee Gott fa junt haft, daut jie utrechten kjennen waut daut brukt, bestonen to kjennen, wan de beesa Dach kjemt. 14Stot faust, met de Woarheit om junt aus eenen Gort, un de Jerajchtichkjeit ver junt aus een Brostschilt. #Luk 12,35; 1Tess 5,8; 1Pet 1,13 15Daut Evangelium, daut dän Fräd brinjt, trakjt aun soo aus Schoo opp june Feet. 16Äwa aules nämt dän Gloowen aus eenen Schilt, wua de beesa met siene brennende Feilen nich derchscheeten kaun. #1Pet 5,9; 1Joh 5,4 17June Radunk sat junt opp aus eenen Hoot, un Gott sien Wuat aus een Schwieet, daut de Jeist junt jeft. #1Tess 5,8; Heb 4,12

18Dit doot aula em Jebäd un bät Gott om Help. Bät emma wan de Jeist junt doatoo aunmont. Blieft waka un jäft nich no met bäden. Bät fa aule, dee to Gott sien Volkj jehieren. 19Bät uk fa mie, daut ekj mucht brow jenuach sennen, daut Jeheemnis em Evangelium soo to prädjen aus sikj daut jehieet, #Apost 4,29; Kol 4,3; 2Tess 3,1 20wuatoo ekj jeschekjt sie un nu uk met Kjäden jebungen sie. #Apost 28,31; 2Kor 5,20

Gruss un Säajenswunsch

21Tiechikus, een leewa Brooda, dee dän Harn tru deent, woat junt vetalen, woo mie daut jeit un waut ekj doo. #Apost 20,4; Kol 4,7-8; 2Tim 4,12; Tit 3,12 22Dän hab ekj jrod doawäajen no junt jeschekjt, daut jie weeten, woo ekj hia utmoaken doo un daut jie doaderch freschen Moot foten.

23Ekj bäd doarom, daut Gott de Voda un de Har Jesus Christus junt Fräd un Leew jäwen, aus daut met däm Gloowen kjemt. 24Mucht Gott siene Jnod met aul dee sennen, dee onsen Harn Jesus Christus werkjlich opp iernst goot sent!

Currently Selected:

Efeesa 6: PB

Highlight

Copy