Efeesa 4

De Eenheit von de Jemeent

1Aus eena, dee fa dän Harn em Jefenkjnis es, kroag ekj junt aun: Läft soo daut et doamet stemt, wuatoo Gott junt beroopen haft. #Kol 1,10; 1Tess 2,12 2Siet bescheiden, frintlich un jeduldich. Habt soo väl Leew, daut jie junt unjarenaunda vedroagen. #Kol 3,12-13 3Siet emma doano ut, de Eenichkjeit em Jeist to bewoaren, wuaderch jie met eenaunda vebungen bliewen. #(3 un 4) Kol 3,15; Flp 2,2 4Daut jeft mau eenen Kjarpa un eenen Jeist, jrod soo aus jie aula derch een un deeselwje Hopninj, beroopen sent. #Reema 12,5 5Daut jeft uk mau eenen Harn, eenen Gloowen un eene Doop. #1Kor 8,6 6Daut jeft mau eenen Gott un Voda fa ons aula: Hee steit äwa aule, schauft derch aule un läft en aule. #1Kor 12,6

7Een jiedra von ons haft soo väl Jnod jekjräajen aus am von Christus jeschonken es. #Reema 12,3.6; 1Kor 12,11 8Doawäajen sajcht daut:

“Aus hee nopp foaren deed, fieed hee faustjenomne wajch un jeef de Menschen Gowen.” #Psa 68,19; Kol 2,15

9Wan daut jesajcht es, hee es nopp jefoaren, waut meent daut sest, aus daut hee ieescht rauf jekomen es, bat doa, wua de Ieed ligjen deit? #Joh 3,13 10Hee, dee rauf kjeem, es dee, dee wada nopp foaren deed, wiet äwa aule Himmel, wiels hee sull met siene Macht un Harlichkjeit de gaunze Welt fellen. 11Siene Gowen wieren dise: Daut hee eenje aus Apostel, eenje aus Profeeten, eenje aus Evangelisten, eenje aus Hoad un eenje aus Lierasch aunstalen deed. #Apost 21,8; 1Kor 12,28 12Dit deed hee om aul Gott siene Kjinja toom Christendeenst reedtomoaken, wuaderch Christus sien Kjarpa (daut es de Jemeent) jebut woat, #1Kor 14,26; 1Pet 2,5 13bat wie aula to eene Eenichkjeit em Gloowen un Erkjantnis aun Gott sienen Sän komen, daut wie volstendje Menschen en Christus sent, soo wiet daut Christus bie ons eent un aules es. 14Wiels wie sellen nich lenja Kjinja sennen, dee sikj von veleidende Menschen äare Lieren aunschmäaren loten, un soo aus de Walen vom Wint han un häa jeschmäten woaren, derch äare Errlieren, wuamet see de Menschen veleiden. #1Kor 14,20; Heb 13,9; Jak 1,6 15Wie motten en eenem leeftoljen Jeist de Woarheit vebreeden. Un wie motten en aules oppwaussen un Christus änlich woaren, dee ons Haupt es. #Efs 1,22; 5,23; Kol 1,18 16Unja Christus siene Kontroll paussen aule Jläda aum Kjarpa toop un de gaunza Kjarpa woat derch paussende Jelenkja toopjehoolen. Un wan jieda Jlett deit, waut daut kaun, dan waust de Kjarpa un but en Leew opp. #Kol 2,19

Daut niee Läwen von de Christen

17Waut ekj junt nu saj, es soo aus de Har daut haben well. Jie sellen nich mea soo läwen aus de Velkja, dee aun nuscht wieetvollet denkjen. #Reema 1,21-24 18Met äare Jedanken jriepen see em diestren rom un haben kjeenen Aundeel aun daut Läwen von Gott, wiels see von Gott nuscht weeten un em Hoat blint un vestokt sent. #Efs 2,12 19See sent stomp jeworden jäajen aules, waut äa ieejnet Jewessen an sajen kunn. See läwen huachhäa un loten sikj en oppscheiselje Sachen gonen, onen sikj to schämen.

20Soowaut hab jie aun Christus nich jeseenen un uk nich von am jelieet. 21Daut es, wan jie äwahaupt waut von am jelieet haben. Wiels en Jesus hab wie de volle Woarheit. 22Seet daut jie von däm oolen Mensch looskomen, dee junt soo läwen muak aus jie deeden, un dee sikj derch siene aunschmäarende Lost selfst en de Grunt brocht. #(22-25) Kol 3,9-10; Reema 8,13; Gal 6,8 23Jie sellen derch dän Jeist vom Grunt opp en Seel un Senn, niee Menschen woaren, #Reema 12,2 24dee no Gott sienem Bilt en Jerajchtichkjeit un Heilichkjeit jeschaufen sent.

25Hieet opp met lieejen un rät de Woarheit eena toom aundren, wiels jie sent aula Jläda aun eenaunda. #Sach 8,16 26Wan jie junt oajren, dan sorcht soo, daut jie junt derch junen Oaja nich vesindjen, un veeenicht junt ea de Sonn unjajeit. #Psa 4,5; Jak 1,19-20 27Jäft däm beesen Fient kjeene Jeläajenheit. 28Wäa met stälen jeploacht es, saul doamet opphieren un oabeiden gonen un opprechtich met siene Henj sien Broot vedeenen, un soo väl, daut hee waut haft, dee to jäwen, dee nuscht haben. #2Mo 20,15; 1Tess 4,11 29Rät nuscht, waut dän näakjsten schoden kaun. Rät bloos daut, wuaderch dee jeholpen woaren, dee junt hieren. #Efs 5,4; Kol 4,6 30Beleidicht Gott sienen Heiljen Jeist nich. Wiels de Jeist es Gott sien Tieekjen, daut hee ons ieejent, de Garantie, daut de Dach kjemt, daut wie hia rut jerat woaren. #Jes 63,10; Efs 1,13-14 31Woat nich mea betta un fuchtich äwa eenaunda un vezoajcht junt nich. Hieet opp to schrieen un to beleidjen. Lot von soowaut nuscht mea sennen. #Kol 3,8 32Siet leewa von Hoaten leeftolich eena toom aundren. Vejäft junt unjarenaunda, soo aus Gott junt en Jesus Christus aules vejäft haft. #Mat 6,14; 18,22-35; Kol 3,13

Currently Selected:

Efeesa 4: PB

Highlight

Copy