MATEWUS 10

Yesu cuk sa hatayna sa doogo yam ma'na

1Bugolda Yesu yi sa hatayna valamu doogo yam ma' talamu. Nam vulsi donota kay digiɗ fuliyan ma liwisna goyo, kay muɗ sa moyna hiɗi sa maŋayna kaf goy ŋaa'a. 2Kayni semda vi sa hatayna sa doogo yam ma'na: Ma jewna mi Simon ma yum Peter, hiɗi ɓasulumna Andre, Yakub goora vi Sebedew, hiɗi Yohana ɓasulumna, 3Filip hiɗi Bartelemi, Tomas hiɗi Matewus ma tar vun-lumuna, Yakub goora vi Alfewus hiɗi Tadewus, 4Simon ma Kanaaniyana, hiɗi Yudas Iskariyot ma di newt kalamna.

Nisi cuki sunu

Mark 6:7-12; Luk 9:1-6

5Kayni nisi sa doogo yam ma'na sa Yesu cuksi sunna. Hay li ma Yesu cuksi sunu, nam disi ala: 6Nigi ma tuɗ tam sa ɦawanɗi, nigi ma cuk kulo hay hoyok-ziyna vi sa Samariyanɗi, may tuɗgi tam fok-dimi ma bay-goyna hay jafna vi Israyel. 7tuɗgi goy hay hagata, kusgi yoboyna, digi ala: Mulda-wuralawna maawa goboyo. 8Yergi sa moyn goyo, daygi sa mitin kulo'o, porgi sa moy-kuturun goyo, digiɗgi fuliyan goyo kaw. Nigi fi ɦawa'a, nigi ma vul goy ɦawa'a kaw. 9Ora hiɗi doorota hiɗi wayna#10:9 Kayni mi gurju ma ka li lop hay liy namna. nigi ma yawam kigi hay birimna vigiɗi. 10Sligi birim ma rogoy kigiɗi, sligara ma cukŋa ma' ma'ɗi, tugurunɗi, zugulɗi kaw, kay sa ma li lopna nagay kay wurakŋa valamu.

11La nigi cuk hay hoyok-ziyna ma ŋolla lebo ma goora kaw, nigi ma job labara, la sa ma nagay kay vigi ka'a, nigi ma lak vo valamu ta-ta hay li ma yam rogoyt vata. 12Hay li ma nigi min cuk vo hay ziyna, nigi ma li juway' jewe. 13La ziyna nagay kay kayni, toyta vigiya ma mus kalamu. May la nam nagay kay kaynɗi, toyta vigiya ma hot tigiya. 14La sum sa hay ziyna min vigiɗi, hum yoboyna vigiɗi kaw, hay li ma nigi cuk goy hay ziyna hiɗi hoyok-ziyna kayni, nigi ma po butuw ma segin goyo. 15Nan digi gasita, hay fatta kitata ɗawni, hoyok-ziy namna ma fi joota ŋolo suw Sodoma hiɗi Gomora.

Nisi ma fi lasta

Mark 13:9-13; Luk 21:12-17

16Ɗuwgiya, nan cukgi ɗawni ki fok-dimina jar hotna nala, nigi ma li yali ki guyna nala, ŋali ki gukka nala may. 17Ŋomgi tuwgi kay sumuna, kay nisi ma vulgi goyo hay ɓam sa kitana, nisi ma watgiya hay sinagogayna visiya, 18awa, kuɗan nanu nisi ma nargi vok guvernera hiɗi muliyana kaw, kay nigi ma li di-goyta tisiya, tam sa waana kaw. 19May hay li ma nisi vulgi goyo, hingi dikgi ɓirgi kay va ma nigi ma dumnaɗi, va ma nigi ma dum tisina nigi ma fum ɗawn hay liy namna. 20Kay di ɗawni may si nigi kay tuwgiɗi, may Ŋusta vi bugiya ma ɗekgi va ma nigi ma dumna. 21Sa hena ma vul ɓasulumna goy tam mitta, bumna ma vul goora valam goyo kaw, gurona ma yaw kulo'o kay sumaysiya, ma cisi goyo kaw. 22Sumun kaf ma ka gawt kigiya kay semda vanu, may sa ma vi'e ta-ta hay dabaŋ-gu'ta, nam ma fi su'da. 23La nisi lasgi hay hoyok-ziy mara'a, pirgi hay hoyok-ziyn hena kaw, nan digi gasita, nigi ma ŋuy hoyok-ziyna vi Israyel kafɗi, ta-ta goora vi sana ma co'o.

Deŋga

Luk 12:2-9

24Sa ma hatayna nam ŋol suw sa ma hatamnaɗi, gorvona nam ŋol suw mulamnaɗi kaw. 25Sa ma hatayna ma li ki sa ma hatamna nala, gorvona ma li ki mulamna nala kaw. May la bum-ziyna nisi yum ala Beelzebul, sa vo valamna nisi ma yisi nala suwa.

26Ligi nar kisiɗi, kay va ma yalam baray bar ma ba bay ma goy haraŋɗi mayɗi, 27Va ma ŋayaya ma sa ba bay wum mayɗi. Va ma nan digit hay jufunda kayni nigi ma dum goy hay haraŋa, va ma nan kuɗukum hay humgina, nigi ma siwelem kulo'o kay yam-ziyna. 28Sum sa ci tuwn goyo may ci ciwt goyɗina nigi ma li nar kisiɗi, may ligi nari kay nam ma as ci ciwt goyo, ci tuwn goyo kaw, cukum goy hay kuta tewɗita. 29san as gus colgon goy ma' kay sisi kepɗi su? Kep jaram kaw ma nig gaa kay nagata bay minda vi bugiya mayɗi. 30Ɗuŋus ma kigin kaw ŋay kalam kafe. 31Kay na'ta ligi narɗi, kay nigi gus lopo suw colgona.

32Kay na'ta la san di goy kanu vok sumuna, nan ma di goy kalamu vok bunu ma hay wuralawna; 33may la san puw vunam kanu vok sumuna, nan ma puw vunanu kalamu vok bunu ma hay wuralawna.

Sa ma hatayna hiɗi ziyna valamu

Luk 12:51-53

34Nigi ma var ala nan mar sle'tawa hay nagata nigi ma var naɗi, may nan maram kayn mi kew-gaferaŋa. 35Nan ma kayni kay san ma ɓuraw goy hiɗi bulumu, kay goota ma ɓuraw goy hiɗi su'a, kay cata ma ɓuraw goy hiɗi sum jufa'a. 36Sana ma ka gawt hiɗi sum sa vo valamna. 37Sa ma min bulumu kla sulumu kla suwan nanu, nam may nagay kanɗi. Sa ma min goora lebo goota suwan nanu, nam may nagay kanɗi. 38Sa ma ziy grakŋa valamu kay tuwamu kay tap kuɗanɗi, nam may nagay kanɗi. 39Sa ma fi irita valamawa, nam ma ba'a, may sa ma ba irita valamawa kuɗan nanu, nam ma fa'a.

40Sa ma vigiyawa hiɗi firita, nam van nanawa hiɗi firita kaw, sa ma van nan hiɗi firita, nam vum kayn mi bun ma ganina. 41Sa ma vi sa ma jobta-Lawnawa hiɗi firita hay semda vi sa ma jobta, nam ma fi wurakŋa ki sa ma jobta-Lawna nala, sa ma vi sa ma ɗigera ki sa ma ɗigera nala, nam ma fi wurakŋa ki sa ma ɗigera nala may. 42Nan digi gasita: La san vul niy ma sleɗna ne' ɦawa kaw a ci'e mi kep jar guron lakŋi kuɗ ta ala nisi si sa hatayna ni, wurakŋa valamu ma ba goy ɦawa noŋɗi.

Currently Selected:

MATEWUS 10: Massana

Highlight

Copy