LAW MA NIR-NIRAMNA 26
26
1Ki tukŋa ma hay cayda nala,
ki niy ma si hay liyna vi feɗna nala,
ki kayn nala kaw gajijita na' may nagay dik sa ma ɦay-ɦaynɗi.
2Ki layta pir goyo nala,
ki lay-ŋusna fok nala,
be'da ta hay hagata va'ɗita na' li va noŋ ne'ɗi kaw.
3Libetna nam koti kay kulumna,
jamana nam koti kay kurona,
tilekŋa kaw nam koti kay ŋor sum sa ɦay-ɦayna.
4Naŋ ma hot dit tam sa ma ɦay-ɦayna kuɗ ɦoyta valamɗi,
kay naŋ kay tuwaŋu ma li ki nam naɗi.
5Hotaŋ dita tam sa ma ɦay-ɦayna ki nam ɦoyay nala,
kay nam ma ɗuw tuwam ki nam yali naɗi.
6Sa ma di sunda vun sa ma ɦay-ɦayna nan ka ka gayam goyo,
nam ka ci bay-ɗigerta.
7Yoboyn ma hay vun sa ma ɦay-ɦayna nam ŋray ca
ki gay ma dirlayna ma maŋayna nala.
8Sli yam sa ma ɦay-ɦayn kulo'o,
kayni ŋray ca ki jun hiɗiyn vun tiwlekŋa nala.
9Ɓakŋa hay vun sa ma ɦay-ɦayna,
kayni ŋray ca ki sa ma ɦoyay ki vinna
ma zigiyn ka ciy way-ɓalam zaw nala.
10Sa ma cuk sum sa ɦay-ɦayna hiɗi sum sa min capna vokomna,
nam ŋray ca hiɗi sa ma gi ɓarawta ma ka tuw sumun kaf goy mili nala.
11Sa ma ɦay-ɦayna hot kay ɦoyta valamu,
ki diyna hot ti vinna valamu nala.
12La naŋ fi sa ma ɗuw tuwam kir tuwam yali,
naŋ as zam ɓam sa ma ɦay-ɦayna suwum namu.
13Sa ma zulomda di'e:
Zlon ka goy hay hagata,
zlon ka hay hagana vi hoyok-ziyna.
14Sa ma poyna ɦir gaa hay zlatta valamu,
ki cokoromna ɦir kat vun-ziyda nala.
15Sa ma poyna kal ɓalam gaa hay ŋalayta,
nara' kulo vunam kayni makamu.
16Sa ma zulomda ɗuw tuwam yali,
suw sumun siɗiya sa hot dit hay liya'a.
17Sa ma jik hay hagata,
may kal tuwam hay ɦiyna,
nam ŋray ca hiɗi sa ma mok diyn hay humamna nala.
18Ki sa ma muɗi ɦiy ŋolo yak kut kulo'o,
gi ɓarawt goyo,
kay ci-goyta nala,
19sa ma ɗut sugolomu,
may nam di ala kayni mi zah ɦawa'ana,
nam kaw ki kayn nala.
20Gun la mayɗi, kuta tew goyo,
nala kaw, la sum sa ka sinda sayɗi,
nefta kaw tayɗi.
21Sa ma gar cirepta fok ci-wayta,
ki veŋŋa vi kut kulo'o,
ki guna ɗok kut kulo'o nala.
22Yoboyna vi sa ma ka sinda ki ti ma jibetna nala,
nam kal ta-ta gaa hay ruwat sana.
23Dita ta galakka hiɗi dikga ta joota ŋray ca
ki suɗoy doorona ma koray tam doway ma nagana nala.
24hiɗi vunamu sa ma ka gawta jok tuwamu,
nam tun ɗutta hay dikam kalafi.
25Hay li ma nam di delem ma lumaɗna,
naŋ vi kuɗumɗi,
kay liwista ka kalaf hay dikam siɗiya.
26La nam ŋay gawta hay dikam kalafi,
joota valamu ma ɗek tuwa' goy hay tokŋa.
27Sa ma jugoɗ zulda hot nig gaa haya' mi namu,
sa ma ligat hiɗiyna hiɗiyn hot kirapam gaa'a.
28Dita ta sinda ka gaw hiɗi sum sa na' kirapsi gaa'a,
vun ma ɗutta mar ɓulak-goyta.
Currently Selected:
LAW MA NIR-NIRAMNA 26: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001