MATEWUS 21

Yesu ka kulo'o hay Yerusalem

Mark 11:1-10; Luk 19:28-44; Yoh 12:12-19

1Hay li ma nisi co hay Betfage gal hiɗiyta Olive, goboy co hay Yerusalem, Yesu cuk sa hatayn sun ma', ka disi ala: 2Tuɗgis tam hoyok-ziyn ma vokgin ɗiger, wulini wulini nigi ma fi kurot juni zaw hiɗi goor kuɗa'a, nigi ma butumiya, maram tanu. 3La sa digi vaawa, nigi ma hot dit ala Bum-Sumuna min li va hiɗi namu. Kay na'ta nam ma hingi kal de'.

4May van kayni li'e kay vun dita vi sa ma jobta-Lawna ma hoba, dita ta ala:

5Digi tam goota vi Siyon ala:

Mulla vag ɗaw tuɗay hayag ni,

nam hobay hiɗi lumaɗa,

nam ɓey kay kuro ta cata, ɓey kay goor-kurona,

goora vi kuro ta ziy jakŋa.#21:5 Fi kayni goy hay Zak 9:9.

6Sa hatayna kaliya, nisi li ki Yesu disi nala. 7Nisi mar kurota hiɗi goora va'a, bar sligara visi kalamu, nam mus kalamu may. 8Ŋolda vi sumuna bar sligara visiya hay hagata, segena ka popona baram hay hagata. 9Sum sa vokomna hiɗi sa bugolomna ka siwel ala: Hosanna! tam goora vi David! Bolda ka kay nam ma min ma'a hay semda vi Bum-Sumuna. Hosanna! Hay liyn ma Kulo-Jamna.

10Hay li ma nam kal kulo'o hay Yerusalem, hoyok-ziyn geɗ noŋ kafe, sumun ka job ala sa namna kayni mi gige? 11Sumun ka hotsi dit ala kayni mi Yesu, sa ma jobta-Lawna hay Nasaret hay Galileya.

Sa gus slen goyna digiɗiy goy hay Tempella

Mark 11:15-19; Luk 19:45-48; Yoh 2:13-22

12Yesu kal kalafi hay Tempella vi Lawna, nisi sa gus slen goyo hiɗi nisi sa gusum kisi hay Tempella nam digiɗsi goy kaf, tablena vi sa muɗ gurjuta hiɗi zlamna vi sa gus gukayn goyna kaw nam zutum gaa'a. 13Nam disiya: Ɗot ɗo'ay ala ziyna vanu ma yum ala ziyn ma siɗawta, may nigi muɗum goy zulla vi sa coŋcoloŋŋa kayni kay mige?

14Sa dukina hiɗi sa dirlayna ma talamu hay Tempella, nam muɗsi goy ŋaa'a. 15May muliyan ŋulo sa-ɗifinna hiɗi sa wi-ɗota wi sle ma ŋulona ma nam lumna hiɗi gurosgurayn ka siwel hay Tempella ala hosanna goora vi David kaw, nisi muɗ ɦiya. 16Nisi dumu: Naŋ hum va ma nisi ka dumna su? Yesu disiya: Awa. Nam hot disiya: Yoboyn kayni nigi bay jaŋam tuwa noŋ su? Yoboy ma ala: naŋ tun suburtawa vun gurosgurayna, hiɗi guro sa dig sumaysina kay nisi ma suburaŋu.#21:16 Ɗuw hay Nul 8:3. 17Nam hinsiya, kalay goy hoyok-ziyn pa kal hay Betaniya, nam bur haya.

Yesu beɗ gu-gumna

Mark 11:12-14; Luk 13:6-9

18Hay graw culumta, hay li ma nam hot kulo hay hoyok-ziyna, mayta tun caw cumu. 19Hay li ma nam wi gu-gumna goy gaŋ hagata, nam cal kuɗumu, may nam fi vuɗ humamɗi, fum mi humam ma goɗayn ɦawa. Nam di tam guna: Vuɗ kep kaw ma vuɗ humaŋ loɗi. Wulini wulini gu-gumna soy goy hamiyaŋ'. 20Hay li ma sa hatayna wi kayni, nisi muɗ ɦuyum', nisi di'e: gu-gumna soy goy gosoy nala kayn kay mige? 21May Yesu disiya: Nan digi gasita, la vida vigi ka bay giriŋi, nigi ma lum mi va ma li tam gu-gumna kayn ɦawaɗi, may la hiɗiyt zawni nigi ma di ta' ala poŋag kulo'o, gag tuwagis hay niyn-ŋolla kaw, van kayni as li'e. 22Slen pet mige kaw ma nigi jobom hiɗi vida hiɗi siɗawta ni, nigi ma fumu.

Gaŋeraŋa vi Yesu may arige pa?

Mark 11:27-33; Luk 20:1-8

23Yesu kalay hay Tempella. Hay li ma nam ka hata, muliyan ŋulo sa-ɗifinna hiɗi sa maariyana vi sumuna co'o, nisi dumu: Naŋ li sle namna kayni hiɗi donota vi gige? Vulaŋ dono na'ta kayn gige? Yesu hotsi dita: 24Nan kaw min jobgi va kepe, la nigi hotan ditawa, nan min ɗekgi kay sa ma nan li lop hiɗi donota valamna. 25Baptisma vi Yohana nam may arige pa? Vi wuralawna pa lebo vi sumun su? Nisi var jar-tuwsi ala: La nay di ala vi wuralawna pa, nam ma di tay ala nigi vi hayamɗi kay mige? 26May la nay di ala vi sumun pa, nay li nar kay sumuna, kay sumun kaf ka ɗuw Yohana ki sa ma jobta-Lawna nala. 27Nisi hot dit tam Yesu ala: Numa'a wi kaynɗi. Nam kaw disiya: Nala nan kaw liyn ma donot ta nan li lop hiɗi na'ta may hay pa nan may digitɗi.

Law ma nir-niramna kay guro sa ma'na

28May nigi var mige? San kep gurona valam ma', nam tuɗ tam ma kepna dumu: Goora vanu, vaydi naŋ tuɗan li lop hay sine gulda-guldana vanu. 29May nam hot dit ala nam minɗi. May bugolda nam hama, kalay hay sinena kaw. 30Nam tuɗ tam ma mul ma'na, vulum hagat ki kayn nala kaw. Nam hot dit ala: Awa mulanna. May bugolda nam min tu'ɗi. 31Jar sumun ma' lakŋi, ma li minda vi bulumu mi marige? Nisi di'e: Ma jewna. Yesu disiya: Nan digi gasita, sa tar vun-lumuna hiɗi boy sa viyuwna ma cuk kalaf hay mulda-wuralawna jewgiya. 32Kay Yohana ma tigiya hiɗi hagata ɗigerta, nigi min vi kuɗumɗi, may sa tar vun-lumuna hiɗi boy sa viyuwna vi kuɗumu, nigiya, nigi wi kayni, may nigi min hama kay vi kuɗumɗi.

Law ma nir-niramna kay gulda-guldana

Mark 12:1-12; Luk 20:9-19

33Humgi law ma nir-niramna mara'a: San kepe mi bum-ziyna, nam pi gulda-guldan gaa sine'e, gi zlaɓn vunamu, jugoɗ zul ma kesl gulda-guldana, in simdira kaw, deŋem goyo hay ɓam sa zumna, kalay malam rogoyo. 34Hay li ma vuɗna valam hebawa, nam cuk sa sunda valamu tam sa zumna kay ja vuɗna vi gulda-guldana. 35May sa zumna yaw sa sunda valamu, ma kepna nisi watamu, ma kepna nisi cum goyo, ma hena nisi gum hiɗi goorhoyona may. 36May nam cuk sa sunda sara'a lo ŋol suw sa jewna, nisi li tisi nala kaw. 37May bugolda nam gi goora valam tisiya di'e: Nisi ma li zulo'o kay goora vanu. 38May hay li ma sa zumna wi goora, nisi di jar-tuwsiya: Kilan mi ma yaw vocota, nay tuɗay cayt goyo, nay ma fi vocota valamu. 39Nisi vumu, cum goyo, gum goy vun sinena.

40Wulin kayni, hay li ma bum sinen co ɗawni, sum sa zumna lakŋi nam ma lum tisi mi mige? 41Nisi dumu: Nam ma lisi joo ŋolo, nam ma cisi goyo kuɗ joota visiya, nam ma vul sine gulda-guldana valamu mi sum sara sa min vulum vuɗna hay liyamna.

42Yesu disiya: Nigi bay jaŋ hay ɗot noŋ su? Hiɗiyna ma san in ziyna gum goyna, nam muɗi mi hiɗiy ma ŋolla vi gef-ziyna, van kayni may goy vi Bum-sumuna pa, kayni va ma muɗ sa ɦuyum'.#21:42 Fi kayni hay Nul 118:22. 43Kuɗ kayni nan digi ala: Mulda-Lawna ma sliys goy kigiya, vulis goy tam jaf-sum sa vuɗ vuɗna va'a. 44Sa ma nig gaa'a kay hiɗiy namna ma mun goyo, sa ma hiɗiyn ni gaa kalamna ma jiwesl goyo.

45Hay li ma muliyan ŋulo sa-ɗifinna hiɗi sa Farisena wi ala Yesu law ma nir-niramna kayn kisi nisiya; 46nisi kaf gar kay vumu, may nisi li nari kay sumuna, kay sumun ɗuwum ki sa ma jobta-Lawna nala.

Currently Selected:

MATEWUS 21: Massana

Highlight

Copy