LAW MA NIR-NIRAMNA 24
24
1Naŋ ma niŋa sum sa joonɗi,
tap hiɗi nisiɗi kaw.
2Kay diksi gara' ti ɓulakka,
vunsi dum mi sle ma jiw-zlata.
3hiɗi yalla sem-ziyna tun gaa'a,
hiɗi yamda-wida ziyn as col dono'o.
4hiɗi wida, hay ziy ma kalafna hob hiɗi sle ma ŋaana,
hiɗi ma jifiyna kafe.
5Sa ma yalla gaŋeraŋa valam ŋolo,
sa ma wida hobay hiɗi donota;
6kay naŋ ma li duura hiɗi yali,
su'da may goy vi sum sa vul gatta sa ŋol dak-dakŋa.
7Yalda na' ɗuw jami kay sa ɦay-ɦayna,
nam as di vunamu jar tokŋaɗi.
8Sa ma var kay li joota yum ala sa ma hobay hiɗi mileta.
9Varta ta ɦay-ɦayta mi suluku,
sa ma panta nam jar sumun liwisi.
10La naŋ muɗ maŋaya hay buur ma makka,
gaŋeraŋa vaŋu ti maŋayta kaw.
11Sum sa nisi ka tansi vun mitta naŋ ma butsi goyo,
sum sa nisi narsi kay ŋatsi goyo naŋ ma suɗsi goyo.
12La naŋ di ala: a'a, numa wi kaynɗi,
sa ma fek dikga as wi kaynɗi su?
Nam ma ŋom ciwta vaŋu as wi kaynɗi su?
Nam ma vul mi gigekaw kuɗ lopna valamɗi su?
13Goora vanu, taŋ yumda, kay na' ŋaa'a,
sotona vi yumda nam ŋaa'a hay vunaŋu.
14Nala kaw, garaŋ yalda kay ciwta vaŋu;
la naŋ fa'awa, na' ma gutaŋ voko,
cubta-sle'ta vaŋu ma ba goy waaɗi.
15Naŋ ma gan jawt vok sa ma ɗigera hiɗi dikga ta wastaɗi,
liyn ma nam mus hayna naŋ ma ɦom gaaɗi kaw.
16Kay la sa ma ɗigera puk gaa sem siɗiya kaw,
nam hot fok kulo'o,
may sum sa sulukŋa zuti gaa hay joota.
17Naŋ ma li firi kay ni-gaata vi sa ma gaw kaŋŋaɗi,
naŋ ma li firiɗi hay li ma nam nig gaa hay joota,
18kay hay li ma Ma-Vatɗina iram wi kayni,
dikam ɗawn ma ɓulaka,
ɦiyda valamu kay san kayni nam ma muɗa' dela'a.
19Naŋ ma ɓulak dikaŋ kuɗ sum sa li jootɗi,
dikaŋ ma taŋ kuɗ sum sa joonɗi.
20Kay sa ma li joota as na vokɗi,
fitilla vi sum sa joona ma tew goyo.
21Goora vanu,
laŋ nar kuɗ Ma-Vatɗina hiɗi mulla;
naŋ ma tap hiɗi sum sa muɗ vaara visinɗi;
22kay ɓulak-goyta visi ma co kisi gosoyo,
kitata ta min co kay segena hiɗi segena,
sa ma wa' ɗawni mi gige?
YOBOY HENA VI SUM SA YALLA
23Tan kayni lo mi va ma may goy vi sa yalla pa:
Ka ir sumuna vun kitata kayni may ŋaaɗi.
24Sa ma di mi sa ma joon ala naŋ li hay liyamu,
sa namna sumun ma ŋulumu,
jaf-sumun ma beɗemu.
25Nisi sa ka kitata kay sum sa jo'ona ma fi ŋaata,
bolda ma co kisiya kay vulsi ŋaata.
26Sa ma hot dit hay liya' ɗigera,
nam mi sa ma fetaŋ yaŋ goyo.
27Kotaŋ lopna vaŋ ma goy jiyna,
vataŋ lopna vi sinena vaŋ kaf,
bugol kayni inaŋ ziyna vaŋu.
28Li di-goyta kay ɓasuŋŋa bay lawtaɗi;
naŋ min ɗut hiɗi vunaŋ su?
29Nam ma li tan nala,
nan kaw min li talam nala naŋ ma di naɗi.
Wurak mi gigekaw kuɗ lopna valam kayn mi nanu.
30Nan jik kat sinena vi sa ma zulomda,
nan jik kat sine gulda-guldana vi sa ma ɦay-ɦayna.
31Ɗuw kayni, gu-zigiyn ka si kulo hay liyn kaf,
zigiy-olla ka hobi kay nagata,
gulmun ma ini hiɗi hiɗiyna ka ɦoy gaa'a.
32Nan ɗuw hiɗi ŋali,
nan fi hatta kuɗ va ma nan wumu.
33Naŋ min kal sen neɗe,
naŋ min tun sukaŋ neɗe,
naŋ min slew ɓaŋ war-digaŋ neɗe kay kal sene.
34Nala hawta ma bowoŋu,
ki sa ma cigeɗna nala,
kiɗata ma co kaŋu ki sa ma duura nala.
Currently Selected:
LAW MA NIR-NIRAMNA 24: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
