MATEWUS 22

Law ma nir-niramna kay dabayna

Luk 14:16-24

1Yesu disi law ma nir-niramna lo ala: 2Mulda-wuralawna na'a ŋray ca hiɗi mulla ma min li dabayna kay goora valamu. 3Nam cuk sa sunda valam goyo kay yi sa fi yita hay dabayna; may nisi min maɗi. 4Nam cuk sa sunda sara'a lo, ka disi ala: Nigi ma di tam sa fi yitna ala: tin koti kanu, luwayna hiɗi faray ma ɗorayna ŋatiya, slen kaf kotiya, nigiyay hay dabayna. 5May nisi min tun ŋalda visi kay yitɗi; sla' ti hagata visiya visiya, sa hena tun iram hay sinena, sa hena tun iram hay lumuna. 6Segena yaw sa sunda valamu, ŋulsiya, cisi goyo may. 7Mulla muɗ ɦiya, nam cuk sojena valamu, ci sum nisin goyo, ŋal hoyok-ziyna visi goyo kaw. 8Nam di tam sa sunda valamu: Yuldeta vi dabayna kotawa, may sa fi yita may nagay kay kaynɗi. 9Kay na'ta tuɗgi goy hay hagana, sum sa nigi fisin kaf nigi ma yisi ay hay yuldeta. 10Sa sunda nisina kalay goy hay haga ma grana, sum sa nisi fisin kaf nisi toksi aya, sa joona hiɗi sa ŋaana kaf, ziyna vi yuldeta oyawa hiɗi sa dabayna. 11May hay li ma mulla ma kalafi kay ɗuw sa dabayna, nam wi sa kepe ma bay cuk sligara vi yuldeta vi dabayna talamu. 12Nam dumu: Bananna, naŋ ma kalaf tani bay cuk sligara vi yuldeta vi dabayn taŋu kay mige? May nam mus kiliŋ. 13Hay na'ta mulla di tam sa sunda: Jungit gayam hiɗi ɓalamu, gum goy jiy hay jufunda, hay li ma nam ma tiya, mut siyamu kaw. 14Kay sa yiyna ka ŋolo, may sa vileki-goyna ka kiɗaya.

Taara mi Cesar

Mark 12:13-17; Luk 20:20-26

15Hay na'ta sa Farisena cuk goyo, nisi ŋra vunsiya, kay gar law ta nisi min vi Yesu hay jawta hiɗi dita vi vunamu. 16Nisi cuk sa hatayna visiya hiɗi sa Herodiyan talamu, ka dum ala: Bum-yalla, numa wi ala naŋ sa ma di gasita, naŋ hat hagata vi Lawn tam sumuna hiɗi gasita kaw, naŋ li nar kay saɗi, ka ir saɗi kaw. 17Naŋ duma varta vaŋ tige: Hagat ka kay vul taara mi Cesar lebo mayɗi su? 18May Yesu wi mileta visiya, nam di'e: Nigi sa milena, nigi min neman kay mige? 19Vulan gurju ta li taar hiɗi na'ta ay kepe. Nisi maram denariyus kepe. 20Nam disiya: Haya' damni mi yam gige hiɗi ɗota vi gige? 21Nisi dumu: Vi Cesar. Nala nam disiya: Kay na'ta vulgi mi Cesar slena vi Cesar, mi Lawna slena vi Lawna may. 22Hay li ma nisi hum kayni, nisi muɗ ɦuyum', kaliya may.

Sa Sadusena hiɗi dayta-kulota

Mark 12:18-27; Luk 20:27-40

23Hay na'ta sa Sadusena sa di ala dayta-kulota tayɗina ma talamu, nisi jobomu: 24Bum-yalla, Musus di ala la san mit bay gooro, ɓasulumna ma vi cata valamu kay vuɗ goor hay selemu. 25Ɓosiyom-tuwsin ay jarma siɗiya. Ma jewna sli cata, nam cap mit bay vuɗ goor hiɗi na'a, ɓasulumna vi ca na'ta. 26Ma ma'na mit lo, ma ɦidin mit lo, ta-ta tam ma siɗiyana. 27Bugolsi kafe cata miti lay. 28May hay dayta-kulot ɗawni, jarsi kaf lakŋi na' ma mus ca kuɗ marige? Kay nisi kaf musa' ca'a? 29May Yesu hot dita disiya: Nigi viy goyo, kay nigi wi caw ɗotɗi, nigi wi donota vi Lawnɗi kaw. 30Kay hay dayta-kulot ɗawni, sa juf ma sli ca mayɗi, ca ta sli sa juf tayɗi kaw, may nisi ma muɗ ki sunda-wuralawna vi Lawna hay wuralawna nala. 31Kuɗ dayta-kulota vi sa mitina, va ma Lawn dum tigin kayni nigi bay jaŋam tuwa su? 32Ala: nanu mi Lawna vi Abraham, Lawna vi Isaak, Lawna vi Yakub kaw. Lawna may mi Lawna vi sa mitinɗi, may vi sa irina. 33Sum sa hum kayni muɗ ɦuyum' kay hatta vi Yesu.

Vun-ma-gatna ma suw kafna

Mark 12:28-34; Luk 10:25-37

34Hay li ma sa Farisena hum ala nam zan vun sa Sadusenawa, nisi tok tuwsiya. 35Kep jarsiya mi sa ma wi vun-ma-gatna, nam job Yesu kay nememu. 36Nam job Yesu ala Bum-Yalla, hay gatta vi Musus vun-ma-gatna ma ŋol suw kafna mi marige?

37Yesu hotom dita: Naŋ ma min Bum-Sumuna Lawna vaŋu hiɗi dikaŋ kaf, hiɗi ciwta vaŋ kaf, hiɗi varta vaŋ kaf. 38Kayni mi vun-ma-gatna ma jewna, mi ma ŋolla kaw. 39Ma ma'na ma ŋray hiɗi namna kayn ala: naŋ ma min sugoloŋu ki sliw tuwaŋ nala. 40Slen ma diy hay gatta vi Musus hiɗi ma sa jobta-Lawna dumna kaf ka juni kuɗ vun-ma-gatna ma' lakŋi.

Kristu goora vi David

Mark 12:35-37; Luk 20:41-44

41Hay li ma sa Farisena ay tokiya, Yesu ka jobsi ala: 42Nigi var mige kay Kristu? Namu mi goora vi gige? Nisi hotom dita; Goora vi David. 43Nam disiya: Hay li ma David hobay hiɗi Ŋusta, nam yum ala Bum-Sumuna kayn kay mige? Kay David di'e: 44Bum-Sumuna di tam Bum-Sumuna vanu:

Musaŋ gaa'a hay gal ɓan ma jufna,

ta-ta nan ma cuk sa gawt kaŋŋa gaa kuɗ wur-seŋu.#22:44 fi kayni hay Nul 110:1.

45La David yum ala bum-sumuna, Bum-Sumuna as li mi goora vi David kayn nanige? 46Sa ma as kay dum va kep kaw may noŋɗi, bugol buur namna pa, sa ma co talam kay jobom va may noŋɗi.

Currently Selected:

MATEWUS 22: Massana

Highlight

Copy