MARKUS 13

Ɦo-gaata vi Yerusalem hiɗi mata vi goora vi sana

Mat 24:1-51; Luk 21:5-36; Mat 10:16-23; Luk 17:22-37

1Hay li ma Yesu kalay goy hay Tempella pa, kep jar sa hatayna valamu dumu: Bum-yalla, ɗuwaŋ hiɗiyn lakŋ natige! Ɗuwaŋ inda valam natige! 2Yesu hotom dita: Ziy ŋulon lakŋ naŋ ka wum su? Hiɗiy mara'a ma jakay kulo kay niramu ma as ɦo gaaɗin may tanɗi.

3Nam mus gaa kay hiɗiyt Olive ɗiger vok Tempella. Peter, Yakub, Yohana hiɗi Andre ka jobom goy ŋayay ala: 4Duma'ay tige, slen kayni ma li lancitige? Hay li ma slen kayni yalam hebawa goboyo ni, va ma ɗek goy kalamna mi mige?

5Yesu sli ditiya disiya: Nigi ma li ŋali kay hin sa ɗutgi goyɗi. 6kay sumun ŋolo ma ma'a hay semda vanu, nisi ma di ala nanu mi namu, nisi ma ɗut sumun goy ŋolo. 7Hay li ma nigi ma hum kay duura hiɗi labara vi duura, ligi narɗi, kay la linige kaw kayni ma li'e, may dabaŋ-gu'ta bay co tuwa. 8Kay sum sa hay nagat kepe ma yaw kulo'o kay sum sa hay nagat tara'a, mulda ma fok kulo'o kay mulda kaw, wiira vi nagata ma li tani li ɗawn kaw, mayta ma li ŋolo kaw, slen kayni kaf mi tun cawta vi tuw-tita ɦawa. 9May nigi ma li ŋali, kay nisi ma nargi vok sa kitana, nigi ma fi watta hay sinagogayna, nigi ma lak vok sa guvernerayna hiɗi muliyana kaw kuɗ semda van nanu, kay di-goyta tisiya: 10Labara ma firina ma kusis tam jaf-sumun jew kafe. 11Hay li ma nisi ma yawgi kay nargi vun kitata, yorgi tuwgi kay va ma nigi ma dumnaɗi, may nigi ma dum mi va ma Ŋusta min ɗekgit hay buur namna, kay yoboy namna may vi Ŋusta-Peldetta pa, may vigi nigi kay tuwgiɗi. 12San ma vul ɓasulumna goy vun mitta, bumna ma vul goora valam goyo kaw, gurona ma fok kulo'o kay sumaysiya, ma cisi goyo kaw. 13Sumun kaf ma ka gawt kigiya kuɗ semda vanu, may sa ma vi'e ta-ta hay dabaŋ-gu'ta, nam ma fi su'da.

Mat 24:15-51; Luk 21:20-36; 17:22-37

14Hay li ma nigi wi liwista vi ɓulak-goytawa coli hay liy ma na' fi col hayamnaɗi -- sa ma jaŋ lawta kayni ma li ŋali -- hay na'ta, nisi sa ka hay Yudiya ma pir kulo kay hiɗiyna;

15Sa ma ka kulo'o kay yam-ziyda ma jik gaaɗi, kal kalafi kay yaw va ma hay ziyda valamɗi kaw. 16Sa ma ka goy hay sinena ma hot vudoŋo kay yaw sligar-tuwna valamɗi kaw. 17Joot kay boy sa hayna hiɗi sa guron digsina hay na'ta ɗawni. 18May siɗawgi ala van kayni ma li hay caydaɗi. 19Hay na'ta kayni lasta ma li'e: Hay li ma Lawn in nagat hay cawa'ta tunit pa ta-ta wulini lasta ta ki kayn nala bay li tuwa, vokay ɗaw kaw las na'ta ma li loɗi. 20May la Bum-Sumuna ka buur na'ta kaay kiɗayɗina, sa fi suɗ goy noŋɗi, may kuɗ sa vilekay goyna valamu, nam ka buur na'ta kiɗaya. 21Hay na'ta, la san digiyawa ala Kristu ka tani lebo Kristu ka ɗawni, nigi ma vi kaynɗi. 22Kay Kristuwayn bay-gasina hiɗi sa jobta-Lawna bay-gasina ma yaw kulo'o, nisi ma li ɗekka ma ŋulona hiɗi sle ma ŋulo ŋulona, kay ɗut sa vilekayna goyo, la kayni fi li'e. 23Lakgi jiger! Slen kayni nan digitawa goy jewe.

24May hay buur namna ɗawni, fatta ma muɗ jufun kurup', tilla ma muɗ vul haraŋa valam loɗi, 25mislekŋa ma cukay gaa dukalawn pa, donota vi dukalawna ma wira. 26Hay na'ta sumun ma wi goora vi sana co'o jar ɗugulla hiɗi gajijita hiɗi gaŋeraŋa ŋolo. 27Hay na'ta nam ma cuk sa sunda-wuralawna valamu kay tok sa vilekay-goyna valamu hay sin-nagat fiɗi pete, hay sin-nagat gal hena pa ta-ta hay vuna' hena.

28Hatgi law ma nir-niramna tam gu-gumna, hay li ma miira co hay ɓalamu, humam goɗ kaw, hay na'ta nigi wi ala menda ka goboyo. 29Nala nigi kaw, hay li ma slen kayni nigi wumawa co'o, nigi ma wi ala goora vi sana ka goboyo tam vun-galana. 30Nan digi gasita, jaf namna kayni kaf ma vat goyɗi ta-ta slen kayni kaf ma li'e. 31Dukalawna hiɗi nagata ma vat goyo, may yoboyna vanu ma vat goy noŋɗi.

32May hay buur na'ta ɗawni, sa as wi leeraɗi, sa sunda-wuralawna as wiɗi, goora kaw as wiɗi, may bumna kep as wi'e. 33Ligi ŋali, lakgi jigere, siɗawgiya, kay nigi may wi liyn ma mata valamɗi. 34Kayni ŋray ca ki sa ma min kal rogoyo, hin ziyna valamu, hin lopna mi sa vo valamna, nam vul hagata mi gigekaw kay mus jigere, sa ŋom vun-ziyna kaw nam vulsi hagata kay lak jigere. 35Nigi kaw lakgi jigere, kay liyn ma bum-ziyna min hotay hayamna nigi wumɗi, la vulatit kla, la henjet ŋolda kla, la ŋarpita kla, la graw culumta kla. 36Nigi ma li nari, kay a nam ma co kigi tugumɗi, figi kalay senɗi kaw. 37Va ma nan digit kayni, nan dum tam sumun kafe, lakgi jigere.

Currently Selected:

MARKUS 13: Massana

Highlight

Copy