MARKUS 12

Law ma nir-niramna kay sine gulda-guldana

Mat 21:33-46; Luk 20:9-19; Es 5:1-7

1Yesu tun caw law tisiya hay law ma nir-niramna ala: San kep pi gulda-guldan gaa'a, gi zlaɓ vunamu, jugoɗ zul ma kesl gulda-guldana, in simdira kaw, deŋem goy hay ɓam sa zumna, kalay malam rogoyo. 2Hay li ma liyn coowa, nam cuk sa sunda valamu kat sa li lop gulda-guldana kay fi ir galla valamu hay ɓisiya. 3Nisi vumu watamu, hinim kal hiɗi ɓalam ɦawa kaɗaŋ-kaɗaŋ' 4nam gi sa ma sunda mara'a katsi lo, namu nisi ŋulumu, cum kalamu kaw. 5Nam gi sa ma sem ɦidin lo, namu nisi cum goy mati, ki kayn nala segen lo nisi watsiya, segen lo nisi cisi goy mati kaw. 6Wulini hini kalam kayni mi goora valam ma hayam kalamna kepe, nam gum tisi bugol kafe hiɗi varta ta ala: Goora van ɗawni nisi ma li zulo kalam klasige. 7May sa zumna di jar-tuwsiya: Zawni mi goora ma yaw vocotna, cayt goyo, nala vocot ma muɗ vaya. 8Nisi vumu, cum goyo, gum hay vun-sinena.

9Wulini bum-sinena ma lum ɗawn mi mige? Nam ma ma'a, ci sum sa zumna goyo, vul sine gulda-guldana mi sum sara'a.

10Nigi bay jaŋ hay ɗot kayni noŋ su?

Hiɗiyna ma sa in ziyna noyom goyna,

Kayni muɗi mi hiɗiy ma ŋolla vi gef-ziyna.

11Van kayni may goy vi Bum-Sumun pa,

Mi va ma muɗay ɦuyum' ŋolo.#12:11 fi kayni hay Nul 118:22-23.

12Nisi gar a vumu, may nisi li nar kay sumuna, kay kirsi ta ala nam di law ma nir-niramna namna kayni kisiya. Nisi hinimu, kalay goyo.

Taara mi Cesar

Mat 22:15-22; Luk 20:20-26

13Nisi cuk segen sa Farisena hiɗi sa Sadusena talamu kay nisi ma vum hay lawta hiɗi dita valamu. 14Hay li ma nisi maawa, nisi dumu: Bum-yalla, numa wi'e naŋ sa ma di gasita, naŋ may li nar kay saɗi, naŋ ɗuw san kuɗ tuwam ma goy jiynɗi, naŋ hat hagata vi Lawn hay liya'a kaw. Ki kayn nala hagat ka kay vul taara mi Cesar lebo mayɗi su? Numa as vulum taara lebo vulumɗi su? 15Hay li ma Yesu wi mileta visi wina, ka disi ala: Nigi neman kay mige? Marangi denariyus kep tige, nan min ɗuwa' tige! 16Nisi maram denariyus kepe. Nam disiya: Hayam damni yam gige hiɗi ɗota vi gige? Nisi dumu: vi Cesar. 17Yesu disiya: Vulgi mi Cesar slena vi Cesar, vulgi mi Lawna slena vi Lawna may. Nisi muɗ ɦuyum ŋolo kuɗumu.

Sa Sadusena hiɗi dayta-kulota

Mat 22:23-33; Luk 20:27-40

18Sa Sadusena sa di ala dayta-kulota tayɗina ma talamu, nisi jobom ala: 19Bum-yalla, kayni mi va ma Musus ɗom tuma'a: La san mitawa, hin cata valamawa bay gooro, ɓasulumna ma musa'a kay vuɗum goor selemu. 20Wulini ɓosiyom-tuwsin ay siɗiya: ma jewna sli cata, nam mit bay vuɗ goor hiɗi na'a. 21ma ma'na va'a, nam mit bay hin goor bugolom kaw, ma ɦidina nala kaw. 22Jarsi siɗiya kaf lakŋi ma hin goor mayɗi. Bugolsi kaf cat mitiya kaw. 23May hay dayta-kulota ɗawni, jarsi kaf lakŋi na' ma mus cat kuɗ marige? Kay nisi kaf joka' kuɗsi ca'a? 24Yesu disiya: Kay na'ta nigi viy goyo, kay nigi wi ɗotɗi, wi donota vi Lawnɗi kaw, naɗi su? 25Kay hay dayta-kulota, jufayn as yaw boyɗi caɗi, boyna as yaw jufayɗi kaw, may nisi ma muɗ ki sunda-wuralawna nala. 26Kuɗ lawta vi sa mitina hiɗi dayta-kulota visiya, nigi bay jaŋ hay ɗerwelda vi Musus tuwa su? Hay li ma nam ka goboy hiɗi gu-ma-zigiyna, Lawn dum ala: Nanu mi Lawna vi Abraham, Lawna vi Isaak, Lawna vi Yakub kaw. 27Lawna may mi Lawna vi sa mitinɗi, may mi Lawna vi sa irina. Nigi viy goy ŋolo.

Vun-ma-gatna ma ŋol suw kafna

Mat 22:34-40; Luk 10:25-37

28Sa kep jar sa wi-ɗota wi Yesu ci way hiɗi sa Sadusen zaw. Hay li ma nam wi ala Yesu hotsi dit ŋaa'a, nam ma tam Yesu jobom ala: Vun-ma-gatna ma ŋol jaram suw kafna mi marige? 29Yesu hotom dit ala: Vun-ma-gatna ma ŋolla kayni: Humgiya nigi sa Israyella, Bum-Sumuna Lawna vaya, Bum-Sumuna ka kepe. 30Naŋ ma min Bum-Sumuna Lawna vaŋu hiɗi dikaŋ kaf, hiɗi ciwta vaŋ kaf, hiɗi varta vaŋ kaf, hiɗi donota vaŋ kaf. 31Ma ma'na kayn ala: Naŋ ma min sugoloŋu ki tuwaŋ nala. Vun-ma-gatna mara ma ŋol suwum nam lakŋi mayɗi. 32sa ma wi ɗota hot di mi Yesu ala: Kayn ŋaa'a ŋolo, bum-yalla, va ma naŋ dum zawn hay liyamu. A Bum-Sumuna mi nam kepe, Lawn mara ma ki nam nala mayɗi kayn hay liyamu, 33a san minim hiɗi dikam kafe, hiɗi yalla valam kaf, hiɗi donota valam kaf, a san min sugolomna ki tuwam nala kaw, kayni suw ɗifin ma ŋal-goyna hiɗi ɗifin mige pet. 34Hay li ma Yesu wi ala nam hot dit hay liya'a, nam dumu, naŋ may goy gine'e hiɗi mulda-Lawnɗi. Hay na'ta sa ma tos iram kay jobom va may loɗi.

Kristu goora vi David

Mat 22:41-45; Luk 20:41-44

35Hay li ma Yesu ka hat hay Tempella, nam sli ditiya di'e: Sa wi-ɗota fi di ala Kristu nam mi goora vi David kayn litige? 36David kay tuwamu hay Ŋusta-Peldetta nam di ala:

Bum-Sumuna di tam Bum-Sumuna vanu,

Musaŋ gaa'a hay galan ta jufta,

ta-ta nan ma cuk sa gawt kaŋŋa gaa kuɗ wur-seŋu.#12:36 Fi kayni hay Nul 110:1.

37David kay tuwamu yum ala Bum-Sumuna; nala nam muɗ goora valam ɗawn muɗtige? Sumun ŋolo hum yoboyna valam hiɗi firita.

Ligi ŋali hiɗi sa wi-ɗota

Mat 23:1-14; Luk 20:45-47

38Hay hatta valamu nam ka disi ala: Ligi ŋali hiɗi sa wi-ɗota, nisi sa dar a poy hiɗi sligar-fiyokŋa, min gi-deɓta hay lumuna, 39min mus ma vokŋa hay sinagogayna, min lak voko hay yuldeta kaw. 40Nisi sa yaw slena vi boy sa duhulla, nisi siɗaw siɗawta fiyokka kay sumun ma wisiya. May nisi ma fi sum-zlata ŋolda.

Vulda vi cata duhulta

Luk 21:1-14

41Nam musi gaa vun timgil ma nisi cuk vulda hayamna ɗiger. Nam ɗuw sumun ka cuk gurjuta hay timgilla, sa farayn ŋolo ka cuk ŋolo kaw. 42May cata duhulta ma'a, na' cuk gurjut gurayt ma', kayni ir karaŋga kepe. 43Yesu yi sa hatayna valamu ka disiya: Nan digi gasita: cata duhulta ta hawta zawni, sum sa cuk hay timgilla kaf na' cuk suwsiya; 44Kay nisi kaf cuk kayni kuɗ asta visiya, may na'a, hiɗi hawta va' pet, na' cukum mi sle ma ŋom ŋil tuwa'na kaf, ma as guta'na kaf.

Currently Selected:

MARKUS 12: Massana

Highlight

Copy