MARKUS 3

Mat 12:9-14; Luk 6:6-11

1Nam kal hay sinagogŋa mara lo. Sa ma ɓalam keŋkeleŋŋa ay hay liy namna dam'. 2Nisi ka cigeɗ Yesu ala, la nam fi yerem goyo hay buura vi sabatna klasige, kay nisi fi mar lawt kalamu. 3Yesu di tam sa ma ɓalam keŋkeleŋŋa ala: fokaŋ kulo'o, colaŋ kulo jar sumun tani. 4Nam disiya: vun-ma-gatna min ala hay buura vi sabatna san ma lum mi va ma ŋaa'a lebo va ma joo'o su? A suɗ irita vi sana lebo hina' ba goy su? May nisi lak kiliŋ. 5Nam cuk iram kisiya, muɗ ɦiya, nam yor tuwam kay yisi ma ɗeŋ ŋolla. Nam di tam sana: meɗaŋ ɓaŋ goyo, nam meɗ ɓalam goyo, na' muɗ goy ŋaa'a de'. 6Sum sa Farisen cuk goy jiya, nisi ŋra vun-tuwsi gosoy wit hiɗi sa Herodiyana kay gar yal ma bam iram goyo.

Vilekka vi sa hatayn sa doogo yam ma'na

Mat 10:1-15; Luk 6:12-19; Lop Ap 1:13

7Yesu hot hiɗi sa hatayna valam goy kel niy-lumna, sum sa Galileyan ŋolo tuɗ kuɗumu, 8Sum sa Yudana, sa Yerusalemna, Sa Idumiyana, sa goy gal bugol vi Yordan hay galla vi Tirus hiɗi Sidon, sumun ŋolo hay li ma nisi hum labara kay slen ma nam ka lumna kaf, nisi ma talamu. 9Nam di tam sa hatayna valamu kay nisi ma musum hay goor lum tara kepe, kay sumuna ma hebem kuloɗi. 10Kay nam ka yer sumun goy ŋolo, kuɗ na'ta nisi sa ka hiɗi moyna hebem kulo'o kay jomu. 11Hay li ma fuliyan ma liwisna wumu, nisi girif gaa vok Yesu, siwel ala: naŋu mi Goora vi Lawna. 12May Yesu lawsi hiɗi dono'o ŋolo, nam disi ala nisi ma ɗek sumun goy kalamɗi.

13Bugolda nam jik kulo hay hiɗiyta, nam yi sa nam min yisina, nisi ma talamu. 14Nam vilek sara goy doogo yam ma', kay nisi ma lak hiɗi namu, kay nam fi cuksi goyo kay kus yoboyna, 15kay cuksi goy kus yoboyna hiɗi gaŋeraŋa kay digiɗ fuliyan ma joon goyo. 16Kayni semda vi sa doogo yam ma' sa nam vileksi goyna: Simon ma nam kaam semda valam ala Peter, 17hiɗi Yakub goora vi Sebedew, hiɗi Yohana ɓasum Yakubna, nisiya nam kaasi gileta visi ala Buwanerge: kayn ala gurona vi law-ma-bayna, 18hiɗi Andre hiɗi Filip, hiɗi Bartelemi, hiɗi Matewus hiɗi Tomas, hiɗi Yakub goora vi Alfewus hiɗi Tadewus, hiɗi Simon ma Kanaaniyana, 19hiɗi Yudas Iskariyot sa ma di newt kalamna.

Suluk ma kat Ŋusta-Peldetta

Mat 12:22-37; Luk 11:14-23

20Bugolda nisi hotay vo'o, sumun tok mara lo, ta-ta muɗ kayni nisi fi fu ma tiɗi. 21Hay li ma sa hay jafna valamu hum kayni, nisi cukay goyo kay vumu, kay nisi di'e: Nam guruɗi goyo.

22Sa wi-ɗota sa may kulo Yerusalem pana di'e: Beelzebul ka kalamu, kay nam digiɗ fuliyan goy kayni hiɗi mulla vi fuliyana. 23Nam yisi talamu, law tisi hiɗi law ma nir-niramna ala: Satan fi digiɗ Satan goyo ir nanige? 24La mulda dur jar-tuwa'a, na' fi musɗi! 25La ziyna dur jar-tuwamu, nam fi musɗi. 26La Satan fok kulo kay dur tuwam jar tuwamu, nam ɓurawaya, fi musɗi, may nam vat goyo.

27La san jun sa ma donon jewɗina, nam fi kal hay ziyna valamu kay vurum slena valamɗi, junum jun tuwa, bugolda nam fi vurum ziyna valamu may. 28Nan digi gasita, gurona vi sumuna ma fi gida kay sulukŋa visi kaf, hiɗi ŋulda visi kaf ta nisi ka ŋul hiɗi na'a kaw, 29may sa ma ŋul Ŋusta-Peldetta ta-ta hay vatɗit kaw nam fi gidaɗi, may kitat ka kalamu kay suluk ma vatɗina.

30Yesu ka di ki kayn nala kay mige nisi di ala ful ma liwisna ka kalamu.

Sum Yesu hiɗi ɓosiyomna

Mat 12:46-50; Luk 8:19-21

31Hay li namna sulumu hiɗi ɓosiyomna co'o, nisi lak goy jiya, nisi gi sun kalamu kay yumaya. 32Sumun ka tokay talam ŋolo, nisi ka di talam ala: Humaŋu, suŋu, ɓosiyoŋ sa jufayna hiɗi sa boyn kaw ka garaŋ goy jiya. 33May nam hot dita: sunu ti gige? Ɓosiyonna si gige? 34Bugolda nam cuk iram kay sa dakay talamna ka di ala: Lakŋi si sun nanu hiɗi ɓosiyon nanna. 35Kay gigekaw ma li minda vi bunu, namu mi ɓasun nanna, ɓasun nanda hiɗi sun nanu kaw.

Currently Selected:

MARKUS 3: Massana

Highlight

Copy