MATEWUS 24

Ɓulak-goyta vi Yerusalem hiɗi mata vi goora vi sana

Mark 13:1-37; Luk 21:5-30

1Hay li ma Yesu ka kal goy hay Tempella pa, sa hatayna valamu ma talamu, ka ɗekem kay inda ŋaata vi Tempella. 2May nam hot dita disiya: Slen kayni kaf nigi ka wum su? Nan digi gasita, hiɗiy ma jakay kulo kay tuwamu ma as ɦo gaaɗin may tanɗi.

3May hay li ma nam mus kulo kay hiɗiyt Olive, sa hatayna valamu tuɗ talam goy ŋayaya, ka jobom ala: Duma'ay tige, slen kayni ma li citige? Va ma ɗek kay hotta vaŋu hiɗi vatta vi nagat kaw mi mige? 4Yesu disiya: Ligi ŋali, hin sa ɗutgi goyɗi. 5Kay sumun ŋolo ma ma'a hay semda vanu, nisi ma di ala nan zawn mi Kristu; nisi ma ɗut sumun goy ŋolo kaw. 6Nigi ma hum kay duura hiɗi winekŋa vi duura: Nigi ma li narɗi, kay la nanige kaw slen kayni ma co'o, may vatta bay co tuwa. 7Jaf-sum sara'a ma yaw kulo'o kay jaf-sum sara'a, mulda tara'a ma fok kulo'o kay mulda tara'a kaw, mayta hiɗi wiira nagata ma li tani, li ɗawn kaw. 8May slen namna kayni kaf mi tun cawta vi tuw-tita. 9Hay na'ta nisi ma vulgi goy hay lasta, cigi goyo kaw, jaf-sumun kaf ma ka gawt kigiya kay semda vanu. 10Hay na'ta sumun ŋolo ma hora, nisi ma di newt jar-tuwsiya, ka gawt jar-tuwsiya kaw. 11Sa jobta-Lawna sa bay-gasina ŋolo ma yaw kulo'o, ɗut sumun goy ŋolo kaw. 12Jiw-zlata ma li ŋolo, ti-kamda hay sumuna ŋolo ma muɗ kiɗaya. 13May sa ma so tuwamu ta-ta hay dabaŋ-gu'ta, nam ma fi su'da. 14Labara ma firina vi mulda ma kusis goy hay nagat kuɗulu', kay vul di-goyta tam jaf-sumun kaf, hay na'ta dabaŋ-gu'ta ma ma'a.

15Hay na'ta liwista vi ɓulak-goyta ta sa ma jobta-Lawna Daniel di ka'ta#24:15 Dita kayni ka hay Dan 9:27. hay li ma nigi wa'awa tuni hay liy ma peldetna, sa ma jaŋ lawta kayni ma li ŋali. 16Hay na'ta nisi sa ka hay Yudiya ma pir kulo'o kay hiɗiyta, 17sa ma ka kulo kay yam-ziyda ma jik gaa'a hay ziyda valamu kay yaw sle ma ka hay ziyda valamɗi. 18Sa ma ka goy hay sinena ma hot kay yaw sligar-tuwna valamɗi. 19Joot kay boy sa hayna hiɗi boy sa guron digsina kaw hay buur na'ta ɗawni. 20May nigi ma siɗawa kay pir-goyta vigiya ma li hay caydaɗi, hay buura vi sabatnɗi kaw. 21Kay hay na'ta lasta ma li ŋolo, hay tun cawta vi nagat pa ta-ta wulini, lasta ta ki kayn nala bay li tuwa, vokay kaw lasta ta ki kayn nala ma liɗi. 22La buur na'ta kaay kiɗayɗi ni, sa kep kaw fi suɗ goyɗi, may kuɗ sa vileki-goyna, buur na'ta kaay kiɗaya. 23La sa co digi ala: Ɗuwgiya Kristu ka tani lebo Kristu ka ɗawni, nigi ma vi kuɗumɗi. 24Kay Kristuwayn sa bay-gasina hiɗi jobta-Lawna sa bay-gasina ma yaw kulo ŋolo, nisi ma li ɗekka ŋolo ŋolo, hiɗi sle ma ŋulona kaw, ta-ta la asa, sa vileki-goyn noŋ kaw nisi ma ɗutsi goyo. 25Humgiya, slen kayni nan digiyawa goy kalam jewe.

26La nisi digi ala: Ɗuwgiya, nam ka hay fulda, tuɗgi kuɗsiɗi, la nisi digi ala: Nam ka hay ziyna, tuɗgi kuɗsiɗi kaw. 27Kay ki wileta may gal kuɗuwu pa, kal gal vulatiya, mata vi goora vi san kaw ma li ɗawn nala. 28Arigekaw ma ŋumna ka'a, hay liyn kayni bakŋa ma daka.

29May bugol buura vi las na'ta de' ɗawni, fatta ma muɗ jufunu, tilla ma vul haraŋa valam loɗi, mislekŋa ma cukay gaa dukalawn pa, donota vi dukalawna ma wira. 30Hay na'ta ɗekka vi goora vi sana ma li hay dukalawna, jafna vi sum sa gaa kay nagat kaf ma yor tuwsiya, nisi ma wi goora vi san ma'a hay ɗugul ma hay dukalawna, hay gaŋeraŋa hiɗi gajijit ŋolo. 31Nam ma cuk sa sunda-wuralawna valam goyo hiɗi togolom ma buwna, nisi ma tok sa vilekayna valamu hay gef-nagat fiɗi pete, hay vun dukalawn hena pa ta-ta tam vun dukalawn hena.

32Hatgi law ma nir-niramna tam gu-gumna, hay li ma miira co hay ɓalamu, humam goɗ kaw, nala nigi ma wi ala menda ka goboyo. 33Nala nigi kaw, hay li ma nigi wi slen kaynawa kafe, nigi ma wi ala goora vi sana ka goboy tam vun-galana. 34Nan digi gasita, jaf namna kayni ma vat goyɗi, ta-ta slen kayni kaf co'o. 35Dukalawna hiɗi nagata ma vat goyo, may yoboyna vanu ma vat goy noŋɗi.

36Buura hiɗi leera namna sa ma wum mayɗi, sunda-wuralawna as wumɗi, goora kaw as wiɗi, may mi bumna nam kepe. 37Kay ki hay buura vi Nuwa nala, mata vi goora vi san kaw li ɗawn nala. 38Kay jew a niyn de kay nagat kayni, sumun ti'e ci'e kaw, yaw boyna, vul guron goyo kaw, ta-ta hay buur ma Nuwa kal kalaf hay lumna, 39nisi may giriŋ kay va noŋɗi ta-ta hay li ma niy ma dena, dolsi kafe; mata vi goora vi san kaw ma li ɗawn ki kayn nala. 40Sum ma' ma lak goy hay sinena; kep ma slumis goyo, kep ma hin zaw. 41Boyn ma' ma lak luta, kepta ma' sla'ays goyo, kepta ma hina. 42Kay na'ta lakgi jigere kay nigi may wi buur ma Bum-Sumuna vigi ma maanɗi. 43Sargi tam bum-ziyna tige! Lali nam wi liyn ma kulla co haya hay henjeta kay kula ni, nam ɗawn ma mus jigere, hin sa ma kulla co ziyna valamɗi kaw. 44Kay na'ta nigi kaw lakgi jigere, kay goora vi sana ma ɗawni hay leer ma nigi may var kalamɗi.

Ma ŋomda ma ŋaana hiɗi ma joona

Luk 12:41-48

45Sa ma ŋom ziyna ma dikam ŋaa'a, ma ŋali kaw, ma bum-ziyna valamu musum kay sum sa vo valamna, kay nam ma vulsi tin hay liyamu kaw kayni mi sa marige? 46Sle'ta ka kay sa ma ŋom ziyna ma bum-ziyna fum ki kayn nala hay li ma nam hotiya. 47Nan digi gasita, nam ma musum kay zlamda valamu. 48May la nam mi ma ŋomda ma joona, la nam di hay dikam kalaf ala bum-ziyna van may co gosoyɗi, 49la nam tun caw to nuriyom sa sunda, ti'e ci'e hiɗi sa ci dolayna kaw, 50hay na'ta bum-ziyna valam ma co kalam ɓukudum', hay leera ma nam may wumɗi, 51nam ma calam goy tiges tiges', ma vulum liyna valamu jar sa milena hay liyn ma tiyta hiɗi mut-siyna ka hayna.

Currently Selected:

MATEWUS 24: Massana

Highlight

Copy