LAW MA NIR-NIRAMNA 28
28
1Sum sa joona mun jaŋi bay sa digiɗsiya,
may sum sa ɗigera tuwsi wirsiɗi ki zlo joriyona nala.
2Hay li ma nagata ka vun duura,
Sum sa ŋulona va'a ka dak-dak,
May mulla ma ka hiɗi wida hiɗi yalla,
mulda valam mus ta-ta.
3Sa ma hawna ma curoɗ sum sa vun lasta nam ŋray ca
hiɗi niy ma si ŋolo may mar kiɗata nala.
4Nisi sa noy vun-ma-gatna goyna
ka vul suburta tam sa ma joona.
May nisi sa li kuɗ vun-ma-gatna ka muɗ ɦiy talamu.
5Sum sa tuwsi vuli goy tam joota as hum va ma ɗigeraɗi,
may nisi sa gar Ma-Vatɗina hum caw slen kafe.
6Sa ma hawna ma poy hay ɗigerta,
nam ŋaa'a suw sa ma faraya may hagata valam guniya.
7Sa ma li kuɗ vun-ma-gatna nam mi goor ma yali,
may goor ma poy hiɗi sum sa viyuwna mar zulota kay bulumu.
8Sa ma tok farayna hiɗi niyam kuɗumu,
hiɗi haramda nam tokom kulo kayni kay sa var kay sa hawna.
9La san muɗ humam goyo kay hum kuɗ gattaɗi,
siɗawta valam kaw liwisi.
10Sa ma cal sum sa ɗigera goy hay hagata gunita,
nam ma nig gaa hay zul ma nam jugoɗomna.
May sum sa ɗigera ma yaw ŋaata-ŋolda voco'o.
11Sa ma farayna ɗuw tuwam yali;
may sa ma hawna ma ka hiɗi wida as fekemu.
12Hay li ma sa ɗigera kolawa,
kayni ti gajijita ŋolda;
hay li ma sa joon kolawa,
gigekaw gar kay ŋaya.
13Sa ma ŋay sulukŋa valamu as wul vokɗi,
may nam ma ham sulukŋa valam goyo,
noyom goyo kaw, nam ma fi slugota.
14Sle'ta ka kay sa ma mus dok-dok hay narta,
may sa ma so'otayna ma nig gaa hay joota.
15Sa ma joona ma ka ti mulu kay sum sa hawna,
nam ŋray ca ki zlona ma ka ci gumu,
hiɗi ursena ta mayt ka cum nala.
16Mul ma bay-yalla li lop ma curoɗ sumuna ŋolo,
may sa ma gaw hiɗi fita ta bay-ɗigerta ma mus ta-ta.
17Sa ma busuw sa hen tuni kalamna jaŋ ta-ta gaa hay zulda:
Hin sa telemɗi.
18Sa ma poy hay dikga ɗigerta ma fi su'da,
may sa ma sli hagata gunita ma' pet ma nig gaa hay ta kepta.
19Sa ma zum sinena valamu hayam ma hob hiɗi tina,
may nam ma tuɗ kuɗ sle ma waana ma hob hiɗi hawta.
20Sa ma ɗigera ma fi bolda.
May sa ma min muɗ faray koloyo ma fi gat-vunda.
21May ŋaa'a kay poŋ ir sumunɗi,
kay slurguɗum fun ne' ɦawa,
san as kal tuwam hay sulukŋa.
22Sa ma niŋa slena gar kay muɗ faray koloyo,
nam may wi ala kiɗata ma co kalamuɗi.
23Sa ma di sumun kirsina fi slugot bugol kayni,
suw sa ma vunam ka hiɗi ɗutta.
24Sa ma kul bulumu hiɗi sulumu,
may bugolda nam di ala kayni may mi sulukɗi,
namu mi nir sa ma ɓulak slena.
25Sa ma dikam min slen ŋolla mar ci-wayta,
may nam ma hin tuwam hay ɓam Ma-Vatɗina hoba.
26Sa ma var kay tuwam nam toŋŋa mi sa ma ɦay-ɦaya,
may sa ma poy hay yalda ma suɗ goyo.
27Sa ma vul slen mi sa hawna kiɗata as fumɗi,
may nam ma duk iramu hob hiɗi be'da.
28Hay li ma sum sa joona fok kulo'o,
gigekaw gar kay ŋaya;
hay li ma nisi mit goyo,
sum sa ɗigera biya ŋolo.
Currently Selected:
LAW MA NIR-NIRAMNA 28: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001