MARKUS 5

Sa ma ful kalamna yeray goyo

Mat 8:28-34; Luk 8:26-39

1Nisi co goy gal hena bugol niy-lumna hay nagata vi sa Geraseniyena. 2Hay li ma nam jikay goy hay lumda pa jikŋa, wulini wulini sa ma ful ma liwisn kalamna kalay goy hay zul pa, ma talamu. 3Nam mus kayni hay zulla, sa fi junum loɗi, hiɗi jaɓn kaw sa fi junumɗi. 4Kay nisi junum dok-dok hiɗi lenjena hiɗi pakalamna kaw, may lenjena nam jam goyo, pakalamna nam wiledem goy kaw. Sa ma as kay lum hiɗi dono'o may loɗi. 5Falayta hiɗi henjeta kaf nam ka gi duwli jar zulla, kulo kay hiɗiyna kaw, nam ka siwela, ka to tuwam hiɗi guro-hiɗiyna kaw. 6Hay li ma nam wi Yesu ay goy gine'e pa, nam jaŋ talamu, girif gaa vokomu, 7ka siwel hiɗi delem kulo ŋol ala: jaran nan hiɗi naŋ mige, naŋ Yesu, Goora vi ma Kulo-Jamna? Nan sumalaŋ hiɗi sem Lawna, naŋ may lan lasɗi. 8Kay Yesu dum ala: kalaŋay goy hay san kayni, ŋus ma liwisna, 9Yesu jobomu: Semda vaŋ anige? Nam hot dit ala: semda vanu Legiyon, kay numa ka ŋolo. 10Fuliyan nisina siɗaw Yesu ŋolo kay nam ma gisi irsi goy hay nagat paɗi,

11Hay na'ta bagumna fara kla ka ti hat goboy hiɗi hiɗiyta. 12Fuliyana siɗaw Yesu ala: Guma irma tam bagumna ta goyni kay numa min cuk hayamu. 13Nam hin bagumna li nala. Fuliyan liwisna cukay goyo, nam cuk kalaf hay bagumna. Ɗuw na kayni, farana vi bagumna patay jaŋi kulo kay boŋoloŋŋa pa, koy goloŋo, nam ir birim ma' miti goloŋ kaf. 14Nisi sa ka ŋomomna muni jaŋi, nisi di labar namna goy hay hoyok-ziy ma ŋulona hiɗi ma gurayna kaw. Sumun cukay goyo kay ɗuw va ma lina. 15Nisi ma tam Yesu, sa ma ful kalamna, ma legiyon ay kalamna nisi fum dam', nam musi kiliŋ, sligar talam cukiya, ŋalda valam hoti talamu kaw. Nala nisi muɗ nari. 16Nisi sa wumna disi goyo kay sle ma li tam sa ma fuliyan kalamna, tam bagumna kaw. 17Nisi tun caw siɗaw Yesu kay nam ma kal goy hay nagata visi pa. 18Hay li ma nam tun caw jik hay lumna, sa ma ay hiɗi ful kalamna siɗawamu kay nam ma hinim tap kuɗumu. 19Yesu hinim li naɗi, may dumu: tuɗaŋ vo vaŋ tam sumiyaŋu, disi kay sle ma ŋulona ma Bum-Sumuna lum taŋŋa, a nanige nam li slugota taŋu kaw. 20Nam kalay goyo, tun caw di goy hay Dekapolis kay sle ma ŋulona ma Yesu lum talamna, sumun kaf muɗ ɦuyum'.

Dayta-kulota vi goota vi Jayrus, cata ta moyn li busat ta' doogo yam ma'ta

Mat 9:18-26; Luk 8:40-56

21Yesu ɓe hay lumda, hot kulo gal hena. Sumun dak talam ŋolo, nam ay deŋel niy-lumna. 22Bugol kayni sa ma ŋolla hay sinagogayna kep ma'a, semda valamu Jayrus, hay li ma nam wi Yesu, nam girif gaa vok gayamu. 23Nam siɗaw Yesu ŋolo dumu: Goota vanu ka moyo, na' goboy hiɗi mitta, naŋaya, tunaŋ ɓaŋ ka' tunu, kay na' ma muɗ goy ŋaa muɗge. 24Nam kalay hiɗi san kayni, sumuna ŋolo tuɗ kuɗumu kaw, nisi hebem ŋolo.

25Hay na'ta cat ay kepe, na' kus busuwn goyo busat liy doogo yam ma'. 26Na' lasay ŋolo kuɗ doktor mara'a mara'a, na' ba farayna va' goy kuɗ doktor kaf kaw, may fi ŋaata noŋɗi, moyna jor jori vokom suwa. 27Hay li ma na' hum labara kay Yesu, na' ma'a, jo vun sligara valamu goy bugolom pa, 28kay na' di'e: la nan jom mi vun-sligara valam ɦawa kaw, nan ma muɗ goy ŋaa'a. 29Wulini wulini busuw ma jaŋ goy ta'na cola, hay na'ta de', na' wi hay tuwa' ala na' muɗi goy ŋaa'a kay lasta va'a. 30Wulini wulini Yesu wi hay tuwam ala donota kal goy hay tuwam pa, nam muɗ iram bugolom tam sa tokayna nam disiya: Sa ma jo vun-sligara van kayn mi gige? 31Sa hatayn dumu: Naŋ wi ala sumun hebaŋawa ŋolo, naŋ di ala ma jon vun-sligara van kayn mi gige lo su? 32Nam ɗuw goy galamu kay wi cata ta jo vun-sligara valamu klasige. 33May cat kayni muɗ nari, dika' ɓira'a, kay na' wi va ma li ta'na, na' ma'a, girif gaa vokomu, dum gasit goyo. 34Nam da'a: goota vanu, vida vagu muɗagawa goy ŋaa'a, tuɗag hiɗi sle'ta, muɗag goy ŋaa'a kay lasta vagu kaw.

35Hay li ma nam ka law tuwa, sumun may goy vo vi sa ma ŋolla vi sinagogayna pa, ka dum ala: Goota vaŋu mitiya, naŋ mak tuw bum-yalla lo kay mige? 36May hay li ma Yesu hum dita visiya, nam min tun ŋalda valam kay dit na'taɗi, may nam di tam sa ma ŋolla vi sinagogayna: Laŋ narɗi, may vaŋu. 37Nam hin sa mara tuɗ kuɗumɗi, may tuɗ kuɗum si Peter hiɗi Yakub hiɗi Yohana ɓasum Yakubna tuta. 38Nisi co tam ziyna vi sa ma ŋol hay sinagogayna, nam wi sumun dakaya, tiy gijum-gijum ŋolo. 39Nam kal kalaf tisiya disiya: nigi law gijum-gijum, tiy kaw kayn kay mige? Goota bay mita, na' kalay sene. 40Nisi cen kuɗum ŋolo, hay li ma nam gisi irsi goy jiy gina, nam vi bum-goota hiɗi su'a, yaw sa hatayna sa ka kuɗumna kaw, kalay kalaf hay liy ma goota buri hayna. 41Nam vi ɓam goota di ta'a: Talita kumi! Kayn min di ala: goot-cata, nan dagu, fokag kulo'o.

42Wulini wulini goot-cata fokay kulo'o, na' tun caw tuɗa kaw, kay busata va'a doogo yam ma'. Nisi kaf muɗ huyum ŋolo. 43Nam gatsi ala nisi ma hin sa wi kaynɗi, nam disi ala nisi ma vula' va ma ti'e.

Currently Selected:

MARKUS 5: Massana

Highlight

Copy