Pr 3
3
Ab'tzib'l tu'n qpon kanun ti'ju' nab'l
1Nky'ajul, lalun tzik'kyna'lju' nxnaq'tzb'ile' tu'na;
che kyajxju' nchaq'b'ile' toj twi'ya,
2ktenb'iltzun tchwinqlaltza nimtoj
ex toj tzalajb'il.
3Lalun naju' tk'ujlalila exju' ax yolina;
uwanqe'ka tqula nakuj tuya,
Majx na'nqeku'ya,
4Laytzun b'ajta tk'monte
tu'n Qman Dyos ex kyu'n xjal
5qek tk'uja ti'j Qman Dyos tuk'i'l tkyaqil tk'u'ja
ex lalun tz'okqe tk'u'ja ti'jxu' tnab'la.
6Na'ntza Qman Dyos toj tkyaqilju' ntb'incha'na,
ate kxel q'inteya toju' tb'eyil b'a'n.
7Lalun t-ximaya qa atixi'x tnab'la;
nimana te Qman Dyos ex tzaqpinkja myab'a'n:
8¡Atzunte tb'anil q'a'nb'ilju'
tu'n tkuwix t-xmilala!
9Nimana te Qman Dyos tu'nju' ati teya
ex tuk'i'lju' tnejel twitz tawala,
10ikytzu'n che nojel tk'ujatzu'ya
laype' b'ajxtl ex lay che kanun kykb'el ub'a.
11Nky'ajul, lalun tik'u'ya juk'b'il tu'n Qman Dyos,
ex lalun tzaj ttx'ujila tiju' ttzak'b'il;
12qu'n in ttzak'u'nte Qman Dyosju' ntk'u'jla'nxi'x,
kse'n jun manb'aj nttzak'u'n tk'wal kye tilwi tu'n.
13Tzalajb'ilte' teju' xjal nknon nab'l,
ex nknon k'atzil;
14qu'n nimxi'x tajb'en kyetwitz saqpwaq
ex wi'yalxi'x kyetwitz q'anpwaq.
15Nim toklenju' nab'l kyekywitz tb'anil ab'j;
¡expena' min nche ponju' ti'xti' achb'ajil qe'xi'x ikyju'!
16Ntq'o'n chwinqlal nimtoj tu'n tb'anq'ob',
atzu'n tu'n tnayaj, ntq'o'n q'inumal ex oklenj.
17Tb'anilxi'xte' tu'n qlpe ti'j;
qo anq'il toj nak'b'il qama qob'et kyoju' tb'eyil.
18Anq'ib'lte' nab'l teju' nk'monte,
¡tzalajb'ilte' kyeju' tokkywitz ti'j!
19Kub' tb'incha'n Dyos tx'otx' tuk'i'l nab'l,
ex ximan b'a'nxi'x tej tkub' tb'incha'n kya'j;
20tu'n nab'l kub'a' taq'pu'nju' ninnjab'
ex tu'n ntzaja' ẍmu's toj muj.
21Nky'ajul, tz'okxa ati tnab'la kukxju',
ex lalun tz'el txalpuja ti'j,
22qu'n chwinqlalte' teya
ex naku'j u'wj te achb'il ti'ja.
23Q'uqlixi'x tk'u'ja ajt-xiya toj b'e
ex layx jaw tz'aqiya.
24Ajtzun txi'ya kẍeb'il, lay xob'a;
ajtzun txi'ya wtal, watlxte' teya.
25Qa nab'en saj jun ti'xti' lay xob'ta
ex lay xob'a teju' tzul kyib'aju' b'inchal myab'a'n,
26qu'n atite' Qman Dyos tuk'i'la
lay taj tu'n tkub' tz'aqa.
27Qama qaninjtz xtalb'il teya,
lalun kub' t-xk'a'yi'n tib'a qa ati tu'me'l tu'n tb'inchanteya.
28Lalun kyej tq'o'na xtalb'il te najchi'jxi'
aju' kb'antel tb'inchanteya ja'lo.
29Lalun kub't-xima'n jun ti'xti'ya myab'a'n
ti'ju' xjal q'uqlok tk'u'j ti'ja.
30Lalun jyon q'oja tuk'i'l jun xjal,
qa mixti'te soktb'incha'n teya.
31Lalun tx'a'lti'j tk'u'ja ti'ju' b'inchal taq'wix
ex lalun tz'el tkno'nju'ya ntb'incha'n;
32qu'n ik'u'nqekye' b'inchal myab'a'n tu'n Qman Dyos,
aye'tzu'n b'a'n xjal ntzalaj kyi'j.
33Nkub'ju' qanb'en tu'n Qman Dyos kyib'aj kyja b'inchal myab'a'n,
atzu'n toj kyja tnik'alkyi'j nche tzaj tk'iwla'n.
34Nxmayinte Qman Dyos kyi'ju' twi' xmayilqe',
aye'tzu'n me'sqe' kye kyilwi tu'n.
35Kyekye ati kynab'lju' ninb'il,
aye'tzu'n xnakqe', kych'ixaw nel.
Currently Selected:
Pr 3: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999