1. Johanes 3

Wie sent Gott siene Kjinja

1Seet, waut de Voda ons fa ne Leew bewäsen haft, daut wie Gott siene Kjinja jenant woaren. Un wie sent daut werkjlich! De Welt kjant ons nich, wiels see am nich kjant. #Joh 1,12; 16,3 2Leewe Frind, wie sent nu aul Gott siene Kjinja. Daut es oba noch nich verendach jekomen waut wie nohäa sennen woaren. Wie weeten oba, wan hee komen woat, dan woa wie soo sennen, aus hee es, un wie woaren am soo seenen, aus hee es. #Reema 8,17; Flp 3,21; Kol 3,4 3Un jiedra, dee siene Hopninj opp Christus sat, woat sikj reinjen, soo aus hee uk rein es. 4Wäa sindicht, deit orrajcht, wiels sindjen es sikj veschuldjen jäajen Gott siene Jebooten. 5Jie weeten, daut Christus jekomen es, de Sinden wajch to nämen, un en am es kjeene Sind. #Jes 53,4-6.9; Joh 1,29; 8,46; 1Pet 2,24 6Wäa met Christus vebungen es, woat nich en Sinden läwen. Wäa en Sinden läft, haft am nich jeseenen un uk nich jekjant. #Reema 6,11.14

7Leewe Kjinja, lot junt von kjeenem vom rajchten Wajch aufbrinjen! Wäa daut rajchte deit, es jerajcht, soo aus Christus jerajcht es. #1Joh 2,29 8Wäa en Sinden läft, es noch aum beesen Fient jebungen, wiels de beesa Fient haft von Aunfank aun jesindicht. Gott sien Sän es jekomen, dän beesen Fient siene Woakjen kaputt to moaken. #Joh 8,44 9Wäa von Gott jebuaren es, läft nich en Sind, wiels Gott siene Kjinja en Gott bliewen.#3,9 De oole Schreften sajen wiels siene Kjinja en am bliewen. Dee kjennen nich sindjen, wiels see von Gott jebuaren sent un nieet Läwen en sikj haben. #1Joh 5,18 10Doaraun es daut to seenen, woont Gott siene Kjinja sent un woont dän Soton siene Kjinja sent: Wäa nich daut rajchte deit un nich sienen Brooda goot es, es nich von Gott.

Siet junt unjarenaunda goot

11Ons es daut von Aunfank aun jesajcht worden, daut wie ons unjarenaunda goot sennen sellen. #Joh 13,34 12Wie sellen nich soo sennen aus Kain, dee vom beesen staumd un sienen Brooda doot muak. Un wuarom muak hee am doot? Wiels siene Woakjen ojjerajcht wieren, un hee wist, daut sienem Brooda siene Woakjen jerajcht wieren. #1Mo 4,8

13Wundat junt nich, leewe Breeda, wan de Welt junt nich lieden kaun. #Mat 5,11; Joh 15,18-19 14Wie weeten, daut wie vom Doot toom Läwen jekomen sent, wiels wie Leew fa de Breeda haben. Wäa dän näakjsten nich waut räakjnen kaun, es noch doot. #Joh 5,24 15Wäa sienen Brooda fient es, es een Merda. Un wie weeten, daut een Merda nich daut eewje Läwen haft. #Mat 5,21-22 16Waut woare Leew es, kjenn wie aun Jesus seenen, dee sien Läwen fa ons jeef. Un soo sell wie uk wellich sennen, ons Läwen fa de Breeda to loten. #Joh 15,13 17Oba wäa en dise Welt goot auf es un sitt, daut sienen Brooda waut needich fält, un oba sien Hoat fa am tooschlitt, woo kaun Gott siene Leew en däm sennen? #5Mo 15,7; 1Joh 4,20

Met Leew kjemt Hopninj

18Leewe Kjinja, well wie nich bloos von Leew räden, oba dee en Woarheit met Woakjen bewiesen. #Jak 2,15-16

19Wie woaren weeten, daut Jesus Christus en ons läft un wie een rujet Jewessen ver Gott haben kjennen, 20un dan, wan ons Hoat ons veuadeelt, es Gott jrata aus ons Hoat un weet, woo daut met aules steit. #Luk 15,20-22 21Leewe Frind, wan ons Jewessen ons nich vekloacht, dan kjenn wie em vollen vetruen no Gott komen. 22Wie woaren daut kjrieen, wuano wie froagen, wiels wie siene Jebooten hoolen un doonen, waut am jefelt. #Mrk 11,24 23Un sien Jeboot es dit, daut wie aun sienen Sän Jesus Christus jleewen, un ons unjarenaunda goot sent, soo aus hee ons daut en sienem Jeboot jesajcht haft. #Joh 6,29; 15,17 24Wan wie Gott siene Jebooten hoolen, bliew wie en am un hee en ons. Un daut weet wie derch dän Jeist, dän hee ons jejäft haft. #Reema 8,9; 1Joh 4,13

Currently Selected:

1. Johanes 3: PB

Highlight

Copy