MARKUS 4

Law ma nir-niramna kay sa ma was-jafna

Mat 13:1-23; Luk 8:1-15

1Yesu tun caw hat lo kel niy-lumna. Sumun ŋolo dak talamu, nam jik hay lumda, kal mus goy goloŋ hay niy-lum ma ŋolla, sumun kaf mol kulo deŋele gaa kay nagata. 2Nam hatsi ŋolo hay law ma nir-niramna, hay hatta valamu nam di tisi ala: 3Humgiya: sa ma was-jafna kalay goyo kay wasam gaa'a. 4Hay li ma nam ka wasamu, hena ni paŋay hagana, layna ma'a tumu. 5Hen nig hay hagata ta goorhoyona, hay li ma nam fi nagat gaa kuɗum ŋolɗi, nam day kulo gosoy wit', kay nagata valamu may gaa zulɗi. 6Hay li ma fatta dayawa kulo'o, nam war goyo, kay sutiyam cuki gaaɗi, nam so goyo. 7Hen nig jar zigiyna, zigiyna wul kulo'o muruɗumu, nam li jafɗi. 8Hena nig jar nagata ŋaata, nam wul kulo'o li jaf ŋolo kaw. Hena yaw dok-ɦidi, hena yaw dok-karkiya, hena yaw kis may. 9Nam disiya: sa ma humam ka'a kay huma, nam ma huma.

10Hay li ma nam hin valam kepe, nisi sa ŋuyi talamna hiɗi sa doogo yam ma'na jobom kay law ma nir-niramna. 11Nam di tisiya: ŋayayta vi mulda-wuralawna na'ta kayni vuli tigi nigiya, may tam nisi sa goyna, slen vuli tisi kaf hay law ma nir-niramna. 12Kay nisi ma wi'e, wi goy haraŋɗi, kay nisi sa huma, may humum cawamɗi, kay nisi ma hamɗi, fi gidaɗi kaw.

13Nam disi lo: Law ma nir-niramna kayni nigi humum cawam su? La law ma nir-niramna kayni nigi humum cawamɗi, nala law ma nir-niram hena nigi humum cawam ɗawn humtige? 14Sa ma was-jafna was yoboyna. 15may nisi sa wasay paŋay hagata kayni si nisi sa yoboyna wasay haysina, hay li ma nisi humumawa, wulini wulini Satan ma'a, yaw yoboyn ma wasay haysina goyo. 16Nala kaw, nisi sa wasay kay liyn ma hiɗiyna, kayni si nisi sa hum yoboynawa, wulini wulini nisi vum hiɗi firita, 17sutiyam may cuki gaa haysiɗi, nisi mus hay vida ir neeɗa, may hay li ma zumalda hiɗi lasta coowa kisiya kuɗ yoboyna, nisi hor de'. 18Segena sa wasay jar zigiyn kayni si nisi sa hum yoboynawa, 19may varta kay slena vi nagata hiɗi nemda vi farayna hiɗi darta vi sle hena cuk kalafi muruɗ yoboyna, nam li jafɗi. 20Nisi sa wasay hay nagata ŋaata; kayni si nisi sa hum yoboynawa, vumawa kaw, nam li jafi, yaw dok-hidi, yaw dok-karkiya, yaw kis kaw.

Law ma nir-niramna kay fitilla

Luk 8:16-18

21Nam disi lo: Fitilla san as kuluɓum kayn gaa kuɗ dutta lebo gaa kuɗ gilikŋa su? Tunum kayni kulo kay va ma tun fitilla ɗisu? 22Kay va ma ŋayaya ma as vul tuwam goy haraŋɗi mayɗi, va ma kusuɓiya ma ma goy hay falaytɗi mayɗi. 23La san humam ka'a kay huma, nam ma huma. 24Nam di tisi sem mara'a lo: Ligi ŋali kay sle ma nigi humumna. Dutta-kusta ta nigi kus wan hiɗi na'ta kayni ma kusgi hiɗi na'a, ma vulgi suwa kaw. 25Kay sa ma falam ka'ana, talamu ma vulis lo, may sa ma falam mayɗina, va ma ka kalamna kayni ma sliys goy kalamu.

Jaf ma cukum gaana, wal gu-seneve

Mat 13:31-32; Luk 13:18-19

26Nam di lo: mulda-wuralawna na' ŋray ca ki sa ma was jafn gaa kay nagata nala: 27La nam kal sen malamu, la nam mus jigere kaw, henjeta hiɗi falayta, jafna day kulo'o, wul kulo'o kaw, ir nanige kla nam wiɗi. 28Nagat kay tuwa'a wul jafna; jewe mi zlemdekŋa, kalam mi wiira, bugolda yam wan cuk goyo may. 29Hay li ma jafna niyawa, nam gi kewt kuɗum yo, kay feɗna coowa.

30Nam di lo: nay ma ŋra mulda vi Lawna hiɗi mige? Lebo nay as ŋra' hiɗi law ma nir-niramna mige? 31Na'a ki jaf-gu seneve ma, hay li ma san wasam gaa kay nagata, nam gooro suw jaf ma kay nagatna kaf, 32nir-na'ta kep, hay li ma wasamawa, nam muɗ ŋol hizim-hizim' suw hadafna kafe, ɓet ɓalam goy ŋolo, ta-ta lay ma dukalawn kaw ma'a tun tokosayna valamu hay humamu.

33hiɗi law ma nir-niramna ŋolo ki kayn nala nam kus yoboyn tisiya, kuɗ va ma nisi nagay kay humumna. 34Bay law ma nir-niramna nam law tisiɗi, may hay li ma nam fi tuwamawa goy ŋayaya hiɗi sa hatayna valamu, nam disi caw law ma nir-niramna goyo.

Yesu tun birin gaa'a

Mat 8:18-27; Luk 8:22-25

35Hay vulatita vi buur na'ta, Yesu di tisiya: nay nay kulo gal hena. 36Hay li ma nam gi ir sumuna goy gina, nisi kal hiɗi namu hay lumda ta nam ay musi haya'ta, lumay hena kaw tapay hiɗi nisiya. 37Birin ŋolo fokay kulo'o, billa ko kulo'o hay lumna, ta-ta lumna goboy oya. 38Nam buri sene hay giɗer lumda, yalam tuni kay ɗigalla ta may. Nisi zliyimu dum ala: Bum-yalla, tuwaŋ may wiraŋ kay sir ma nay ka sir goloŋŋa noŋɗi su? 39Nam zliy kulo'o, nam bay simeɗna, nam di tam niy-lumna ala: basaŋu, tunaŋ gaa'a, wulini wulini birina tuni gaa helmes', liyna tuni kiliŋ. 40Nam disiya: nigi li nari kay mige? Nigi lak hay bay-vid tuwa nala litige? 41Tuwsi cuk nar ŋolo, nisi di jar tuwsi ala: sa namna ma niyna hiɗi birina gat kuɗum nala kayni mi nam gige?

Currently Selected:

MARKUS 4: Massana

Highlight

Copy