MARKUS 2

Yesu yer sa ma hurɓulin goyo

Mat 9:1-8; Luk 5:17-26; Yoh 10:36-38

1Bugol buur neeɗa lo Yesu hot hay Kapernawum. Labara jok goy ala nam ka vo'o. 2Sumuna dakay talam ŋolo, muɗ kayni liyn ma lakka may noŋɗi, goy vun-ziyna liyn mayɗi kaw, nam kus yoboyn tisiya. 3Nisi mar sa ma hurɓulin talamu, sumun kuɗum ziyim fiɗi. 4May nisi fi hagat kay maram tam Yesuɗi kay sumun ka dakay ŋolo, kay na'ta nisi jik kulo kay yam-ziyda, nisi mal baŋan hay ir-ziyda, nisi sir sanay gaa hiɗi va ma buura valamu hay li ma Yesu coli hayamna ɗiger. 5Hay li ma Yesu wi vida visiya, nam di tam sa ma hurɓulina: Goora vanu, sulukŋa vaŋu ɦasawa goyo. 6May sara'a jar sa wi-ɗota ka lakay lak, hay li ma nisi hum yoboyn kayni, nisi di hay diksi kalaf ala: 7San zawni di nala kayn kay mige? Nam ŋul Lawnawa. Sa hena ma ɦas sulukŋ goy ɗawn mi gige? May mi Lawn kepɗi su? 8Wulini wulini Yesu wi hay ŋusam ala nisi ka var haysi kalaf nala, nam disiya: nigi var nala hay dikgiya kay mige? 9Bay lop kayn mi ma di tam sa ma hurɓulin ala sulukŋa vaŋ cukawa goyon lebo, mi ma di ala fokaŋ kulo'o, slaŋ va ma buura vaŋu tuɗaŋun su? 10May kayni kay nigi ma wi ala Goora vi sana gaŋeraŋa valam ka gaa kay nagata kay ɦas sulukŋ goyo. 11nam di tam sa ma hurɓulina: nan vulaŋ hagatawa, fokaŋ kulo'o, slaŋ va ma buura vaŋu, tuɗaŋ vo'o hay ziyna vaŋu. 12Wulini wulini nam fok kulo'o, sli va ma buura valamu, kalay goyo kirsi kafe, nisi kaf muɗ ɦuyum', nisi subur Lawna ka di'e: Ir sle ma ki kayn nala numa bay wum tuwa.

Yita vi Levi, lawta vi laata

Mat 9:9-13; Luk 5:27-32

13Yesu kal ay goy deŋel niyn mara lo. Sumun kaf tok talamu, nam tun caw hatsiya. 14Hay li ma nam raw vokomu, nam wi Levi goora vi Alfewus, musi hay liyn ma tar vun-lumun dam', nam dumu: Tapaŋay kuɗanu. Nam fokay kulo'o, tapay kuɗ Yesu. 15Bugol kayni Yesu ti fun vo vi Levi. Sum sa tar vun-lumuna hiɗi sum sa sulukŋa ŋolo lakay gaa'a kay ti fun hiɗi namu hiɗi sa hatayna valam kaw, kay nisi ay tapay kuɗum ŋolo. 16Hay li ma Yesu ka ti hiɗi sa tar vun-lumuna hiɗi sa poyta visi joona kaw; sa wi ɗota hiɗi sa Farisena ka di tam sa hatayna valam ala: Nam ti'e ci kaw hiɗi sa sulukŋa hiɗi sa tar vun-lumuna kayn kay mige? 17Hay li ma Yesu hum kayni nam di tisiya: sum sa bay moyna gar doktorɗi, may gar doktor si sa moyn tisina, nan ma kayni kay gar sa ɗigeraɗi, may sum sa sulukŋa.

18Sa hatayna vi Yohana hiɗi sa Farisena li laata, nisi maawa dumu: Sa hatayna vi Yohana hiɗi sa hatayna vi sa Farisena li laata, may sa hatayna vaŋu li laatɗi kay mige? 19Yesu hot disiya: sum sa yiy hay dabayna fi li laata hay li ma juf-cata ka musi jarsi damna su? Hay li ma juf-cata ka jarsi damna nisi as li laatɗi. 20May buur ma nisi ma vi juf-cat goy jarsi pana ma co'o, hay na'ta nisi ma li laata.

21Sa fi duɓ sligar ma wulina vun sligar ma busaynɗi, kay la naɗi sligar ma wulina ɗawni ma jet sligar ma busayn goy kuɗumu. Jet-goyta valamu ma li ŋol suwa. 22sa fi sel vin ma wulina hay tiliy ma busaynɗi kaw, la naɗina vinna ma mun tiliyn goyo; vinna ɓulaka, tiliyn ɓulaka kaw; may vin ma wulina as selem hay tiliyn ma wulina.

Sabatna hiɗi yam-wana. Sa ma ɓalam keŋkeleŋŋa

Mat 12:1-4; Luk 6:1-11

23Buur tara kep Yesu jik sinena vi alkamarena, kayni hay buurta vi sabatna, sa hatayna valamu tun caw kus yam alkamarena hay tu'da visiya. 24Sa Farisena dumu: Ɗuwaŋ tige, sle ma telay kay lum hay buura vi sabatna nisi lum kayn kay mige? 25Yesu hotsi dita: nigi bay ɗuw hay ɗot tuwa kay va ma David lumna su? Hay li ma mayt tun caw cumu, namu hiɗi sum sa kuɗumna kaw, 26nam kal kalaf hay ziyda vi Lawna hay liyna vi mul ŋol ma-ɗifinna Abiyatar, nam ti caw funa, ma kuɗ vun-ma-gatna sa fi tumɗi, may tum si muliyan sa-ɗifinna tuta. Nam vul fun mi nisi sa kuɗumna kaw. 27Bugolda nam di tisiya: sabatna koti kay sana, sana may koti kay sabatnɗi. 28Kay na'ta Goora vi sana mi mul sabatna noŋo.

Currently Selected:

MARKUS 2: Massana

Highlight

Copy