LAW MA NIR-NIRAMNA 29
29
1Sa ma nagay kay gatta,
may so'ot dikamu,
nam ma mit gosoyo bay gurgunu ma muɗum ŋaa'a.
2Hay li ma sum sa ɗigera biya'a,
sumun ka hay firita;
hay li ma sa ma joon ka ti mulda,
sumun kaf tiya.
3Goora ma min yalda li dik bulum firiya,
may nam ma poy hiɗi boy sa viyuwna ɓulak farayn goyo.
4Mulla muɗ nagat dono'o hiɗi ɗigerta,
may nam ma yaw slen hay ɓam sumuna ɦo nagat gaa'a.
5Sa ma ɗut ɓasulumna ka gan jawt gaa vokomu.
6Jawta ka gani hay sulukŋa vi sa ma joona,
may sa ma ɗigera ma kola,
ma li firiya kaw.
7Sa ma ɗigera wi maŋayta vi sa hawna,
may sum sa joona wida visi mayɗi.
8Sum sa burahta fo kuta hay hoyok-ziyna,
may sum sa yalla tun ɦiyd gaa'a.
9La sa ma ɗigera ci way hiɗi sa ma ɦay-ɦayna,
nam as muɗ ɦiya, as muɗ cen kaw,
may nam fi tun-sukkaɗi.
10Sum sa ɦok busuwna gaw hiɗi sa ma ɗigera,
may sum sa ɗigera ŋom irita valamu.
11Sa ma ɦay-ɦayna ŋayayta valam mayɗi,
may ma yalla ŋom ŋayayta valamu.
12Hay li ma mulla tun ŋalda valam tam yoboy ma sinna,
sa sunda valam kaf si sum sa joo'o.
13Sa ma hawna hiɗi sa ma curoɗ sumuna fi tuwsiya;
sa ma malsi irsi goy ma' petna mi Ma-Vatɗina.
14Mulla ma ka kitata vi sum sa hawt hay liya'na,
zlamda-mulda valamu ma col dono dok-doko.
15Zugulda hiɗi watta vul yalla,
may goor ma vokom hini siriŋŋa muɗ sulum zulo'o.
16Hay li ma sum sa joon biyawa,
sulukŋa jor voko;
may sum sa ɗigera ma ɗuw cuk-gaata vi sa joon hiɗi irsiya.
17Gataŋ goora vaŋu,
nala nam ma vulaŋ tun-suku,
nam ma vul sle'ta mi ciwta vaŋu.
18Hay liyn ma sle ma vul tuwam kir sa jobta may loɗi,
sumun tupa kay tuwsiya;
sle'ta kisiya la nisi li kuɗ gatta.
19Gat sa ma gorvona hiɗi yoboyn ɦawaɗi,
kay la nam hum dita kaw,
nam may hot yalam gaaɗi.
20La naŋ wi sa'a di yoboyn bay varta,
sa ma ɦay-ɦayna ŋaa'a suwumu.
21Sa ma gorvona la naŋ hatawa giɗelem delem hay joriyota valam pa,
hay dabta nam muɗ ɗuw tuwam ki nam mi goor ma vuɗiya nala.
22Sa ma ci wayta fok ɦiyd kulo'o,
sa ma jiw-zlata mar ci-matta ŋolo.
23Sa ma subur tuwamna yalam ma hot gaa'a,
may sa ma hot yalam gaana fi gajijita.
24Sa ma ɓuraw slen hiɗi sa ma kulla ka ka gaw hiɗi ciwta valamu,
nam wi be'da, may nam di goyɗi.
25Narta vok sumuna gan jawta,
may nam ma vi hay Ma-Vatɗina ka ŋomiya.
26Sumuna ŋolo gar kay fi slugota vok ir mulla,
may kitata ta gasita may vi Lawn pa.
27Sa ma slugut kitata nam liwisi kay sum sa ɗigera,
sa ma hagata valam ɗigera nam liwisi kir sum sa joona.
Currently Selected:
LAW MA NIR-NIRAMNA 29: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001