MATEWUS 23

Yesu di kay nisi ma li ŋali hiɗi sa Farisena, hiɗi sa wi-ɗota kaw

Mark 12:38-40; Luk 11:39-52

1Yesu di yoboyn tam sumuna hiɗi sa hatayna valam kaw ala: 2Sa wi-ɗota hiɗi sa Farisena ka lakay kay liyn ma kusta vi Musus. 3Slen ma nisi digit kafna nigi ma li kuɗumu, may ligi kuɗ lopna visiɗi. Kay nisi di slen hiɗi vunsiya, may nisi kay tuwsi li kuɗumɗi. 4Nisi jun jakŋa ma nek ŋolla ma ziy lopna, nisi tunum pel sumuna, may nisi kay tuwsi geɗem hiɗi cita-ɓisiɗi. 5Lopna visi nisi lum kaf kayni kay sumun ma wisiya: Katamulla visiya nisi ɗutum beɗ ŋolo, vun sligara visiya vuɗi tisip tisip' kaw; 6nisi dar mus ma vokŋa hay yuldeta, min mus hay zlamna ma vokŋa hay sinagogayna kaw, 7min gi-deɓta hay lumuna, min ala sumun ma yisi ala Rabbi kaw. 8May nigi ma hin sa yigi ala Rabbiɗi, kay bum-yalla vigiya mi kepe, may nigi kaf si ɓosiyom-tuwgina. 9Nigi ma yi sa gaa kay nagat tan ala buma'aɗi, kay bugiya ka kepe, nam ma ka hay wuralawna. 10Nigi ma hin sa yigi ala sumay hattaɗi, kay mul-hatta vigi ka kepe, kayni Kristu. 11May ma ŋolla jargiya ma muɗ goy ma sungina. 12Kay gigekaw ma subur tuwamu, nam ma muɗ goy waa'a, may gigekaw ma muɗ tuwam waana nam ma fi suburta.

13May joot kigiya, nigi sa wi-ɗota hiɗi nigi sa Farisena, nigi sa milena, nigi sa duk vun mulda-wuralawna kay sumuna, may nigi kay tuwgiya fi kal haya'ɗi. Nisi sa min kal haya, nigi min hinsi hagatɗi kaw.

14Joot kigiya, nigi sa wi-ɗota hiɗi nigi sa Farisena, nigi sa milena. Kay nigi ti ziyna vi boy sa duhulla, nigi siɗaw fiyoko kay sumuna ma wigiya, kuɗ kayni nigi ma fi kitata ŋol suwa.

15Joot kigiya, nigi sa wi-ɗota hiɗi nigi sa Farisena sa milena, kay nigi ŋuy niy-lumna hiɗi nagata kaw, kay gar sa ma vi kuɗgiya, may hay li ma nam vaawa kuɗgiya, nigi muɗum goy goora vi kuta tewɗita suwgi nigi sem ma'.

16Joot kigiya, nigi sa dukina sa tun vok sumuna, nigi di ala la sa yi va kalam hiɗi Tempella, kayn may tun kalamɗi, may la sa yi va kalam hiɗi or ma hay Tempella, kayni tuni kalamu. 17Nigi sa ɦay-ɦayna hiɗi nigi sa dukina, ma ŋol jaram nam lakŋi mi marige? Ora lebo Tempella ma li or goy peldetna su? 18Lo nigi di ala: La sa yi va kalam hiɗi giwin-ma-ɗifinna, kayni may tun kalamɗi; may la san yi va kalamu hiɗi ɗifinna ma maram kulo hay giwin-ma-ɗifinna, kayni as tun kalamu. 19Nigi sa dukina, ŋol jaram mi marige? Ɗifinna lebo giwin-ma-ɗifinna ma ɓi ɗifin kulo kalamna su? 20Sa ma yi va kalamu hiɗi giwin-ma-ɗifinna, nam yi va kalamu hiɗi giwin-ma-ɗifinna hiɗi sle ma lakay kulo kalamna kafe. 21Sa ma yi va kalamu hiɗi Tempella, nam yi va kalamu kayni kay Tempella hiɗi nam ma musi haya kaw. 22Sa ma yi va kalam hiɗi wuralawna, nam yi va kalam kayn hiɗi zlamda vi Lawna hiɗi nam ma mus ka'na kaw.

23Joot kigiya, nigi sa wi-ɗota hiɗi nigi sa Farisena sa milena, nigi vul gal-ma-doogona vi minte, hiɗi anise hiɗi kumen, may sle ma ŋulo suwna hay vun-ma-gatna ki ɗigerta, slugota hiɗi vida nala, nam lakŋi mi sle ma nigi may lumɗi. Nam lakŋi mi sle ma nigi as lumu, hin hena bay liɗi kaw. 24Nigi sa tun vok sumuna sa dukina, nigi sa yor niyn goy hiɗi temena kay ɦurutta, may lamgana nigi ligimu.

25Joot kigiya, nigi sa wi-ɗota hiɗi nigi sa Farisena, nigi sa milena, kay kaway-ma-cina hiɗi tasana nigi muzum ŋorom goyo, may hayamu hobawa hiɗi kulda hiɗi haramda. 26Nigi sa Farisen sa dukina, kaway-ma-cina hiɗi tasana nigi ma muzum hayam goy jewe, bugolda ŋorom ma muɗ goy cet-cete.

27Joot kigiya, nigi sa wi-ɗota hiɗi nigi sa Farisena, nigi sa milena, kay nigi ŋray ca hiɗi yam-usna ma ŋorom koray haɓi, may hayam kalafi hobawa hiɗi zokŋa vi sa mitina hiɗi sle ma liwisna pet. 28Nigi kaw ŋorgi goy jiy kir sumun ɗigere, may haygi kalafi hobawa hiɗi mileta hiɗi jiw-zlata.

29Joot kigiya, nigi sa wi ɗota hiɗi nigi sa Farisena, nigi muw yam-usna vi sa jobta-Lawna, kot yam-usna vi sa ɗigera ŋaa ŋolo, 30nigi di ala: Lali numa ay hay buura vi sumayma'a, numa'a fi tap hiɗi nisiya kay mar busuwna vi sa jobta-Lawna kuma'ɗi. 31Nala nigi ka li di-goyt kigi kay tuwgi ala, nigi si gurona vi sa ci sa jobta-Lawn goyna. 32Nigi kaw hobgi vun dutta-kusta vi sumaygiya! 33Nigi guyna, nigi jafna vi guy-makayna, nigi pir goy kay kitata vi kuta tewɗit ɗawn pirtige? 34Kay na'ta, ɗuwgiya, nan ma cuk sa jobta-Lawna hiɗi sa yalla hiɗi sa wi-ɗota tigiya, segena nigi ma cisi goyo, ɓalsi kat gu-ma-grakŋa, segena nigi ma watsi hay sinagogayna vigiya, segena nigi ma tuɗ kuɗsi hay hoyok-ziyn mara'a mara'a kay lassiya. 35Kay busuwna vi sa peldetna ma jaŋ goy gaa kay nagata, tun caw tam busuwna vi Abel ma ɗigera pa, ta-ta tam busuwna vi Zakariya, goora vi Berekiya, ma nigi cum goy jar Tempella hiɗi giwin-ma-ɗifinna,#23:35 Ɗuw hay 2 Lml 24:20-22. busuwna visi kaf ma tun kigiya. 36Nan digi gasita: Slen kayni kaf ma co kay jafna vigiya.

37Yerusalem! Yerusalem! Nak ci sa jobta-Lawna goyo, sa cuksi hayagŋa nak gisi hiɗi goorhoyona kaw. Sem gaage nan gar a tok yam gurona vagu ki slekka tok gurona va'a gaa kuɗ gilaŋata'a nala, may nigi minɗi. 38Humgiya: ziyna vigiya ma hin goy hiweŋ'. 39Kay nan digiya: nigi ma wan iran loɗi ta-ta hay buur ma nigi ma di ala: Bolda ka kay nam ma min ma'a hay semda vi Bum-sumuna.

Currently Selected:

MATEWUS 23: Massana

Highlight

Copy