LAW MA NIR-NIRAMNA 25
25
LAW MA NIR-NIRAMNA MARA'A VI SALOMON
1Tan kayni lo mi law ma nir-niramna vi Salomon,
tapam si sumuna vi Ezekiyas mulla vi Yuda.
2Gajijita vi Lawna kayni kay ŋay slena;
gajijita vi muliyan kayni kay fek slena.
3Ki dukalawna ka kulo gine'e,
ki way nagata gaa zulu nala kaw,
varta vi mulla ta san as feka'ɗita na' ki kayn nala.
4Slaŋ ir suɗoy-dooron goyo,
nala naŋ ma yor dowayta,
5slaŋ ir sum sa joon goy vok mulla,
nala zlamda-mulda valamu ma fi donota hiɗi ɗigerta.
6Subur tuwaŋ vok mullaɗi,
mus hay liyna vi sa ŋulonɗi.
7Kay ŋaa'a kaŋu hay li ma nisi di taŋ ala:
«jikaŋ kulo tani»,
suw kay ma nisi hotaŋ yaŋ gaa vok yerimana.#25:7 Ɗuw hay Luk 14:7-10.
8Naŋ ma kal hay ci-wayt koloyɗi,
kay la li ŋalɗi,
hay yam dabta vi lawta naŋ wi va ma naŋ liɗi,
hay li ma sugolaŋŋa ŋulaŋawa.
9Colaŋ kay lawta vaŋu vok sugolaŋŋa,
may pat dir ŋayayta vi sa mara goyɗi.
10Kay la nam humawa ni,
nam ɗawn ma ŋulaŋu,
semda vaŋ ta tiy goy joota ɗawn ma jor voko.
11Ki ora moki hiɗi doorota nala,
yoboyna ma dum kay kayni nam nala kaw.
12Ki jaɓna ma ora tapay hiɗi ganna vi ora ma beɗaya nala,
sa ma jak humam tam sa ma yalla ma vul gatta kaw nam nala.
13Ki liyn ma sleɗay kuɗ tukŋa hay buura vi feɗna nala,
sa ma giy sunu ma hob vun dita hay liya'na kaw nam nala;
nam vul tun sukka mi ciwta vi mulamna.
14Sa ma subur tuwam hay vulda ta nam bay vula' goyta nam ŋray
ca ki ɗugulla hiɗi simeɗna ma bay niyna nala.
15Fok ɦiy gosoyɗita girif mulla gaa vokaŋu,
dita ta lumaɗta kus zokŋa.
16La naŋ fi yumdawa,
naŋ ma ti'e kay hoba, kay la naɗi,
naŋ hob cep-cep' ɗawn nam ma vin goyo.
17Tuɗ vo vi sugolaŋ tum-tumɗi,
kay la nam makawa kaŋu,
nam ɗawn ma kaŋ gawi.
18Ki kup-kupna, kew-gaferaŋa
hiɗi ɓaraw ta siya' hilew-hilewta nala,
sa ma li di-goyta ta sinda kaw nam ki kayn nala.
19Ki siyna ma goy toyo hiɗi gayna ma dirlayna,
sa ma tun vida valamu kay sa ma ɦay-ɦayna
hay buura vi sum-zlata nam ki kayn nala kaw.
20Sa ma fok sligar ma talamna goyo hay liyna vi sleɗna,
sa ma ɦok futura hay vun milla,
hiɗi sa ma gi nulla tam sa ma vun yorta nisi ŋray ca.
21La sa ma gawt kaŋŋa mayt ka cumu,
vulum va ma ti'e;
la laat ka lumu,
vulum niy ma ci'e.
22Kay hiɗi kayni naŋ ma tok veŋ ma kuta kulo kalamu,
nala Ma-Vatɗina ma wurakaŋu.
23Simeɗ ma may gal gaana mar niyna,
nala kaw sinda ta di slen goy ŋayaya ɓulak dikga.
24Ŋaa'a kay mus goy gef-ziyna
suw musta hay ziyna hiɗi cata nefta.
25Labar ma ŋaana ma may goy gine pana
nam ŋray ca hiɗi niy ma sleɗna,
ma vulum mi sa ma may goy makay pana.
26Niy kaara ma durgusi kulona
hiɗi kaata ta niyna va' joota,
kayni ŋray va ki sa ma hin tuwam li nar vok sa ma joona nala.
27May ŋaa'a kay ti yumda ŋolɗi,
may kay gar suburta vi sum segena
kayni vul sli yam kulota.
28Sa ma gaŋeraŋa valam hay ɓam sa mara'a,
nam ŋray ca ki hoyok-ziy ma gulmun ŋuyi talamɗina nala.
Currently Selected:
LAW MA NIR-NIRAMNA 25: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
