LAW MA NIR-NIRAMNA 27
27
1Subur tuwaŋ kay buur ma grawtnaɗi,
kay va ma buurta ma vulumna naŋ wumɗi.
2Hin sa hena suburaŋu,
may naŋ ma subur tuwaŋ hiɗi vunaŋɗi,
hin sa ma pulla di va ŋaa'a kaŋu,
may mi naŋ kay tuwaŋɗi.
3hiɗiyn ci neke, ŋesln ci neke kaw,
may ɦiyda vi sa ma ɦay-ɦayna ci nek suwum ma' pete.
4Waskayta ci mati, ɦiyda hiwir liyn ŋolo,
may sa ma as col vok hunayta mi gige?
5Lawt fok goy jaray haraŋ kayni marya,
suw bonota ta hiɗi mileta.
6A sa ma gawta fetaŋ yaŋ goyo ni,
marya banaŋ ma minaŋŋa kaŋ tuwaŋ goy mili.
7Sa ma hayam hobayna tay yumda gaa kuɗ selemu,
may sa ma mayt cumna va ma galakŋ kaw kiram jibete.
8Sa ma tulur goy gine hiɗi ziyna valamna,
ŋray ca ki layta tulur tam tokosayna va' nala.
9Mula hiɗi urdina firi dikga,
nala kaw gatta vi banaŋŋa ta hiɗi minda na' sleɗ ŋolo.
10Banaŋŋa hiɗi bana buŋŋa naŋ ma noysi goyɗi,
lo hay li ma naŋ ka vun zlata,
naŋ ma kal hay ziyna vi ɓasuŋŋaɗi;
niraŋŋa ma musi goboy hiɗi naŋŋa
suw ɓasuŋ ma musi goy gine hiɗi naŋŋa.
11Goora vanu, la naŋ yali,
dikan ma li firiya,
nala nan ma hot dita tam sa ma min muɗan zulona.
12Sa ma yalla wi joota,
nam ŋay tuwamu,
may nam ma ɦay-ɦayna jik ka'a,
nam fi bakmarana.
13Yawaŋ sligara valamu,
kay nam col tuwam hay baŋal sa mara'a,
yawaŋ sle ma deŋŋa hay ɓalamu,
kay nam col tuwam hay baŋal sa pulla.
14La san gi bol kay sugolomna hay graw culum culum,
hiɗi delem kulo ŋolo ni,
kayni ŋray ca ki nam ka beɗem nala.
15Cata ta vunna,
hiɗi ziy ma suta hay buur ma niyn sina nisi ŋray ca.
16Sa ma min tela'a ŋray ca ki nam ka tel simeɗna nala,
ki nam ka vi mula hiɗi ɓalam nala.
17Ki kawayna ligaɗ siy kaway hena nala,
san as fok ɦiyda vi niramna kulo'o ki kayn nala.
18Sa ma kot tuw gu-gumna ma tum vuɗamu,
nala kaw sa kot tuw mulamna ma fi suburta.
19Ki san ɗuw ir tuwaŋ goloŋ hay niyna nala,
dikga vi sana kaw na' hot dita tam dikga vi sana ki kayn nala.
20Liyna vi mitta hiɗi zul ma wiŋŋa hayam as hobɗi;
nala kaw ira vi sana as hob kay ɗuwnɗi.
21Ora yorom hay fuura,
doorota yora' hay zulla,
may sana kitat ka kalam ɗawni kuɗ selem ma tiyna.
22Sa ma ɦay-ɦayna la naŋ ɗuwum hay zuwna,
ki cat ɗuw wana hiɗi goor-zuwn nala kaw,
ɦay-ɦayta valam ta talamta as pulok goyɗi.
23Naŋ ma wi fok-dimina vaŋ goy kalam kep kep ŋaa'a,
naŋ ma kot tuw farayna vaŋu.
24Kay farayna mus ta-ta hay vatɗitɗi,
gaŋeraŋa as mus ta-taɗi kaw.
25Hosona as ŋal goyo, goɗna vurnaya,
us ma kay hiɗiyna zamis kulo'o.
26Fok-dimin ka kayni kay gan tuwaŋ hiɗi namu,
fok-meen ka kayni kay naŋ li lop sinen hiɗi namu.
27Miira vi fok-meena as kay tina vaŋu,
hiɗi ziyna vaŋu,
kay ti boy sa sunda vaŋu kaw.
Currently Selected:
LAW MA NIR-NIRAMNA 27: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001