1 S 31
31
E'kyim Sawul kyuk'i'lju' tk'wal toj q'oj
(1 Cr 10.1-12)
1Eq'ojin pilistey kyi'j aj Israel, aye'tzu'n aj Israel eb'aj kub' oq kywitz, nim eb'aj kyim twi' witz Kyilb'oa. 2Eb'ajx lpe pilistey jyolkye Sawul kyuk'i'lju' tk'wal, ex e'kub' kyb'yo'n Jonatan, Ab'inadab' ex Malkyiswa. 3Eb'ajx tiljtzuntz ti'j Sawul; ex aq'wi kyu'nju' xjal smajil, ex b'aj xob' Sawul b'a'nxi'x kye. 4Qu'mtzun xitma'n teju' xq'uqilte:
—Iq'i'nktza tk'uẍtx'e'nb'ila ex chin t-xyuku'ya tu'n, tu'ntzun myaye' ma' xjal lu min nche niman te Dyos che b'el b'yonweye' ex tu'n lalun tz'el nch'ixawe' kyu'n, chij.
Atzunju' xq'uqilte mixti' taj, qu'n inxi'xtoq xob'. Tzajtzun Sawultz jaw tpich'b'a'nju' tk'uẍtx'e'nb'il, ex kub' t-xontib' tib'aj. 5Tetzunj tlonteju' xq'uqilte qa matxi'toq kyim Sawul, ex ikxte kub' t-xyu'ntib' tu'nxju' tk'uẍtx'e'nb'il, ekyimtzuntz kykab'il. 6Iktzu'n kyima' Sawul kyuk'i'lju' oxe' tk'wal, exju' xq'uqilte ex kykyaqilju' t-xjal toju' q'ij lu. 7Tetzunj kylonte aj Israel najlqe'toq toj jun plajtl teju' b'ya' ex toj tjawetzq'ij te Jordan, matxi'toq che kub' oqu' aj Israel te q'oj ex matxi'toq che kyim Sawul kyuk'i'lju' tk'wal, b'aj kyej kyleb'a'n nimaqkytanam ex eb'ajx oq. Aye'tzu'n pilistey eb'aj pon ex eb'aj kyejten najal kyoju' nimaqtnam.
8Tetzunj kyb'ajxju' pilistey te juntl q'ij iq'imilkye ti'xti' kyi'ju' matxi'toq che b'ajkyim, knet Sawul kyuk'i'lju' tk'wal kyu'n woqlqe' twi'ju' witz Kyilb'oa. 9El kyk'uẍpi'nju' twi' ex b'je'l kyiq'i'nju' tq'ojb'il, ex b'ajx kysma'n sanjelal q'malte toj kywi'yile kytanam pilistey ex toj tja kydyos. 10Ex e'okx kyq'o'nju' tq'ojb'il Sawul toju' ja te k'u'lb'il teju' kydyos Astarte, atzunju' t-xmilal jaw kyyob'i'n ti'ju' nintapi te B'et-san.
11Tetzunj kyb'inteju' xjal najlqe' toj tnam Jab'es toj Kalaad ti'ju' matxi'toq kyb'incha pilistey ti'j Sawul, 12eb'aj yolinju' ichan min nche xob', atzunj kyb'ajlen b'et toj qonik'an, ku'tz kyiq'i'n t-xmilal Sawul ex kyxmilalju' tk'wal tiju' nintapi te B'et-san, anjtzun kyi'jtz Jab'es, jaeb'aj kub'a' kytz'e'ysa'na'. 13Atzunju' kytza'jil ku'x kymqu'n toj Jab'es, tjaq' junwi' tze. Tb'ajlenxi'tzunju' lu e mewayin wuq q'ij.
Currently Selected:
1 S 31: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999