1 S 30
30
Kub'kyi'j aj Amalek tu'n Dab'i
1Tetzunj kypon Dab'i kyuk'i'lju' t-xjal Siklaj toj toxi'n q'ij, matxi'toq che b'ajpon aj amalek toj Nekeb', ex matxi'toq kub'ti'j Siklaj kyu'n, matxi'toq kub' kytx'u'yi'n ex matxi'toq tz'ok kyq'o'n tq'aq'al. 2Ex matxi'toq che b'ajx kyiq'i'nju' qya ex kykyaqilju' k'wal ex tijwnaq ate'toq atzu', expe' mix-a'lo'xi'toq jun kub' kyb'yo'n.
3Tetzunj kypon Dab'i kyuk'i'lju' t-xjal toju' nintnam ex tej kyka'yinte qa matxi'toq b'aj tu'n q'aq' ex matxi'toq che'x iq'i'nju' kyxu'jil, kyk'wal ex kymyal tu'n kyokx jpu'n, 4e'aq'wi ẍch'il tu'n kyoq'il ex majx e'kub'numj tu'n tpaj. 5Ex matxi'toq che'x iq'i'n kab'e' t-xu'jil Dab'i tu'n kyokx jpu'n, aye' Aynoam aj Jesreel, ex Ab'ikayl t-xu'jilb'en Nab'al aj Karmel. 6Inxi'xtoq b'isun Dab'i qu'n kyajb'iltoqju' t-xjal te q'oj tu'n tb'aj kyxon toj ab'j, qu'n matxi'toq tzaj kytx'u'jil tu'nju' b'aj kyi'ju' kyk'wal. Oktzun qe tk'u'j ti'j Qman Dyos, 7ex xitma'n teju' pale Ab'yatar, tk'wal Aymelek:
—B'inchama xtalb'il, q'intza ẍa'y, chij.
Naqtzun nb'ent tpon tiq'i'n Ab'yatar ẍa'y te Dab'i, 8xitqani'n Dab'i te Qman Dyos:
—¿Ma b'a'n tu'n nxi'ye' knolkyeju' jun k'loj eleq' lu? ¿Ma kb'elkyi'j wu'ne'?, chij.
Atzunte Qman Dyos tzaj ttzaq'we'n:
—Kna'qe'ka, qu'n kb'elkye'kyi'j tu'na ex che kletelju' pres tu'na, chij.
9Lwiyxi'xtzun exi' Dab'i kyuk'i'lju' junk'al lajnaq (600) ichan ate'toq tuk'i'l, ex e'pon jata' t-xiklil a' B'esor. E' kyejten 10lajnaq (200) ichan matxi'toq che sikti atzu', layxtoq kyipa tu'n kyik'x jlajin toju' a', aye'tzu'n junk'altl (400) xikyljo'n kyb'e tuk'i'l Dab'i knolte kyi'j leq'. 11Yajxi'tzuntl elyal jun aj Ejipt kyu'n toj chq'ajlaj, ex xikyiq'i'n twitz Dab'i, xipe' kyq'o'n twa ex tk'wa': 12xikyq'o'n jun silun twa iw ex kab'e' tmuqin ub'a tzqijsa'n. Tb'ajlenxi'tzun wanju' aj Ejipt kuwix ch'i'ntl, qu'n matxi'toq b'ent oxe' q'ij ex qonik'an na'mxtoq twan ex na'mxtoq tk'wan. 13Xi'tzun tqani'n Dab'i te:
—¿Alkye tajawa? ¿Jasaja'ya?, chij.
Xi'tzun ttzaq'we'n aj Ejipt te:
Aj Ejipt qinwe', tmajin jun aj Amalek, matxi' b'ent oxe' q'ij nkyajlen tleb'a'ne' wajawe' qu'n in yab'tiye', 14qu'n oxi'ye' elq'al toj tnayajkya'j te kytx'otx' seretey, exju' kye aj Juda ex aj Kaleb'. Ex okqq'o'ne' tq'aq'al Siklaj, chij.
15Xi'tzun tqani'n Dab'i te:
—¿Ma jaku' txi'ya yek'ulte ja ta'qe' eleq' lu?, chij.
Atzunju' aj Ejipt xittzaq'we'n te:
Qama tzaj ttziya'na weye' twitz Qman Dyos qa lay chin kub' tb'yo'na exqa lay chinx tq'o'na teju' wajawe', kxe'l wiq'i'na tzmax ja ta'qe', chij.
16Exi' tiq'i'ntzuntz ja ta'qe' eleq', matxi'toq b'ajx kysputi'nkyib'u' eleq' toj tkyaqilju' kojb'il, intoq ku'x tjaq' kywa ex intoq che wan, qu'n intoq kytzalajsa'n tkyaqilju' matxi'toq tzaj kyelq'a'n toj kytx'otx' pilistey ex toj kytx'otx' aj Juda. 17Oktzun tzaqpaj Dab'itz q'ojil kyi'j, tzyet-x tu'n te prim ex ponb'aj te qale, e'kub' tb'ajsa'n kykyaqil, noq o'qe'kx junk'al (400) ku'xun eb'ajx oq ti'j kamey min eb'aj tu'n.
18Kolpet tkyaqilju' b'ajx kyelq'a'n aj Amalek tu'n Dab'i, ex e'tzaqpetju' kab'e' t-xu'jil tu'n. 19Mixti' jun tal ti'xti' mixwitti' kolpet ti'j tkyaqilju' b'ajx elq'a'n, mixti' jun k'wal mujqa tij ichan miwtjun tzaqpet, tkyaqil e'kletile tu'n Dab'i. 20Ex eltiq'i'n Dab'i tkyaqilju' kyrit ex kywakyix, aye'tzu'n intoq che xla'jankye alu'mj intoq kyma'n qa matxi'toq che kanb'et ja'lu tu'n Dab'i.
21Tetzunj tpon Dab'i jae'kyaja'tenju' lajnaq (200) ichan min exi' tuk'i'l tu'n tpaj matxi'toq che kub'numj, ttziju' nin a' B'esor, e'tzaj k'lulkye Dab'i kyuk'i'lju' lepchqe'toq ti'j. Atzunte Dab'i xi' lq'e q'olb'elkye. 22Ate'toqtzun junjunju' t-xjal, majx tx'yanqe', eq'ojin kyi'ju' min eb'ajx kyuk'i'l, kyma qa o'qe'kxju' kyxu'jil ex kyk'wal tu'n txi' q'et kye ex mixti'te juntl ti'xti' tu'n txi' kye ti'ju' matxi'toq kolpet, exwittzunlo tu'n kyik'b'ettz. 23Atzunte' Dab'i tma:
—Lalun kyb'inchaju'ye' lu q'aye, ana'te' Qman Dyos saj q'onte qe, maqo tkol, ex mache kub' tq'o'nju' eleq' ẍe oktzaqpaj elq'alqe toj qq'ob'. 24Alkyekye' kxel b'inkye, qu'n axte nxi'ju' kye' nche kyej xq'uqilkye ti'xti' kse'nxju' nxi' kyeju' nche b'ajx q'ojil, chij kye.
25(Atxi'xtzun ttzaj qeju', a nb'inchetju' kyxol aj Israel).
26Tetzunj tpon Dab'i Siklaj, xit-sma'n jni' ti'ju' eltiq'i'n kye ajq'oj, kyeju' tijwnaq toj Juda, aye' tuk'i'lqe, ex xit-sma'nju' tqanil lu kye: Lu jun oyaj kyeye' ti'ju' sel wiq'i'ne' kye tajq'oj Qman Dyos, chij. 27Ex xit-sma'n oyaj kyeju' ate'toq toj B'etel, toj Ramot toj Neweb', toj Jatir, 28toj Aroer, toj Sipmot, toj Estemoa, 29toj Rakal, ex kyeju' ate'toq kyoju' nimaqtnam toj Jerameel, ex kyeju' ate'toq kyoju' nimaqtnam kye aj Kyenit, 30ex kyeju' ate'toq Orma, toj Korasan, toj Atak, 31toj Eb'ron, ex kyoj kykyaqilju' najb'il jaeb'eta' Dab'i kyuk'i'lju' t-xjal.
Currently Selected:
1 S 30: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999
