Pr 4
4
Oqxenb'il tu'n qxi' toj b'a'n b'e
1Nky'ajul, kyb'inxe' nab'l tu'n kymane';
kyq'onk kywi'ye' ti'j, tu'n tok kynab'le'.
2Matxi' che'x nxnaq'tza'ne',
qu'mtzun lalun kub' kytxa'ju'ne'.
3Ikxwe' machinokye' te k'wa'lb'aj:
kyexi'xtoq wilwiye' tu'n ntxuye'
4Atoqwe' nq'umli we tu'n nman kjalu:
Kyejxju' nyole' toj twi'ya;
b'inchanxya nchaq'b'ile', k'anq'iltzuntza.
5Knom tnab'la ex tz'okxa ati tnab'la;
lalun tzik'kyna'lju' nyole' tu'na.
6Xonk tk'u'ja ti'ju' nab'l, lalun kyej ttzoqpi'na
qu'n kkletela tu'n.
7Ate nojqelanju' tnejelxi'x kywitz txqantl ti'xti'
aju' tu'n tten tnab'la ex tu'n toka k'atz.
8Xonk tk'u'ja ti'j, ex kjawil laq'b'a'na tu'n;
chlema, ex kjawil nima'na tu'n;
9¡kjawix tq'o'n jun koron b'echile toj twi'ya
te jun oklenj tb'anilxi'x! chij.
10Nky'ajul, b'intzju'ya nyole',
k'monqe'ma, k'anq'iltzuntza nimtoj.
11Kxel wiq'i'na toju' tb'eyil nab'l:
kxel nxb'etza'na toju' b'a'n b'e.
12Ja lay tz'ok tokpaja'ya,
expe' lay jaw tokpaja aj tojqelana.
13Tuneka ti'ju' xnaq'tzb'il, lan kub' ttxa'ju'na;
chwinqlanku'ya qu'n ate chwinqlalju'.
14Lalun txilpeya kyi'ju' b'inchal myab'a'n,
lalun txitkno'nju'ya kyb'inchb'en taq'wix.
15Lalun txi'ya toju' kyb'e;
pa'mil tib'a kyi'j ex ljomta tb'e,
16myab'a'n nkyna'n qa min nche b'inchan taq'wix;
nel kywatl, qa min nkyim jun xjal kyu'n.
17¡Majx kywaju' taq'wixil
ex kyk'wa'ju' q'oj nkyb'incha'n!
18Iky kyb'e tnik'alkyi'ju' kse'n spik'un ajqsqix:
ch'i'naq t-spik'e', o'kx aj tjawul qoptz'aj b'a'nxi'x.
19Atzu'nte' kyb'eju' b'inchal myab'a'n qlolj b'a'nxi'x;
¡mixpeti'x nelkynik' alqi'j nche jaw tokpaja'!
20B'intzju'ya nyole', nky'ajul;
b'inqeku'ya.
21Lalun tz'el tpa'ntib'a kyi'j,
¡che kyajx toj twi'ya!
22Chwinqlalte' ex q'a'nb'il
kyeju' nokyal kyu'n.
23Ka'yinxa tnab'la tib'aj tkyaqil,
qu'n a tlok' chwinqlalju'.
24Lalun txitma'n jun ti'xti'ya mya ax;
pa'mil tib'a ti'ju' chajyolil.
25O'kxtzu' ka'yinxa'ya twitza,
o'kxtzu' ka'yinxa'ya tzinun twitza.
26Ka'yinxa b'a'nxi'x ja nb'eta'ya,
tu'ntzun tb'eta kukxu' toj b'a'n b'e.
27Lalun txalpuja ti'ju' tb'eya;
lalun txi'ya toj tb'eyil taq'wixil.
Currently Selected:
Pr 4: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999
